പേരാവൂർ : തൊണ്ടിയിൽ സെയ്ൻ്റ് ജോൺസ് യു.പി. സ്കൂളിൽ ത്രിദിന അവധിക്കാല പ്രത്യേക പരിശീലന പരിപാടി ‘ഭാവോത്സവം’ തുടങ്ങി. സാഹിത്യകാരൻ ബാബുരാജ് മലപ്പട്ടം ഉദ്ഘാടനം ചെയ്തു. സ്കൂൾ പ്രഥമാധ്യാപകൻ സോജൻ വർഗീസ് അധ്യക്ഷത വഹിച്ചു. വിനോദ് നടുവത്താനിയിൽ, ഗ്ലോറി റോബിൻ, നീനു ജോസഫ്, ബീന ജോസഫ്, പ്രസാദ് തോമസ് എന്നിവർ സംസാരിച്ചു.

നാടൻ പാട്ട് , കഥ-കവിത രചന, അഭിനയം, നാടൻ കളികൾ, കരകൗശല വസ്തു നിർമാണം, ചിത്രരചന, വാനനിരീക്ഷണം എന്നിവയുടെ പരിശീലനക്കളരിയാണ് ഭാവോത്സവം. കുട്ടികളുടെ വിവിധ കലാപരിപാടികൾ ഉൾപ്പെടുത്തിയിട്ടുള്ള ക്യാമ്പ് ഫയറും ഭാവോത്സവത്തിൻ്റെ ഭാഗമായി നടക്കും. ഷിബു മുത്താട്ട്, ബാബുരാജ് മലപ്പട്ടം, കെ.എം. അമർനാഥ്, ജിജി.പി.നമ്പ്യാർ, വിനോദ്, ജിജോ ജോസഫ്, അനൂപ് സ്കറിയ എന്നിവർ നേതൃത്വം നൽകും.

കേളകം: മലാനെ കിണറ്റിൽ ചത്ത നിലയിൽ കണ്ടെത്തി. കേളകം അടക്കാത്തോടാണ് മൂന്നുദിവസം പഴക്കമുള്ള മലാനെ ശനിയാഴ്ച ഉച്ചയോടെ കിണറ്റിൽ ചത്ത നിലയിൽ കണ്ടെത്തിയത്. അടക്കാത്തോട് വെണ്ടേക്കുംചാൽ പോർക്കാട്ടിൽ മോളിയുടെ ഉടമസ്ഥതയിലുള്ള കിണറ്റിലാണ് മലാനെ കണ്ടെത്തിയത്.

കേളകം: അടയ്ക്കാത്തോട് ടൗണിൻ്റെ പരിസരത്ത് അനധികൃത മദ്യവിൽപനയും മദ്യപന്മാർ തമ്മിലുള്ള ഏറ്റുമുട്ടലും പതിവാകുന്നതായി പരാതി. അടയ്ക്കാത്തോട് സാംസ്കാരിക കേന്ദ്രത്തിൻ്റെ പരിസരത്തും, തടിമില്ല്, ക്ഷീരസംഘം എന്നിവയുടെ സമീപത്തും തമ്പടിക്കുന്ന മദ്യപന്മാർ തമ്മിലാണ് വാക്കേറ്റവും തമ്മിലടിയും പതിവാകുന്നത്.

ടൗൺ പരിസരം കേന്ദ്രീകരിച്ച് അനധികൃത മദ്യ വില്പനയും വ്യാപകമാണെന്ന് നാട്ടുകാർ പറയുന്നു. പതിവായി പ്രശ്നങ്ങളുണ്ടാക്കുന്നവരുടെ ലിസ്റ്റ് പോലീസ് പരിശോധിക്കുകയും, പ്രദേശത്ത് നിരീക്ഷണം നടത്തുകയും ചെയ്യുന്നുണ്ട്. സ്ഥലത്തെ സി.സി.ടി .വി കാമറകൾ പരിശോധിച്ച് കുറ്റക്കാരെ കണ്ടെത്തണമെന്നാണ് വ്യാപാരികൾക്കൊപ്പം നാട്ടുകാരുടെയും ആവശ്യം.