കണ്ണൂർ : കണ്ണോത്തുംചാലിൽ നിന്ന് 7. 437 ഗ്രാം ബ്രൗൺ ഷുഗറുമായി രണ്ട് യുവാക്കളെ എക്സൈസ് അറസ്റ്റ് ചെയ്തു. വടകര മേമുണ്ട സ്വദേശി ചെറു കുനിയൻ വീട്ടിൽ സി. കെ. മുനീർ (47), വടകര തിരുവള്ളൂർ സ്വദേശി നാറാണത്ത് വീട്ടിൽ എൻ.അർഷാദ്( 44) എന്നിവരാണ് അറസ്റ്റിലായത്.എക്സൈസ് എൻഫോഴ്സ്മെന്റ് ആൻഡ് ആൻ്റീ നാർക്കോട്ടിക് സ്പെഷ്യൽ സ്ക്വാഡ് ഇൻസ്പെക്ടർ ടി. ഷിജുമോനും പാർട്ടിയുമാണ് ഇരുവരെയും അറസ്റ്റ് ചെയ്തത്. പാർട്ടിയിൽ അസി. എക്സൈസ് ഇൻസ്പെക്ടർ ഗ്രേഡ് എം. കെ.സന്തോഷ്, പി. കെ. ദിനേശൻ , പ്രിവന്റീവ് ഓഫീസർ (ഗ്രേഡ് ) പി. പി.സുഹൈൽ, സി.എച്ച്.റിഷാദ്, എം.സജിത്ത്, സിവിൽ എക്സൈസ് ഓഫീസർ പി. വി. ഗണേഷ് ബാബു ,പി. നിഖിൽ, ഷൈന, സി.അജിത്ത് എന്നിവരും ഉണ്ടായിരുന്നു.

പിണറായില്‍ തിളച്ച പാല്‍ നല്‍കി അഞ്ചു വയസുകാരന് പൊള്ളലേറ്റ സംഭവത്തില്‍ അംഗനവാടി അധ്യാപികക്ക് സസ്‌പെന്‍ഷന്‍. അംഗന്‍വാടി അധ്യാപിക വി. രജിത, ഹെല്‍പ്പര്‍ വി ഷീബ എന്നിവരെയാണ് സസ്‌പെന്‍ഡ് ചെയ്തത്. വീഴ്ച സംഭവിച്ചെന്നും പൊള്ളലേറ്റിട്ടിട്ടും മേലധികാരികളെ അറിയിക്കാത്തത് പിഴവാണെന്നും കണ്ടെത്തിയതിനെത്തുടര്‍ന്നാണ് നടപടി.

സംസാരിക്കാന്‍ ബുദ്ധിമുട്ടുള്ള കുട്ടിക്ക് പൊള്ളലേറ്റിട്ടും ഉടന്‍ തന്നെ ആസ്പത്രിയില്‍ എത്തിക്കാന്‍ അംഗന്‍വാടി ജീവനക്കാര്‍ തയ്യാറായില്ലെന്ന് കുട്ടിയുടെ അച്ഛന്‍ ആരോപിച്ചിരുന്നു.

ഈ മാസം ഏഴാം തിയതിയാണ് സംഭവം. മകന്റെ കീഴ്ത്താടിയില്‍ തൊലി പോകുന്നുണ്ടെന്ന് പറഞ്ഞ് കുട്ടിയുടെ അമ്മയെ അംഗന്‍വാടി ജീവനക്കാര്‍ വിളിച്ചു പറയുകയായിരുന്നു. കുട്ടിയുടെ വായും നാവും താടിയും മുഴുവനായി പൊള്ളലേറ്റ നിലയിലായിരുന്നു. കുട്ടിക്ക് പാല്‍ കൊടുത്തതാണെന്നായിരുന്നു ജീവനക്കാര്‍ പറഞ്ഞത്.

തിളച്ച പാല്‍ കൊടുത്ത ശേഷം തുണി കൊണ്ട് തുടച്ചു. തുടച്ചപ്പോള്‍ തൊലി മുഴുവന്‍ ഇളകി വന്നു. ആസ്പത്രിയില്‍ കൊണ്ടുപോകാനും തയ്യാറായില്ലെന്ന് കുട്ടിയുടെ പിതാവ് പറഞ്ഞിരുന്നു. സംഭവത്തില്‍ പൊലീസ് കേസെടുത്ത് അന്വേഷണം നടക്കുന്നതിനിടെയാണ് നടപടി.

കണ്ണൂർ: യുവാവിനെ തടഞ്ഞു നിർത്തി ഹെൽമെറ്റ് കൊണ്ട് തലക്കടിച്ച് സ്വർണ്ണമാലയും മൊബെൽ ഫോണും പിടിച്ചുപറിച്ച് രക്ഷപ്പെടാൻ ശ്രമിച്ച ആറംഗ സംഘത്തിലെ രണ്ടു പേർ പിടിയിൽ. തമിഴ്നാട് കള്ളക്കുറുശി സ്വദേശി വിനോദ് (28), തൂത്തുകുടി സ്വദേശി ആണ്ടവൻ (21) എന്നിവരെയാണ് ടൗൺ പോലീസ് അറസ്റ്റു ചെയ്തത്.കഴിഞ്ഞ ദിവസം രാത്രി 8.30 മണിയോടെ പഴയ ബസ് സ്റ്റാൻ്റിലായിരുന്നു സംഭവം.

കണ്ണൂർ സൗത്ത് ബസാർ മൊട്ടമ്മലിലെ കെ. മനോജിനെ (41) യാണ് ആറംഗ സംഘം ആക്രമിച്ച് കവർച്ചക്ക് ശ്രമിച്ചത്.കഴുത്തിൽ നിന്നും പ്രതികൾ മാലപ്പൊട്ടിച്ചെടുക്കുകയും ചെയ്തു. പിടിവലിയിൽ മാല തിരിച്ചുപിടിക്കുകയും തുടർന്ന് ടൗൺ പോലീസിൽ പരാതി നൽകി. കേസെടുത്ത പോലീസ് അന്വേഷണത്തിനിടെ സംഘത്തിലെ രണ്ടു പേരെ പിടികൂടുകയായിരുന്നു. അറസ്റ്റു ചെയ്ത് കോടതിയിൽ ഹാജരാക്കിയ പ്രതികളെ റിമാൻ്റ് ചെയ്തു.