പ്ലാസ്റ്റിക് പാത്രങ്ങൾ എപ്പോൾ മാറ്റണം? ഈ കാര്യങ്ങൾ ശ്രദ്ധിക്കൂ, രോഗങ്ങളെ അകറ്റി നിർത്താം!
പ്ലാസ്റ്റിക് പാത്രങ്ങൾ ഉപയോഗിക്കാത്ത അടുക്കളയുണ്ടോ? മിക്കവാറും എല്ലാ അടുക്കളകളിലും ഭക്ഷണം സൂക്ഷിക്കാനായി പ്ലാസ്റ്റിക് പാത്രങ്ങൾ ഉപയോഗിക്കാറുണ്ട്. വിലക്കുറവ്, ഭാരക്കുറവ്, ഫ്രിജിൽ സാധനങ്ങൾ അടുക്കിവയ്ക്കാനുള്ള സൗകര്യം എന്നീ കാരണങ്ങൾ മൂലം ഇന്ത്യൻ അടുക്കളയിൽ ഇത്തരം പാത്രങ്ങൾക്ക് നല്ല പ്രചാരമുണ്ട്. എന്നാൽ കാലക്രമേണ പ്ലാസ്റ്റിക് പാത്രങ്ങൾക്ക് കേടുപാടുകൾ സംഭവിക്കുകയോ, ദുർഗന്ധത്തിന് കാരണമാകുകയോ, ഒടുവിൽ ഭക്ഷണം സൂക്ഷിക്കാൻ സുരക്ഷിതമല്ലാത്ത അവസ്ഥയിലെത്തുകയോ ചെയ്തേക്കാം. അതായത് ഈ പാത്രങ്ങൾക്ക് കൃത്യമായ ആയുസ് ഉണ്ട്. പ്ലാസ്റ്റിക് പാത്രങ്ങൾ ഉപയോഗിക്കുന്നതിനും സമയപരിമിതിയുണ്ടെന്ന് അറിഞ്ഞ് അത്ഭുതപ്പെടേണ്ട. ഇവ ഒഴിവാക്കിയില്ലെങ്കിൽ അത് ബാധിക്കാൻ പോവുന്നത് നിങ്ങളുടെ ആരോഗ്യത്തെ തന്നെയാണ്. പ്ലാസ്റ്റിക് പാത്രങ്ങൾ ഒഴിവാക്കേണ്ട ഉചിതമായ സമയം എപ്പോഴാണ്? അറിയാം വിശദമായി…
അഞ്ചുവർഷമെന്ന കാലാവധി
തുടർച്ചയായ ഉപയോഗവും ചൂടുമായുള്ള സമ്പർക്കവും കാരണം കാലക്രമേണ പ്ലാസ്റ്റിക്കിന്റെ ഗുണനിലവാരം കുറയുന്നതിന് കാരണമാകുന്നു. പഴക്കം ചെന്ന പാത്രങ്ങളിൽ ചെറിയ പോറലുകൾ ഉണ്ടായേക്കാം;.ഇവ ബാക്ടീരിയകൾ വളരാൻ അനുകൂലമായ സാഹചര്യമൊരുക്കുന്നു. ഭക്ഷണസാധനങ്ങൾ സൂക്ഷിക്കുന്ന നിങ്ങളുടെ പ്ലാസ്റ്റിക് പാത്രങ്ങൾക്ക് അഞ്ച് വർഷത്തിലധികം പഴക്കമുണ്ടെങ്കിൽ, അവയിൽ എന്തെങ്കിലും കേടുപാടുകളുണ്ടോ എന്ന് പരിശോധിക്കുന്നത് നല്ലതാണ്. കാഴ്ചയിൽ കുഴപ്പമില്ലെന്ന് തോന്നിയാലും, പുതിയ പാത്രങ്ങളിലേക്ക് മാറുന്നതാണ് ഏറ്റവും ഉചിതം.
