കണ്ണൂർ: ക്രൈസ്തവ യുവതികളുടെ പേരുപറഞ്ഞ് വർഗീയതയ്ക്ക് ആരും ശ്രമിക്കേണ്ടെന്ന് തലശ്ശേരി ബിഷപ്പ് മാർ ജോസഫ് പാംപ്ലാനി. പ്രണയക്കെണിയുടെ പേര് പറഞ്ഞ് വർഗീയതയുടെ വിഷം ചീറ്റാൻ അനുവദിക്കരുതെന്നും അദ്ദേഹം പറഞ്ഞു. കണ്ണൂർ ചെമ്പേരിയിൽ നടന്ന കെ.സി.വൈ.എമ്മിന്റെ യുവജന സംഗമത്തിൽ പങ്കെടുത്ത് സംസാരിക്കവെയാണ് മാർ ജോസഫ് പാംപ്ലാനിയുടെ പരാമർശം.

കേരള സ്റ്റോറി പ്രദർശനവുമായി ബന്ധപ്പെട്ട് ഉയർന്ന് വന്ന വിവാദങ്ങളുടെ പശ്ചാത്തലത്തിലാണ് അദ്ദേഹത്തിന്റെ പ്രതികരണം. സ്വയം പ്രഖ്യാപിത സംരക്ഷകരാകാൻ ആരും ശ്രമിക്കേണ്ടെന്നും അദ്ദേഹം കൂട്ടിച്ചേർത്തു.

യുവതികളെ അഭിസംബോധന ചെയ്തുകൊണ്ടായിരുന്നു മാർ ജോസഫ് പാംപ്ലാനിയുടെ പ്രസംഗം. നിങ്ങൾ ആത്മാഭിമാനമുള്ള മക്കളാണെന്നും തലശ്ശേരിയിലെ ഒരു പെൺകുട്ടിയെപ്പോലും ആർക്കും ചതിയിലോ പ്രണയക്കുരുക്കിലോ പെടുത്താനാകില്ലെന്നും അദ്ദേഹം പറഞ്ഞു.

ഇവിടുത്തെ യുവജനങ്ങൾ പ്രബുദ്ധരാണ്. നമ്മുടെ പെൺമക്കളുടെ പേരുപറഞ്ഞ് വർഗീയ ശക്തികൾ വിഷം വിതയ്ക്കാൻ പരിശ്രമിക്കേണ്ടതില്ല. നമ്മുടെ പെൺകുട്ടിയെ സംരക്ഷിക്കാൻ നമ്മുടെ സമുദായത്തിന് അറിയാമെന്നും മാർ ജോസഫ് പാംപ്ലാനി പറഞ്ഞു.

കണ്ണൂർ:യു.ജി.സിയുടെ ജൂണിലെ നെറ്റ് പരീക്ഷക്ക് തയ്യാർ എടുക്കുന്നവർക്ക് കണ്ണൂർ യൂണിവേഴ്‌സിറ്റി എംപ്ലോയ്‌മെന്റ് ഇൻഫർമേഷൻ & ഗൈഡൻസ് ബ്യൂറോയുടെ നേതൃത്വത്തിൽ പരിശീലനം സംഘടിപ്പിക്കുന്നു.

ജനറൽ പേപ്പറിനായി മേയ് മാസം തുടങ്ങുന്ന 15 ദിവസത്തെ പരിശീലനത്തിന് ആദ്യം രജിസ്റ്റർ ചെയ്യുന്ന 35 പേർക്ക് പ്രവേശനം.

സർവകലാശാലയുടെ എംപ്ലോയ്‌മെന്റ് ഇൻഫർമേഷൻ ആൻഡ് ഗൈഡൻസ് ബ്യൂറോയിൽ നേരിട്ട് ഹാജരായി പേര് രജിസ്റ്റർ ചെയ്യണം. ഫോൺ: 04972 703130.

കണ്ണൂർ: കോഴ്‌സുകൾ മറ്റു സർവകലാശാലകളിലേക്ക് മാറ്റിയാതറിയാതെ അവയുടെ പഠനബോർഡുകൾ വീണ്ടും രൂപവത്കരിച്ച് കണ്ണൂർ സർവകലാശാല. ആരോഗ്യസർവകലാശാലയിലേക്കും സാങ്കേതിക സർവകലാശാലയിലേക്കും മാറ്റിയ കോഴ്‌സുകളുമായി ബന്ധപ്പെട്ട പഠനബോർഡുകളാണ് രൂപവത്കരിച്ചത്.മോഡേൺ മെഡിസിൻ, ഡന്റിസ്ട്രി, ഫാർമസി, ഹെൽത്ത് സയൻസ്, ആയുർവേദം, എൻജിനിയറിങ് വിഭാഗങ്ങളിലായി 14 പഠനബോർഡുകളാണ് നിലവിലുള്ളത്.

കേരള ആരോഗ്യ സർവകലാശാല 2010-ൽ നിലവിൽ വന്നതോടെ മറ്റ് സർവകലാശാലകൾക്ക്‌ കീഴിലുണ്ടായിരുന്ന മെഡിക്കൽ, പാരാമെഡിക്കൽ കോളേജുകളെല്ലാം അതിന്‌ കീഴിലായി. 2014-ലാണ് സാങ്കേതികസർവകലാശാല നിലവിൽ വന്നത്. അതോടെ എൻജിനിയറിങ് കോഴ്‌സുകൾ അങ്ങോട്ടേക്കും മാറ്റി. മോഡേൺ മെഡിസിൻ വിഭാഗത്തിൽ ആറും ഹെൽത്ത് സയൻസിൽ രണ്ടും ആയുർവേദത്തിൽ മൂന്നും പഠനബോർഡുകളാണുള്ളത്. ഫാർമസി, ഡന്റിസ്ട്രി, എൻജിനിയറിങ് വിഭാഗങ്ങളിൽ ഓരോന്നും.

സപ്ലിമെന്ററി പരീക്ഷകൾ നടത്താനും തുല്യതാ സർട്ടിഫിക്കറ്റുകൾ അനുവദിക്കാനും പഠനബോർഡുകൾ ആവശ്യമുള്ളതിനാലാണ് ഇവ വീണ്ടും രൂപവത്കരിച്ചതെന്നാണ് സർവകലാശാലയുടെ വിശദീകരണം. മാറ്റിയ പല കോഴ്‌സുകളുടെയും സപ്ലിമെന്ററി പരീക്ഷകൾ നടത്താതായിട്ട് വർഷങ്ങളായി. സപ്ലിമെന്ററി പരീക്ഷ നടത്താനുള്ള ചുമതല പരീക്ഷാബോർഡിനുള്ളപ്പോഴാണ് ഇതിനുവേണ്ടി പഠനബോർഡ് നിലനിർത്തുന്നതെന്നത് വിചിത്രവാദമാണെന്ന ആക്ഷേപമുണ്ട്.