ഇന്റർനെറ്റും സ്മാർട്ട്ഫോണും വേണ്ട; ഫീച്ചർ ഫോണുകളിലും ഇനി ഫോൺപേ വഴി പണമയക്കാം! എങ്ങനെ എന്നറിയാം…
ന്യൂഡൽഹി: സ്മാർട്ട്ഫോണും അതിവേഗ ഇന്റർനെറ്റും ഉള്ളവർക്ക് മാത്രമല്ല, ഇനി സാധാരണ ഫീച്ചർ ഫോൺ ഉപയോഗിക്കുന്നവർക്കും യുപിഐ ഇടപാടുകൾ നടത്താം. ഇന്റർനെറ്റ് കണക്ഷനില്ലാതെ സാധാരണ ഫീച്ചർ ഫോണുകളിൽ നിന്നും യുപിഐ പണമിടപാടുകൾ നടത്താൻ സൗകര്യമൊരുക്കി പ്രമുഖ ഫിൻടെക് പ്ലാറ്റ്ഫോമായ ഫോൺപേ.
രാജ്യത്തെ 20 കോടിയിലധികം വരുന്ന ഫീച്ചർ ഫോൺ ഉപയോക്താക്കളെ ഡിജിറ്റൽ സാമ്പത്തിക രംഗത്തേക്ക് എത്തിക്കാൻ ലക്ഷ്യമിട്ട് ‘ഫോൺപേ യുപിഐ 123പേ’ എന്ന പുതിയ സംവിധാനത്തിനാണ് കമ്പനി തുടക്കം കുറിച്ചത്. ഇതോടെ ഫീച്ചർ ഫോണുകളിലേക്ക് യുപിഐ സേവനം വ്യാപിപ്പിക്കുന്ന ആദ്യത്തെ പ്രമുഖ തേർഡ് പാർട്ടി ആപ്ലിക്കേഷൻ പ്രൊവൈഡറായി ഫോൺപേ മാറി. സാമ്പത്തിക ഉൾപ്പെടുത്തൽ പ്രോത്സാഹിപ്പിക്കാനും സാധാരണക്കാരെ ഡിജിറ്റൽ ഇടപാടുകളിലേക്ക് കൊണ്ടുവരാനുമാണ് ഇതിലൂടെ ലക്ഷ്യമിടുന്നത്.
നോക്കിയ, എച്ച്എംഡി, ലാവ ഇന്റർനാഷണൽ, ഐടെൽ എന്നീ കമ്പനികളുടെ ഫോണുകളിൽ ഈ സേവനം പ്രീ-ഇൻസ്റ്റാൾഡ് ആയി ലഭിക്കും. വരും മാസങ്ങളിൽ മറ്റ് ഫോൺ നിർമാതാക്കളുമായും ഫോൺപേ സഹകരിക്കും. ഫീച്ചർ ഫോണുകളിൽ നേരിട്ട് ഉപയോഗിക്കാൻ കഴിയുന്ന ഈ ആപ്പിൽ ബിൽ പേയ്മെന്റുകൾ, റീചാർജുകൾ, ആധാർ വഴിയുള്ള ഓൺബോർഡിങ് തുടങ്ങിയവ വരും അപ്ഡേറ്റുകളിൽ ലഭ്യമാകും. എസ്എംഎസ് അടിസ്ഥാനമാക്കി പ്രവർത്തിക്കുന്ന ഈ സംവിധാനം, പരിമിതമായ 2ജി നെറ്റ്വർക്ക് മാത്രമുള്ള പ്രദേശങ്ങളിലും തടസങ്ങളില്ലാതെ ഇടപാടുകൾ നടത്താൻ സഹായിക്കും.
പ്രധാന സവിശേഷതകൾ:
- മൊബൈൽ നമ്പർ അല്ലെങ്കിൽ യുപിഐ ഐഡി വഴി വ്യക്തികൾക്ക് പണമയക്കാം
- യുപിഐ ഐഡിയും ക്യുആർ കോഡും സ്കാൻ ചെയ്ത് വ്യാപാരികൾക്ക് പണമടയ്ക്കാം
- അക്കൗണ്ട് മാനേജ്മെന്റ്, ബാലൻസ് പരിശോധന, ഇടപാടുകളുടെ വിവരങ്ങൾ എന്നിവ അറിയാം
- ഇംഗ്ലീഷിനും 12 ഇന്ത്യൻ ഭാഷകൾക്കും പിന്തുണ നൽകുന്ന വോയ്സ് അടിസ്ഥാനമാക്കിയുള്ള എഐ ഹെൽപ്പ്ലൈൻ
രജിസ്ട്രേഷൻ നടപടികൾ: ഫോണിലുള്ള ഫോൺപേ ആപ്പ് തുറന്ന് നിബന്ധനകൾ അംഗീകരിക്കുക. തുടർന്ന് ബാങ്ക് തിരഞ്ഞെടുത്ത് ഡെബിറ്റ് കാർഡ് വിവരങ്ങൾ നൽകി യുപിഐ പിൻ സെറ്റ് ചെയ്താൽ ഉടൻ തന്നെ പണമിടപാടുകൾ തുടങ്ങാം.
