ഫ്രീയായി യാത്ര ചെയ്യണമെങ്കിൽ ബസ് വേണ്ടേ? കെ.എസ്.ആർ.ടി.സി സൗജന്യയാത്ര മലബാർ മേഖലയ്ക്ക് ഗുണം ചെയ്യില്ല

കോട്ടയം: സ്ത്രീകൾക്ക് കെ.എസ്.ആർ.ടി.സി.യിൽ സൗജന്യയാത്ര ഏർപ്പെടുത്തുമ്പോൾ മലബാർ മേഖലയ്ക്ക് വേണ്ടത്ര ഗുണം കിട്ടില്ലെന്ന് ആശങ്ക. അവിടെ കെ.എസ്.ആർ.ടി.സി. ബസുകൾ തിരുവിതാംകൂർ, കൊച്ചി മേഖലകളെ അപേക്ഷിച്ച് വളരെ കുറവാണ്.

വീട്ടുജോലിക്കാർ, ദിവസവേതന തൊഴിലാളികൾ, വിദ്യാർഥികൾ, പ്രായമായവർ, അസംഘടിതമേഖലയിൽ ജോലിചെയ്യുന്നവർ എന്നിവരെല്ലാം സൗജന്യയാത്രാപദ്ധതിയെ വലിയ പ്രതീക്ഷയോടെയാണ് കാണുന്നത്. യാത്രക്കാരുടെ എണ്ണം കൂടുന്നതിനനുസരിച്ച് ബസില്ലാതെവന്നാൽ പ്രതിഷേധത്തിന് ഇടയാക്കും. അതേസമയം, സൗജന്യയാത്ര യാഥാർഥ്യമായാൽ സ്ത്രീകൾക്ക് കൂടുതൽ ദൂരെപോയി തൊഴിലെടുക്കാൻ കഴിയുമെന്നത് സാമൂഹിക-സാമ്പത്തിക നേട്ടവുമുണ്ടാക്കും.

ജില്ലകളിലെ ബസുകളുടെ എണ്ണം

• കാസർകോട് (151), കണ്ണൂർ(233), വയനാട് (244), കോഴിക്കോട് (230), മലപ്പുറം (154), പാലക്കാട് (206) എന്നിങ്ങനെയാണ് വടക്കൻ ജില്ലകളിലെ കെ.എസ്.ആർ.ടി.സി. ബസ് എണ്ണം.

• മധ്യകേരളത്തിൽ മലബാറിനെ അപേക്ഷിച്ച് എണ്ണം മെച്ചമാണ്. എറണാകുളത്താണ് (460) ഈ മേഖലയിൽ കൂടുതൽ ബസ്. തൃശ്ശൂർ (263), ഇടുക്കി (221), കോട്ടയം (381) എന്നിങ്ങനെയാണ് മറ്റ് ജില്ലകളിലെ സ്ഥിതി.

• തെക്കൻ മേഖലയിലാണ് കോർപ്പറേഷന് ഏറ്റവും കൂടുതൽ ബസുള്ളത്. തിരുവനന്തപുരത്ത് (920). കൊല്ലം (556), പത്തനംതിട്ട (239), ആലപ്പുഴ (351) എന്നിങ്ങനെയാണിത്.

• സംസ്ഥാനത്ത് ആകെയുള്ള 11936 സ്വകാര്യ ബസിൽ ഭൂരിഭാഗവും മലബാർ, കൊച്ചി മേഖലകളിലാണ്. എറണാകുളം (1403), തൃശ്ശൂർ (1444), പാലക്കാട് (1203), മലപ്പുറം (1493), കോഴിക്കോട് (1414), കണ്ണൂർ (1210) എന്നിങ്ങനെയാണിത്.

• എല്ലാ സ്ത്രീകൾക്കും സൗജന്യയാത്ര എന്നത് മാറ്റി, സർക്കാർ തിരിച്ചറിയൽ കാർഡിന്റെ അടിസ്ഥാനത്തിൽ നിശ്ചിത വരുമാനമുള്ളവർക്ക് മാത്രമായി പരിമിതപ്പെടുത്തണമെന്ന് ഡിജോ കാപ്പൻ സെന്റർ ഫോർ കൺസ്യൂമർ എജുക്കേഷൻ ആവശ്യപ്പെടുന്നുണ്ട്.