പേരാവൂർ: ഡോക്ടർമാരില്ലാതായതോടെ പേരാവൂർ താലൂക്കാസ്പത്രിയിലെ ഒ.പി.യുടെയും അത്യാഹിത വിഭാഗത്തിന്റെയും പ്രവർത്തനം അവതാളത്തിലായി. ദിവസവും എണ്ണൂറോളം രോഗികൾ ചികിത്സ തേടുന്ന ഒ.പി.യിൽ ഒന്നോ രണ്ടോ ഡോക്ടർമാരുടെ സേവനം മാത്രമാണ് നിലവിൽ ലഭിക്കുന്നത്. അത്യാഹിത വിഭാഗത്തിലടക്കം മണിക്കൂറുകൾ ക്യൂ നില്‌ക്കേണ്ട ഗതികേടിലാണ് രോഗികൾ.

ഒ.പി.ക്കും അത്യാഹിത വിഭാഗത്തിനും പുറമെ ജീവിതശൈലീരോഗ ക്ലിനിക്ക്, ട്രൈബൽ മൊബൈൽ മെഡിക്കൽ യൂണിറ്റ്, പനി ക്ലിനിക്ക് എന്നിവയ്ക്കും ഡോക്ടർമാരുടെ സേവനം ആവശ്യമാണ്. എൻ-14 ഡോക്ടർമാരുടെ സേവനം ലഭിക്കേണ്ട ആസ്പത്രിയിൽ ആറു പേരുടെ ഒഴിവുകളുണ്ട്. സൂപ്രണ്ടില്ലാതായിട്ട് ഒരു വർഷത്തോളമായി. കാഷ്വാലിറ്റി മെഡിക്കൽ ഓഫീസർ തസ്തികയിൽ നാലു പേർ വേണ്ടിടത്ത് രണ്ടു പേരാണുള്ളത്. ഒരാൾ അഞ്ച് മാസമായി ലീവിലാണ്. രണ്ട് അസിസ്റ്റന്റ് സർജന്മാരിൽ ഒരാൾ സൂപ്രണ്ടിന്റെ ചുമതല വഹിക്കുന്നതിനാൽ ഒ.പി.യിൽ അദ്ദേഹത്തിന്റെ സേവനം ലഭ്യമല്ല. ജൂനിയർ കൺസൾട്ടന്റ് മെഡിസിൻ വിഭാഗത്തിൽ രണ്ട് പേർ വേണ്ടിടത്ത് മാസങ്ങളായി ഒരാൾ മാത്രമാണുള്ളത്. ദന്തൽ വിഭാഗത്തിൽ അസി.സർജൻ തസ്തികയും ഒരു വർഷത്തോളമായി ഒഴിഞ്ഞു കിടക്കുകയാണ്.

ഒഴിവുള്ള തസ്തികകളിൽ ഡോക്ടർമാരെ നിയമിക്കാൻ ആരോഗ്യവകുപ്പ് തയ്യാറാവുന്നില്ലെന്നാണ് ആക്ഷേപം. മലയോരത്തെ ഏറ്റവും പ്രധാനപ്പെട്ട ഈ ആതുരാലയത്തിൽ മാസങ്ങളായി ഡോക്ടർമാരുടെ കുറവുണ്ടായിട്ടും ബദൽ സംവിധാനം ഒരുക്കാത്ത ആരോഗ്യ വകുപ്പിനെതിരെ പ്രതിഷേധം ഉയരുന്നുണ്ട്. ഡോക്ടർമാർ കുറഞ്ഞതോടെ ഒ.പി.യിലെത്തുന്ന രോഗികൾ ചികിത്സ ലഭിക്കാതെ മടങ്ങുന്ന സാഹചര്യവുമുണ്ട്. ജോലി ക്രമീകരണ വ്യവസ്ഥയിലോ എൻ.എച്ച്.എം മുഖാന്തിരമോ എത്രയുമുടനെ ആവശ്യത്തിന് ഡോക്ടർമാരെ നിയമിക്കാത്ത പക്ഷം ആറളം പുനരധിവാസ മേഖലയിലെ അടക്കം മലയോരത്തെ നിർധന രോഗികൾ എറെ ദുരിതത്തിലാവും. മലയോരത്ത് പകർച്ച വ്യാധികൾ വ്യാപകമായിട്ടും പ്രതിസന്ധിയിലായ താലൂക്കാസ്പത്രിയുടെ പ്രവർത്തനം പരിഹരിക്കാൻ ആരോഗ്യവകുപ്പ് നടപടി സ്വീകരിക്കണമെന്നാണ് ജനങ്ങളുടെ ആവശ്യം.

