പേരാവൂര്‍: വിഷുത്തലേന്ന് കുനിത്തലയില്‍ പടക്ക വില്പന ശാലക്ക് സമീപമുണ്ടായ മര്‍ദ്ദനവുമായി ബന്ധപ്പെട്ട് നാലുപേര്‍ക്കെതിരെ പേരാവൂര്‍ പോലീസ് കേസെടുത്തു.കുനിത്തലമുക്ക് സ്വദേശി കെ.പി.പ്രണവിനെ(23) മര്‍ദ്ദിച്ച കേസില്‍ കുനിത്തല സ്വദേശികളായ ദിബിന്‍,അഖിലേഷ്,അഭിനേഷ്,കെ.ജിഷ്ണു എന്നിവര്‍ക്കെതിരെയാണ് വിവിധ വകുപ്പുകള്‍ ചുമത്തി കേസെടുത്തത്.പടക്കം വാങ്ങാനെത്തിയ പ്രണവിനെ മുന്‍ വൈരാഗ്യം വെച്ച് പ്രതികള്‍ വടിയും കല്ലും ഹെല്‍മെറ്റും വെച്ച് മര്‍ദ്ദിച്ചുവെന്നാണ് പരാതി.വെള്ളിയാഴ്ച രാത്രി 11.30 ഓടെയാണ് സംഭവം.

ആര്യപ്പറമ്പ് കൂട്ടക്കളം തെയ്യപ്പറമ്പില്‍ വെച്ച് മുഴക്കുന്ന് സ്വദേശി കെ.പി.അനുരാജിനും കുനിത്തല സ്വദേശി കെ.ജിഷ്ണുവിനും മര്‍ദ്ദനമേറ്റിരുന്നു.അനുരാജിനെ കൈവളകൊണ്ടും കൈകൊണ്ടും മര്‍ദ്ദിച്ച കേസില്‍ ജിഷ്ണു,നിപുണ്‍,രാകേഷ്,അഖിലേഷ് എന്നിവര്‍ക്കെതിരെ പേരാവൂര്‍ പോലീസ് കേസെടുത്തിരുന്നു.അന്നേ ദിവസം തന്നെ ജിഷ്ണുവിനെ ഇരുമ്പുവടികൊണ്ട് മര്‍ദ്ദിച്ച കേസില്‍ പ്രണവ്,അനുരാജ്,പ്രജിത്ത് തുടങ്ങി ഏഴു പേര്‍ക്കെതിരെയും കേസെടുത്തിരുന്നു.ഏപ്രില്‍ നാലിനായിരുന്നു സംഭവം.മാര്‍ച്ച് 23ന് കുനിത്തല മൂപ്പന്‍ കാവിലെ തിറയുത്സവം നടക്കുന്ന ദിവസം കെ.പി.അനുരാജിന് മര്‍ദ്ദനമേറ്റിരുന്നു.ഇതിന്റെ തുടര്‍ച്ചയാണ് പിന്നീടുണ്ടായ അക്രമങ്ങളെന്ന് പോലീസ് പറഞ്ഞു.