ഇരിട്ടി:ലോക്‌സഭ തിരഞ്ഞെടുപ്പ് നടക്കുന്നതിനാൽ 26-ന് ഇരിട്ടി സബ് റീജൻ ട്രാൻസ്‌പോർട് ഓഫിസിൽ നടത്താനിരുന്ന ലേണേഴ്‌സ് ലൈസൻസ് പരീക്ഷ 29-ന് ഉച്ചക്ക് രണ്ടിലേക്ക് മാറ്റിയതായി ഇരിട്ടി ജോയിന്റ് ആർടിഒ അറിയിച്ചു. ഫോൺ: 0490 2490001

ഇരിട്ടി: മേഖലയിലെ ടൂറിസം സാധ്യതയുള്ള പ്രദേശങ്ങളെ കോർത്തിണക്കി നടപ്പിലാക്കാൻ ഉദ്ദേശിക്കുന്ന പദ്ധതികളെക്കുറിച്ച് ഇരിട്ടി നഗര സഭയുടെയും ഹരിതകേരളാ മിഷന്റെയും നേതൃത്വത്തിൽ ഏപ്രിൽ 30ന് എടക്കാനം വ്യൂ പോയൻ്റിൽ ശില്പശാല സംഘടിപ്പിക്കും. മാധ്യമങ്ങളിൽ ഇതുസംബന്ധിച്ച് വന്ന വാർത്തകളുടെ അടിസ്ഥാനത്തിൽ ഹരിത കേരളാ മിഷന്റെ നേതൃത്വത്തിൽ ഈ പ്രദേശങ്ങളിൽ സന്ദർശനവും പഠനവും നടത്തിയിരുന്നു.

ഇതിന്റെ അടിസ്ഥാനത്തിലാണ് ഇരിട്ടി നഗരസഭയുടെയും ഹരിത കേരള മിഷൻ്റെയും നേതൃത്വത്തിൽ ശില്പശാല സംഘടിപ്പിക്കുവാൻ തീരുമാനിച്ചത്. പഴശ്ശി പദ്ധതി ജലാശയത്തിന്റെ ദൃശ്യഭംഗിയും കുളിരും നുകരാൻ നിരവധി ജനങ്ങൾ നിത്യവും എത്തിച്ചേരുന്ന എടക്കാനം വ്യൂ പോയിന്റിലാണ് ശില്പശാല നടക്കുക. ഇരിട്ടി, നേരമ്പോക്ക്, വള്ളിയാട്, അകം തുരുത്ത്, എടക്കാനം വ്യൂ പോയിൻറ് തുടങ്ങി നിരവധി പ്രദേശങ്ങൾ കോർത്തിണക്കി മേഖലയെ ജില്ലയിലെ ടൂറിസം ഹബ്ബാക്കി മാറ്റാൻ കഴിയും. ജനപ്രതിനിധികളും, മറ്റ് സാമൂഹിക സാംസ്കാരിക സംഘടനയുടെ ഉൾപ്പെടെയുള്ളവരുടെ പ്രതിനിധികൾ ശില്പശാലയിൽ പങ്കെടുക്കും.

മട്ടന്നൂർ: കൂട്ടുപുഴ ചെക്ക്‌പോസ്റ്റിൽ എക്‌സൈസ് പരിശോധനയ്ക്കിടെ നിർത്താതെ പോയ കാറിൽ നിന്ന് 20 ഗ്രാം കഞ്ചാവും അഞ്ച് ഗ്രാം എം.ഡി.എം.എയും പിടിച്ചു. കോഴിക്കോട് അരീക്കോട് സ്വദേശി ഫിറോസ് ഖാനിൽ(31) നിന്നാണ് ഇവ പിടികൂടിയത്. കൂട്ടുപുഴയിൽ നിന്ന് നിർത്താതെ പോയ കാർ മട്ടന്നൂർ കരേറ്റയിൽ വെച്ചാണ് എക്‌സൈസ് സംഘം പിന്തുടർന്ന് തടഞ്ഞ് ഇയാളെ കസ്റ്റഡിയിലെടുത്തത്. അമിതവേഗതയിൽ ഓടിച്ച കാർ വഴിയിൽ നിരവധി വാഹനങ്ങളിൽ ഇടിച്ച് അപകടമുണ്ടാക്കി.

തിങ്കളാഴ്ച രാവിലെ 11.30-ഓടെയാണ് ബംഗളൂരുവിൽ നിന്ന് വന്ന കാർ കൂട്ടുപുഴ ചെക്ക് പോസ്റ്റിലെത്തിയത്. വാഹനപരിശോധനയ്ക്കിടെ എക്‌സൈസ് ഉദ്യോഗസ്ഥരെ കബളിപ്പിച്ച് ലഹരിയിലായിരുന്ന ഇയാൾ കാറുമായി കടന്നുകളയുകയായിരുന്നു. ഇരിട്ടി എക്‌സൈസ് സംഘത്തെ വിവരമറിയിച്ചതിനെ തുടർന്ന് ഇരിട്ടി ടൗണിന് സമീപം കാർ തടയാൻ ശ്രമിച്ചെങ്കിലും ഇയാൾ കാറുമായി കടന്നുകളഞ്ഞു.

തുടർന്ന് മട്ടന്നൂരിലെ എക്‌സൈസ് ഉദ്യോഗസ്ഥരെയും അറിയിക്കുകയും കരേറ്റയിൽ വെച്ച് കാർ നിർത്തി ഓടി രക്ഷപ്പെടാൻ ശ്രമിച്ച ഫിറോസിനെ പിന്തുടർന്ന് പിടിക്കുകയുമായിരുന്നു.

കൂട്ടുപുഴയിൽ നിന്ന് ഡോർ പോലും അടയ്ക്കാതെ അമിതവേഗതയിൽ വന്ന കാർ വഴിയിൽ നിരവധി വാഹനങ്ങളിൽ ഇടിച്ചു. ഈ വാഹനങ്ങളിലുള്ളവരും ഇയാളെ പിന്തുടർന്ന് എത്തിയിരുന്നു.
മുമ്പ് വയനാട് ചെക്ക്‌പോസ്റ്റിൽ വെച്ച് എം.ഡി.എം.എ. പിടികൂടിയ കേസിലും ഇയാൾ പ്രതിയാണ്. ഈ കേസിൽ ജാമ്യത്തിലിറങ്ങിയാണ് വീണ്ടും ലഹരിക്കടത്ത് നടത്തിയത്.

ഇരിട്ടി എക്‌സൈസ് ഇൻസ്‌പെക്ടർ അജീഷ് ലബ്ബ, എക്‌സൈസ് ഉദ്യോഗസ്ഥരായ കെ.ഉത്തമൻ, സി.പി.ഷാജി, സി.ഒ.ഷാജൻ, സി.വി.റിജുൻ, ഷൈബി കുര്യൻ, വി.ശ്രീനിവാസൻ, രമീഷ്, ഡ്രൈവർമാരായ കെ.ടി.ജോർജ്, കേശവൻ എന്നിവരടങ്ങിയ സംഘമാണ് ഇയാളെ പിടികൂടിയത്.