തപാൽ വകുപ്പിൽ 23,757 ഗ്രാമീൺ ഡാക് സേവക്; കേരള സർക്കിളിൽ 1,373 ഒഴിവ്

തപാൽ വകുപ്പിൽ ഗ്രാമീൺ ഡാക് സേവക് (ജിഡിഎസ്) തസ്തികയിലേക്ക് വിജ്ഞാപനം പ്രസിദ്ധീകരിച്ചു. പത്താം ക്ലാസ് പാസായവർക്ക് അപേക്ഷിക്കാം. രാജ്യത്തെ വിവിധ പോസ്റ്റൽ സർക്കിളുകളിലായി 23,757 ഒഴിവുകളാണുള്ളത്. ഇതിൽ 1,373 ഒഴിവുകൾ കേരള സർക്കിളിലാണ്.

ബ്രാഞ്ച് പോസ്റ്റ്മാസ്റ്റർ, അസിസ്റ്റന്റ് ബ്രാഞ്ച് പോസ്റ്റ്മാസ്റ്റർ/ഡാക് സേവക് തസ്തികകളിലാണ് ഒഴിവുകൾ. ഓരോ സർക്കിളിലും ഡിവിഷനുകൾ തിരിച്ചാണ് ഒഴിവുകൾ വിജ്ഞാപനം ചെയ്തിരിക്കുന്നത്.

പ്രായപരിധി

അപേക്ഷകർക്ക് 18 മുതൽ 40 വയസ് വരെയാണ് പ്രായപരിധി. സംവരണ വിഭാഗങ്ങൾക്ക് ചട്ടപ്രകാരമുള്ള ഇളവ് ലഭിക്കും.

എസ്സി./എസ്ടി വിഭാഗം – അഞ്ച് വർഷം

ഒബിസി. വിഭാഗം – മൂന്ന് വർഷം

ഭിന്നശേഷിക്കാർ – 10 വർഷം വരെ

പ്രായം കണക്കാക്കുന്നത് വിജ്ഞാപനത്തിൽ വ്യക്തമാക്കിയിരിക്കുന്ന തീയതി അടിസ്ഥാനമാക്കിയായിരിക്കും.

വിദ്യാഭ്യാസ യോഗ്യത

അംഗീകൃത സ്കൂൾ വിദ്യാഭ്യാസ ബോർഡിൽനിന്ന് പത്താം ക്ലാസ് പാസായിരിക്കണം. പത്താം ക്ലാസിൽ ഗണിതവും ഇംഗ്ലീഷും വിഷയങ്ങളായി പഠിച്ചിരിക്കണം.

അപേക്ഷകർ അപേക്ഷിക്കുന്ന പോസ്റ്റൽ സർക്കിളിലെ പ്രാദേശിക ഭാഷ അറിയുന്നവരായിരിക്കണം. കേരള സർക്കിളിലേക്ക് അപേക്ഷിക്കുന്നവർക്ക് പ്രാദേശിക ഭാഷ മലയാളമാണ്.

കമ്പ്യൂട്ടർ പരിജ്ഞാനം ഉണ്ടായിരിക്കണം. സൈക്കിൾ ഓടിക്കാൻ അറിയുകയും വേണം. കൂടാതെ ബന്ധപ്പെട്ട വിജ്ഞാപനത്തിലെ മറ്റ് യോഗ്യതകളും പാലിക്കണം.

ശമ്പളം

ബ്രാഞ്ച് പോസ്റ്റ്മാസ്റ്റർ തസ്തികയ്ക്ക് ₹12,000 മുതൽ ₹29,380 വരെ ടിആർസിഎയും അനുബന്ധ അലവൻസുകളും ലഭിക്കും. അസിസ്റ്റന്റ് ബ്രാഞ്ച് പോസ്റ്റ്മാസ്റ്റർ/ഡാക് സേവക് തസ്തികയ്ക്ക് ₹10,000 മുതൽ ₹24,470 വരെ ടിആർസിഎയും അനുബന്ധ അലവൻസുകളും ലഭിക്കും.

നിയമനത്തിന് തിരഞ്ഞെടുക്കപ്പെടുന്നവർക്ക് പോസ്റ്റ് ഓഫീസ് പ്രവർത്തിക്കുന്ന ഗ്രാമത്തിൽ താമസിക്കുന്നതിനുള്ള വ്യവസ്ഥകളും ബാധകമാണ്. ബ്രാഞ്ച് പോസ്റ്റ്മാസ്റ്ററായി തിരഞ്ഞെടുക്കപ്പെടുന്നവർക്ക് ഓഫീസ് പ്രവർത്തിക്കുന്ന സ്ഥലത്ത് താമസിക്കേണ്ടതുണ്ട്.

തെരഞ്ഞെടുപ്പ്

പത്താം ക്ലാസിലെ മാർക്കിന്റെ അടിസ്ഥാനത്തിലാണ് തെരഞ്ഞെടുപ്പ്. അപേക്ഷകരുടെ മെറിറ്റ് അടിസ്ഥാനത്തിൽ ഷോർട്ട്‌ലിസ്റ്റ് തയ്യാറാക്കും. തെരഞ്ഞെടുക്കപ്പെടുന്നവരുടെ പട്ടിക തപാൽ വകുപ്പിന്റെ ഔദ്യോഗിക പോർട്ടലിൽ പ്രസിദ്ധീകരിക്കും.

അപേക്ഷാഫീസ്

എസ്സി., എസ്ടി, വനിതകൾ, ഭിന്നശേഷിക്കാർ തുടങ്ങിയ വിഭാഗങ്ങൾക്ക് അപേക്ഷാഫീസ് ബാധകമല്ല. മറ്റ് അപേക്ഷകർ ₹100 അപേക്ഷാഫീസ് ഓൺലൈനായി അടയ്ക്കണം. അപേക്ഷിക്കുന്നതിന് മുമ്പ് വൺ ടൈം രജിസ്ട്രേഷൻ പൂർത്തിയാക്കണം. മൊബൈൽ നമ്പറും ഇ-മെയിൽ ഐഡിയും ഉപയോഗിച്ചാണ് രജിസ്ട്രേഷൻ. അപേക്ഷയോടൊപ്പം ഒപ്പും പുതിയ ഫോട്ടോയും JPG/JPEG ഫോർമാറ്റിൽ അപ്‌ലോഡ് ചെയ്യണം.

പ്രധാന തീയതികൾ

ഓൺലൈൻ വൺ ടൈം രജിസ്ട്രേഷൻ 31.08.2026 മുതൽ 19.09.2026 വൈകിട്ട് 5 വരെ

ഓൺലൈൻ അപേക്ഷയും ഫീസ് അടയ്ക്കലും 02.09.2026 മുതൽ 21.09.2026 വൈകിട്ട് 5 വരെ

അപേക്ഷയിലെ തിരുത്തലുകൾ / കൂട്ടിച്ചേർക്കലുകൾ 23.09.2026 മുതൽ 24.09.2026 വൈകിട്ട് 5 വരെ

അപേക്ഷിക്കേണ്ട അവസാന തീയതി: 21 സെപ്റ്റംബർ 2026 വൈകിട്ട് 5 മണി.

കൂടുതൽ വിവരങ്ങൾക്കും ഓൺലൈൻ അപേക്ഷയ്ക്കുമായി ഇന്ത്യൻ തപാൽ വകുപ്പിന്റെ ഔദ്യോഗിക വെബ്സൈറ്റ് സന്ദർശിക്കാം: indiapost.gov.in