മാലൂർ :തൃക്കടാരിപൊയിൽ, അരിങ്ങോട്ടുവയൽ ഭാഗങ്ങളിൽ വെച്ച് കുട്ടികളടക്കം നാലു പേർക്ക് നായയുടെ കടിയേറ്റു. മദ്രസയിൽ പോയി വരുന്ന വഴിയാണ് കുട്ടിക്കു കടിയേറ്റത്. കുട്ടിയെ പരിയാരം മെഡിക്കൽ കോളേജ് ആസ്പത്രിയിൽ പ്രവേശിപ്പിച്ചു.

മാലൂർ:പ്രാഥമികാരോഗ്യകേന്ദ്രത്തിന് കീഴിലുള്ള കാഞ്ഞിലേരിയിൽ മഞ്ഞപ്പിത്തം പടർന്നു പിടിച്ച മേഖലകളിൽ ആരോഗ്യ വകുപ്പിന്റെ സ്‌ക്വാഡ് പ്രവർത്തനങ്ങൾ ശക്തമാക്കി. ഇരിട്ടി താലൂക്കാസ്പത്രിക്ക് കീഴിലുള്ള ഹെല്ത്ത് ഇൻസ്‌പെക്ടർമാർ നേതൃത്വം നൽകിയ നാല് പ്രത്യേക സംഘങ്ങൾ വീടുകൾ സന്ദർശിച്ച് ബോധവത്ക്കരണം നടത്തി. ക്ലോറിനേഷനും നോട്ടീസ് വിതരണവും നടത്തി നൂറിലധികം വീടുകൾ സന്ദർശിച്ച് ജാഗ്രതാ നിർദ്ദേശങ്ങൾ നൽകി.

വ്യക്തിഗത ശുചിത്വം പാലിക്കുക, തിളപ്പിച്ചാറ്റിയ വെള്ളം മാത്രം കുടിക്കുക, ഉപ്പും കൊഴുപ്പും കുറഞ്ഞ ഭക്ഷണം കഴിക്കുക, മലവിസർജനത്തിന് ശേഷം കൈകാലുകൾ സോപ്പുപയോഗിച്ച് കഴുകുക, പൂർണ്ണമായി വിശ്രമിക്കുക തുടങ്ങിയ നിർദ്ദേശങ്ങൾ കർശനമായി പാലിക്കണമെന്ന് മെഡിക്കൽ ഓഫീസർ ഡോ.കെ.ജി.കിരൺ അറിയിച്ചു. സ്വയം ചികിത്സ പാടില്ലെന്നും ശ്രദ്ധിച്ചില്ലെങ്കിൽ മഞ്ഞപ്പിത്തം പടരുമെന്നും മെഡിക്കൽ ഓഫീസർ അറിയിച്ചു.പനി, ക്ഷീണം വിശപ്പില്ലായ്മ, ഛർദ്ദി , ദഹനക്കേട്, ഓക്കാനം, കണ്ണിൽ മഞ്ഞനിറം എന്നിവയാണ് പ്രധാന ലക്ഷണങ്ങൾ.

പ്രതിരോധ പ്രവർത്തനങ്ങൾക്ക് മെഡിക്കൽ ഓഫീസർ ഡോ.കെ.ജി. കിരൺ ഇരിട്ടി ഹെല്ത്ത് സൂപ്പർവൈസർ അഗസ്റ്റിൻ, പഞ്ചായത്ത് പ്രസിഡന്റ് വി. ഹൈമാവതി, മെമ്പർ ബീന,ജെ.എച്ച്.ഐ സുബിൻ,ജെ.പി.എച്ച്.എൻ അംബിക, പ്രിയ എന്നിവരും സമീപപ്രദേശങ്ങളിലെ ഹെല്ത്ത് ഇൻസ്‌പെക്ടർമാരും ആശാ പ്രവർത്തകരും പങ്കെടുത്തു.

മാലൂർ (കണ്ണൂർ) : നിറത്തിന്റെയും ജാതിയുടെയും പേരിൽ കലാകാരന്മാരെ ഇകഴ്ത്തി കാട്ടുന്ന ദുഷ്പ്രവണതക്ക് എതിരെ ഒറ്റയാൾ പോരാട്ടം. ആർ.എൽ.വി. രാമകൃഷ്ണന് ഐക്യദാർഢ്യം പ്രഖ്യാപിച്ച് മാലൂർ സ്വദേശിയും ചിത്രകാരനുമായ ജിമ്മി മാലൂരാണ് കറുത്ത വസ്ത്രം ധരിച്ച് മുഖത്ത് കറുത്ത ചായവും തേച്ച് ഒറ്റയാൾ സമരം നടത്തിയത്. വെള്ളിയാഴ്ച രാവിലെ മുതൽ വീട്ടിലും ജോലി സ്ഥലത്തുമെല്ലാം ഈ വേഷത്തിലായിരുന്നു ജിമ്മി. ആഫ്രിക്കയിലെ സാംബാ ചടുല താളവും മസായി ഡാൻസും ഗോത്രങ്ങളിലെ തുടിയുമെല്ലാം കറുത്തവന്റെ കരുത്താണെന്ന് ജിമ്മി മാലൂർ പറയുന്നു.