പേരാവൂർ: സംസ്ഥാന സ്‌പോർട്‌സ് കൗൺസിൽ ടെക്‌നിക്കൽ കമ്മിറ്റിയുടെ നേതൃത്വത്തിൽ ജില്ലാ ചെസ് ഓർഗനൈസിങ്ങ് കമ്മിറ്റി നടത്തുന്ന കണ്ണൂർ ജില്ലാ വിമൻസ് സെലക്ഷൻ ചെസ് ചാമ്പ്യൻഷിപ്പ് മെയ് ഒന്നിന് നടക്കും. രാവിലെ പത്തിന് കണ്ണൂർ കൃഷ്ണ മേനോൻ മെമ്മോറിയൽ ഗവ. വിമൻസ് കോളേജിലാണ് മത്സരം. ജില്ലാ നിവാസികളായ വനിതകൾക്ക് (പെൺകുട്ടികൾക്കും മുതിർന്നവർക്കും) പങ്കെടുക്കാം. ആദ്യ നാല് സ്ഥാനം നേടുന്നവർ സംസ്ഥാന ചാമ്പ്യൻഷിപ്പിലേക്ക് യോഗ്യത നേടും. ഫോൺ : 9846879986, 9447804811, 9388775570.

പേരാവൂർ : സ്റ്റേഷൻ പരിധിയിലെ മൂന്ന് ബൂത്തുകളിൽ വോട്ടെടുപ്പ് പൂർത്തിയായത് രാത്രിയോടെ. വായന്നൂർ എൽ.പി സ്‌കൂളിലെ 156-ആം നമ്പർ ബൂത്തിൽ രാത്രി ഒൻപതോടെയാണ് വോട്ടെടുപ്പ് പൂർത്തിയായത്. ഇവിടെ വൈകിട്ട് ആറിന് ശേഷം ക്യൂ നിന്ന 288 പേർക്ക് ടോക്കൺ നല്കിയിരുന്നു.

നമ്പിയോട് വായനശാലയിലെ 126-ആം നമ്പർ ബൂത്തിൽ ആറ് മണിക്ക് 250 പേർക്കാണ് ടോക്കൺ നല്കിയത്. ഇവിടെ രാത്രി 8.10 ഓടെ വോട്ടെടുപ്പ് പൂർത്തിയായി. മുരിങ്ങോടി കൈരളി വായനശാലയിലെ 125-ആം നമ്പർബൂത്തിൽ ആറിന് ശേഷം 64 പേർക്ക് ടോക്കൺ നല്കുകയും ഏഴു മണിയോടെ വോട്ടെടുപ്പ് പൂർത്തിയാക്കുകയും ചെയ്തു.

പേരാവൂർ സ്റ്റേഷൻ പരിധിയിൽ നിരവധി പ്രശ്‌ന ബാധിത ബൂത്തുകളും മാവോവാദി ഭീഷണിയുള്ള ബൂത്തുകളും ഉണ്ടായിരുന്നെങ്കിലും യാതൊരു അനിഷ്ട സംഭവങ്ങളും ഉണ്ടായില്ല. ഡി.വൈ.എസ്.പി അഷറഫ് തെങ്ങലക്കണ്ടിയുടെ നേതൃത്വത്തിൽ ശക്തമായ സുരക്ഷാ സംവിധാനമാണ് പേരാവൂർ മേഖലയിൽ ഏർപ്പെടുത്തിയിരുന്നത്.

പേരാവൂർ: പി.ഡിപി പിന്തുണക്കുന്ന എൽ.ഡി.എഫ് സ്ഥാനാർഥി എം.വി. ജയരാജന്റെ വിജയത്തിന് വേണ്ടി മുഴുവൻ പാർട്ടി പ്രവർത്തകരും അനുഭാവികളും രംഗത്തിറങ്ങണമെന്നും വൻ ഭൂരിപക്ഷത്തിൽ വിജയം ഉറപ്പാക്കണമെന്നും പി.ഡി.പി ജില്ലാ സെക്രട്ടറിയേറ്റ് ആവശ്യപ്പെട്ടു. വെറുപ്പിന്റെ രാഷ്ട്രീയം പ്രധാനമന്ത്രി നരേന്ദ്രമോദിയിൽ മാത്രമല്ല അതിന്റെ ഫാസിസ്റ്റ് ജീർണത കേരളത്തിൽ യു.ഡി.എഫിനെയും ബാധിച്ചിരിക്കുന്നു എന്നതിന്റെ ഒടുവിലത്തെ ഉദാഹരണമാണ് പച്ചക്കൊടിയിൻ മേൽ കാണുന്ന കോൺഗ്രസിന്റെ ഹാലിളക്കമെന്ന് പി.ഡി.പി.ആരോപിച്ചു.

അത് സാരമായി ബാധിച്ചിരിക്കുന്നത് യൂത്ത് ലീഗിനെയാണ്. അവരുടെ അമർഷം കൃത്യമായി ബാലറ്റിലൂടെ പ്രതിഷേധിക്കാനുള്ള അവസരമാണ്. അത് വോട്ടായി വിനിയോഗിക്കുവാൻ ആത്മാർത്ഥത അവശേഷിക്കുന്ന കണ്ണൂർ ലോകസഭാ മണ്ഡലത്തിലെ യൂത്ത് ലീഗ് അണികൾ തയ്യാറാവണമെന്നും പി.ഡി.പി ജില്ലാ സെക്രട്ടറിയേറ്റ് ആവശ്യപ്പെട്ടു.

ജില്ലാ കൺവീനർ മജീദ് പറമ്പായി, ജോ. കൺവീനർ സിദ്ദിഖ് വലിയകത്ത്, മുസ്തഫ പേരാവൂർ, ഷാജഹാൻ കീഴ്പള്ളി, അബ്ദുൽ ഗഫൂർ മാട്ടൂൽ, നൂറുദ്ദീൻ, സുബൈർ പുഞ്ചവയൽ, അബ്ദുൽ റാഷിദ്, ഹബീബ് തങ്ങൾ തുടങ്ങിയവർ സംസാരിച്ചു.