ബിപിഎ രഹിതം
ബിപിഎ രഹിതമല്ലാത്ത പഴയ തരം പ്ലാസ്റ്റിക് കൊണ്ടാണ് നിങ്ങളുടെ പാത്രങ്ങൾ നിർമ്മിച്ചിരിക്കുന്നതെങ്കിൽ അവ ഒഴിവാക്കുന്നതാണ് നല്ലത്. ചിലതരം പ്ലാസ്റ്റിക്കുകളിൽ അടങ്ങിയിരിക്കുന്ന ‘ബിസ്ഫെനോൾ-എ’ (BPA) എന്ന രാസവസ്തു ചൂടാക്കുമ്പോൾ ഭക്ഷണത്തിലേക്ക് കലരാൻ സാധ്യതയുണ്ട്. പാത്രത്തിന്റെ അടിഭാഗത്തുള്ള റീസൈക്ലിംഗ് കോഡ് പരിശോധിക്കുക, അതിൽ ഉൽപ്പന്നം ബിപിഎ രഹിതമാണോ അല്ലയോ എന്ന് സൂചിപ്പിച്ചിട്ടുണ്ടാകാം. ഇപ്പോൾ ഇറങ്ങുന്ന പല പാത്രങ്ങളിലും ബിപിഎ രഹിതം (BPA-free) എന്ന് രേഖപ്പെടുത്തിയിട്ടുണ്ടാകും.
നിങ്ങളുടെ പ്ലാസ്റ്റിക് പാത്രം വളഞ്ഞോ രൂപം മാറിയോ കാണപ്പെടുന്നുണ്ടെങ്കിൽ, അതിൽ വിള്ളലുകൾ ഉണ്ടെങ്കിൽ, അല്ലെങ്കിൽ അത് ശരിയായി അടയ്ക്കാൻ കഴിയുന്നില്ലെങ്കിൽ ഒഴിവാക്കേണ്ട സമയമായി എന്നാണ് അർത്ഥം. മൈക്രോവേവ് പോലുള്ളവയിൽ നിന്നും തുടർച്ചയായി ചൂടേൽക്കുമ്പോൾ പ്ലാസ്റ്റിക് പാത്രങ്ങൾ പലപ്പോഴും വളയുകയോ രൂപം മാറുകയോ ചെയ്യാറുണ്ട്. ഇത് മൂലം വിള്ളലുകളിലും വളവുകളിലും ബാക്ടീരിയകൾ അടിഞ്ഞുകൂടാൻ സാധ്യതയുള്ളതിനാൽ അവ ശരിയായി വൃത്തിയാക്കാൻ പ്രയാസമായിരിക്കും. കൂടാതെ, കേടുപാടുകൾ സംഭവിച്ച പാത്രത്തിൽ നിന്ന് ഭക്ഷണം ചോരുന്നതിനാൽ ഭക്ഷണം കേടുകൂടാതെ സൂക്ഷിക്കാൻ കഴിയാതെ വന്നേക്കാം.
സൂചന നൽകും കറകൾ
ചില പ്ലാസ്റ്റിക് പാത്രങ്ങളിൽ മുൻപ് സൂക്ഷിച്ചിരുന്ന ഭക്ഷണത്തിന്റെ നിറവും ഗന്ധവും ഉണ്ടാവാറുണ്ട്. കറിയുടെ ഗന്ധം പാത്രത്തിൽ സ്ഥിരമായി തങ്ങിനിൽക്കുകയോ മസാല അടങ്ങിയ വിഭവങ്ങൾ കാരണം ഓറഞ്ച് നിറത്തിലുള്ള കറ പറ്റിപ്പിടിച്ചിരിക്കുകയോ ചെയ്യുന്നുണ്ടെങ്കിൽ, കാലക്രമേണ പ്ലാസ്റ്റിക് ഭക്ഷണത്തിന്റെ അംശങ്ങൾ ആഗിരണം ചെയ്തു എന്നാണ് അതിനർത്ഥം. കറകൾ ഉള്ളതുകൊണ്ട് മാത്രം പാത്രം സുരക്ഷിതമല്ലെന്ന് പറയാനാകില്ലെങ്കിലും, ഗന്ധവും നിറവ്യത്യാസവും നിലനിൽക്കുന്നത് പ്ലാസ്റ്റിക് നശിച്ചുതുടങ്ങി എന്നതിന്റെ സൂചനയാണ്.
