ട്രെയിൻ ടിക്കറ്റിൽ ‘AB’ എന്ന് കണ്ടിട്ടുണ്ടോ? റെയിൽവേയുടെ ഈ കോച്ചിന് പിന്നിൽ ഒരു ട്വിസ്റ്റുണ്ട്!

ഡൽഹി: ലോകത്തിലെ ഏറ്റവും വലിയ റെയിൽവെ ശൃംഖലകളിലൊന്നാണ് ഇന്ത്യൻ റെയിൽവേ. ദിവസവും ദശലക്ഷക്കണക്കിനാളുകൾ രാജ്യത്തുടനീളമുള്ള ട്രെയിനുകളിൽ യാത്ര ചെയ്യുന്നു. ജനറൽ, സ്ലീപ്പർ, ചെയർ കാർ, സെക്കൻഡ് സിറ്റിങ്, 3AC, 2AC, 1AC എന്നിങ്ങനെ വിവിധ കോച്ചുകൾ ഒരു ട്രെയിനിലുണ്ടാകും.

ഓരോ കോച്ചും ഒരു പ്രത്യേക കോഡ് ഉപയോഗിച്ചാണ് തിരിച്ചറിയുന്നത്. ‘എസ്’ എന്നാൽ സ്ലീപ്പറാണെന്നും, ‘ബി’ എന്നാൽ തേർഡ് എസി (3AC)ആണെന്നും ‘എ’ എന്നാൽ സെക്കൻഡ് എസി (2AC)യെയുമാണ് സൂചിപ്പിക്കുന്നതെന്ന് മിക്ക യാത്രക്കാർക്കും അറിയാം. എന്നാൽ ഒരു കോഡ് പലപ്പോഴും യാത്രക്കാരെ ആശയക്കുഴപ്പത്തിലാക്കുന്നു. ‘AB’. എന്താണ് ഇത് സൂചിപ്പിക്കുന്നത്. ആർക്കൊക്കെ അതിൽ യാത്ര ചെയ്യാം?

എന്താണ് ‘എ ബി’ കോച്ച്?

നിങ്ങളുടെ ടിക്കറ്റിൽ ‘എ ബി’ എന്നാണ് കോച്ച് നമ്പർ എങ്കിൽ അതൊരു ‘കംപോസിറ്റ് കോച്ച്’ ആണ്. അതായത് ഒരു പകുതി സെക്കൻഡ് ക്ലാസ് എസിയും (2AC) മറുപകുതി തേർഡ് ക്ലാസ് എസിയും (3AC) അടങ്ങുന്ന ഒരൊറ്റ കോച്ചാണിത്.

സാധാരണയായി ഒരു ട്രെയിനിൽ 2AC അല്ലെങ്കിൽ 3AC യാത്രക്കാർക്കായി മുഴുവൻ കോച്ചുകളും മാറ്റിവെക്കാറുണ്ട്. എന്നാൽ ചില റൂട്ടുകളിൽ ഏതെങ്കിലും ഒരു ക്ലാസിലേക്ക് മാത്രമായി ഒരു മുഴുവൻ കോച്ച് അനുവദിക്കാനുള്ള യാത്രക്കാർ ഉണ്ടാകാറില്ല. അത്തരം സാഹചര്യങ്ങളിൽ സീറ്റുകൾ പാഴാകാതിരിക്കാൻ റെയിൽവേ രണ്ട് ക്ലാസുകളെയും ഒരൊറ്റ കോച്ചിലേക്ക് ചുരുക്കുന്നു. ഇതിനെയാണ് ‘AB’ കോച്ച് എന്ന് വിളിക്കുന്നത്.

യാത്രക്കാർ പലപ്പോഴും ആശയക്കുഴപ്പത്തിലാകാനുള്ള ഒരു കാരണം, എബി കോച്ചിന്‍റെ രണ്ട് സെക്ഷനുകളിലും ഒരേ സീറ്റ് നമ്പർ പ്രത്യക്ഷപ്പെടാം എന്നതാണ്. ഉദാഹരണത്തിന്, 2AC, 3AC വിഭാഗങ്ങളിൽ സീറ്റ് നമ്പർ 3 ഉണ്ടാകാം. ഒരു ബർത്ത് എടുക്കുന്നതിന് മുമ്പ് നിങ്ങളുടെ ടിക്കറ്റ് സെക്കൻഡ് എസി വിഭാഗത്തിലേക്കോ തേർഡ് എസി വിഭാഗത്തിലേക്കോ ആണോ എന്ന് എപ്പോഴും പരിശോധിക്കുക.

നിങ്ങളുടെ ടിക്കറ്റിൽ ‘AB’ കോച്ചാണ് ഉള്ളതെങ്കിൽ, നിങ്ങളുടെ സീറ്റ് ഏത് സെക്ഷനിലാണെന്ന് കണ്ടെത്താൻ വളരെ ലളിതമായ ചില മാര്‍ഗങ്ങളുണ്ട്. നിങ്ങളുടെ ടിക്കറ്റ് 3AC വിഭാഗത്തിലാണെങ്കിൽ, ആ കമ്പാർട്ട്മെന്‍റിൽ മിഡിൽ ബർത്തുകൾ ഉണ്ടായിരിക്കും. നിങ്ങൾ 2ACയിലാണ് യാത്ര ചെയ്യുന്നതെങ്കിൽ, അവിടെ മിഡിൽ ബർത്തുകൾ ഉണ്ടാകില്ല; മറിച്ച് അപ്പർ, ലോവർ ബർത്തുകൾ മാത്രമേ ഉണ്ടായിരിക്കുകയുള്ളൂ. മറ്റൊരു മാര്‍ഗം കര്‍ട്ടനുകളാണ്. മിക്ക ട്രെയിനുകളിലും, 2AC കമ്പാർട്ടുമെന്റുകളിൽ കർട്ടനുകൾ ഉണ്ടായിരിക്കും, അതേസമയം 3AC കോച്ചുകളിൽ ഈ കര്‍ട്ടനുകൾ ഉണ്ടാകില്ല.

കോച്ചിന്റെ പകുതി ഭാഗത്ത് ഈ രണ്ട് സെക്ഷനുകളെയും വേർതിരിക്കുന്ന ഒരു വാതിലോ കർട്ടനോ ഉണ്ടായിരിക്കും. നിങ്ങളുടെ ടിക്കറ്റ് ഏത് ക്ലാസിലാണോ, ആ വശത്തുള്ള സീറ്റ് നമ്പറിലാണ് നിങ്ങൾ ഇരിക്കേണ്ടത്. കയറിയതിനുശേഷവും നിങ്ങൾക്ക് ഉറപ്പില്ലെങ്കിൽ, യാത്രയ്ക്കിടെ ആശയക്കുഴപ്പം ഒഴിവാക്കാൻ ടിടിഇയുടെ സഹായം തേടാം.