പേരാവൂർ: ടൗണിൽ മിൽമ ബൂത്തിന് സമീപം പൊതുസ്ഥലത്ത് മത്സ്യാവശിഷ്ടങ്ങളും മലിനജലവും ഒഴുക്കിയതിന് മത്സ്യ വണ്ടിക്കാരന് പേരാവൂർ പഞ്ചായത്ത് അയ്യായിരം രൂപ പിഴ ചുമത്തി.ഇരിട്ടി പുന്നാട് ആയിഷ മൻസിലിൽ വി.അസീസിനാണ് പഞ്ചായത്ത് പിഴയിട്ടത്.കഴിഞ്ഞയാഴ്ച ടൗണിൽ മത്സ്യ വില്പന നടത്തിയപ്പോഴാണ് ഇയാൾ പൊതു സ്ഥലത്ത് മത്സ്യാവശിഷ്ടങ്ങളും ദുർഗന്ധം വമിക്കുന്ന മലിന ജലവും ഒഴുക്കിയത്.

പേരാവൂർ : ഹരിതകേരളം മിഷൻ നടത്തുന്ന “നീലകുറിഞ്ഞി” ജൈവവൈവിധ്യ പഠനത്തിന്റെ ഭാഗമായി പേരാവൂർ ബ്ലോക്ക്തല ക്വിസ് മത്സരത്തിൽ പാല ഗവ.ഹയർ സെക്കൻഡറി സ്കൂളിലെ സി.കെ. ശിവദ ഒന്നാമതെത്തി.

കോളയാട് സെയ്ന്റ് കൊർണേലിയൂസ് സ്കൂളിലെ സനയ ഷിജിത്ത്, കൂത്തുപറമ്പ് ഹയർ സെക്കൻഡറി സ്കൂളിലെ പി. ആദികൃഷ്ണ, പാല ഗവ. ഹയർ സെക്കൻഡറി സ്കൂളിലെ എ.കെ. അഷ്മിക എന്നിവർ യഥാക്രമം രണ്ട് മുതൽ നാല് വരെ സ്ഥാനങ്ങൾ നേടി. ഇവർക്ക് മെയ് ജില്ലാതല ക്വിസ് മത്സരത്തിൽ പങ്കെടുക്കാം.

മത്സരത്തിൽ പങ്കെടുത്തവർക്കും വിജയികൾക്കുമുള്ള സർട്ടിഫിക്കറ്റ് വിതരണം പേരാവൂർ ബ്ലോക്ക് പഞ്ചായത്ത് പ്രസിഡന്റ് കെ. സുധാകരൻ ഉദ്ഘാടനം ചെയ്തു. ബ്ലോക്ക് സെക്രട്ടറി ആർ. സജീവൻ അധ്യക്ഷനായി. പങ്കെടുത്ത മുഴുവൻ കുട്ടികൾക്കും സർട്ടിഫിക്കറ്റും “നീലകുറിഞ്ഞി” ജൈവവൈവിധ്യ പഠനകേന്ദ്രത്തിന്റെ ബ്രോഷറുകളും നൽകി. കെ. വിനോദ് കുമാർ, നിഷാദ് മണത്തണ, എ. യമുന, സനുപ്രിയ തുടങ്ങിയവർ സംസാരിച്ചു.