കണ്ണൂര്‍: മകനെ ജാമ്യത്തിലിറക്കാന്‍ വന്ന അമ്മയോട് മോശമായി പെരുമാറിയ ധര്‍മ്മടം സി.ഐയ്ക്ക് സസ്‌പെന്‍ഷന്‍. എടക്കാട് സ്വദേശി അനില്‍കുമാറിന്റെ അമ്മയോടാണ് സി.ഐ കെ.വി. സ്മിതേഷ് അപമര്യാദയായി പെരുമാറിയത്. കണ്ണൂര്‍ സിറ്റി പോലീസ് കമ്മീഷണര്‍ക്ക് ലഭിച്ച പരാതിയുടെ അടിസ്ഥാനത്തിലാണ് നടപടി.അന്വേഷണവിധേയമായാണ് നിലവില്‍ ഇയാളെ സസ്‌പെന്‍ഡ് ചെയ്തിരിക്കുന്നത്. മകനെ ജാമ്യത്തിലെടുക്കാന്‍ വന്ന അമ്മയുടെ അടുത്ത് അസഭ്യം പറയുന്നതും ആക്രോശിക്കുന്നതുമായ ദൃശ്യങ്ങള്‍ പുറത്ത് വന്നിരുന്നു. ഇതിന്റെ കൂടെ പശ്ചാത്തലത്തിലാണ് ഇയാള്‍ക്കെതിരെയുള്ള നടപടി.

സി.ഐ കെ.വി. സ്മിതേഷിനെതിരെ സര്‍ക്കാര്‍ വാഹനം ദുരുപയോഗം ചെയ്തതടക്കം നിരവധി പരാതികള്‍ ഇതിന് മുന്‍പും കമ്മീഷണര്‍ക്ക് ലഭിച്ചതായാണ് ലഭ്യമാകുന്ന വിവരം.ഒരു വാഹനത്തില്‍ തട്ടിയെന്ന പരാതിയിലാണ് അനില്‍കുമാറിനെ പോലീസ് കസ്റ്റഡിയിലെടുത്തത്. അനില്‍കുമാറിന്റെ അമ്മയെ ഇയാള്‍ തള്ളിയിട്ടതായി ആരോപണമുണ്ട്.നിലത്ത് കിടക്കുന്ന സ്ത്രീ ഹൃദ്രോഗിയാണെന്ന് സമീപത്തുള്ളവര്‍ പറയുന്നുണ്ടെങ്കിലും അമ്മയെ എടുത്തിട്ട് പോയില്ലെങ്കില്‍ എല്ലാത്തിനെയും ചവിട്ടുമെന്നാണ് ഇയാള്‍ ആക്രോശിക്കുന്നത്.

‘അമ്മയെയും ഒപ്പമുണ്ടായിരുന്ന മരുമകനെയും പെങ്ങളെയും അടിച്ചു. സംസാരിക്കാനൊന്നും നിന്നില്ല. ലാത്തികൊണ്ട് അടിയായിരുന്നു. ധര്‍മ്മടം സ്‌റ്റേഷനില്‍ നിന്ന് എടക്കാട് സ്‌റ്റേഷന്റെ പരിധിയില്‍ വന്നാണ് എന്നെ പിടിക്കുന്നത്. കാരണം അന്വേഷിച്ചപ്പോള്‍ പിന്നീട് പറയാമെന്നായിരുന്നു ലഭിച്ച മറുപടി. സ്റ്റേഷനിലെത്തിയ തന്നെ സി.ഐ മര്‍ദിച്ചു. അമ്മയെ സി.ഐ താഴേയ്ക്ക് തള്ളിയിട്ടു. വനിതാ പോലീസ് തടുത്തിട്ടും അദ്ദേഹം നില്‍ക്കുന്നില്ലായിരുന്നു. സംഭവത്തില്‍ തലശ്ശേരി എ.എസ്.പിയ്ക്ക് പരാതി നല്‍കിയിട്ടുണ്ട്.’- അനില്‍കുമാര്‍ പറഞ്ഞു.