അന്ന് 1000 രൂപയ്ക്ക് സ്വർണം വാങ്ങിയിരുന്നെങ്കില് ഇന്ന് 17 ലക്ഷം രൂപയ്ക്ക് വില്ക്കാമായിരുന്നു;വിലയുടെ ചരിത്രം
റെക്കോർഡ് നിരക്കില് നിന്നും താഴേക്ക് വന്നെങ്കിലും സംസ്ഥാനത്ത ഉയർന്ന നിലയില് തന്നെയാണ് കഴിഞ്ഞ കുറച്ച് ആഴ്ചകളായി സ്വർണവില മുന്നോട്ട് പോകുന്നത്. സ്വാതന്ത്രദിനമായ ഇന്നും സ്വർണവിലയില് വർധനവുണ്ടായി. ഗ്രാമിന് 65 രൂപയാണ് ഇന്ന് കൂടിയത്. 14,220 രൂപയാണ് വിപണിവില. ഒരു പവന് 520 രൂപ വർധിച്ച് 1,13,760 രൂപയുമായി. എന്നാല് നിങ്ങള് എപ്പോഴെങ്കിലും ആലോചിച്ചുണ്ടോ ഇന്ത്യ സ്വാതന്ത്ര്യം നേടിയ 1947-ൽ ഒരു പവന് സ്വർണത്തിന്റെ വില എത്രയായിരിക്കുമെന്ന്.
1947 ല് രാജ്യത്ത് ഒരു ഗ്രാം സ്വർണത്തിന്റെ വില 8.86 രൂപമാത്രമായിരുന്നു. അതായത് പവന് 70 രൂപയോളം. പ്രസ് ഇൻഫർമേഷൻ ബ്യൂറോയുടെയും റിസർവ് ബാങ്കിന്റെയും കണക്കുകൾ പ്രകാരം 1947-ൽ 88.62 രൂപയായിരുന്ന 10 ഗ്രാം സ്വർണവില 2026 ഓഗസ്റ്റ് 14-ഓടെ 1,51,594.68 രൂപയായി ഉയർന്നു. അതായത് സ്വാതന്ത്ര്യലബ്ധിക്കു ശേഷമുള്ള 79 വർഷങ്ങൾക്കിടയിൽ സ്വർണവിലയിൽ ഉണ്ടായത് ഏകദേശം 1,711 മടങ്ങിന്റെ വളർച്ചയാണ്.
1947-ൽ ഒരാൾ 1,000 രൂപയ്ക്ക് സ്വർണം വാങ്ങിയിരുന്നെങ്കില് ഇന്നതിന്റെ മൂല്യം ഏകദേശം 17.1 ലക്ഷം രൂപയായി മാറുമായിരുന്നു പ്രതിവർഷം ശരാശരി 9.9 ശതമാനം നിരക്കിലാണ് സ്വർണവില ഉയർന്നത്. എന്നാൽ സ്വർണവിലയുടെ ഈ വളർച്ച എല്ലായ്പ്പോഴും ഒരേ നിരക്കിലായിരുന്നില്ല. 1950-ൽ 10 ഗ്രാമിന് 99.18 രൂപയായിരുന്ന വില 1964 ആയപ്പോഴേക്കും 63.25 രൂപയായി ഇടിഞ്ഞിരുന്നു. പിന്നീട് ഘട്ടംഘട്ടമായി ഉയർന്ന വില 1970-ൽ 184.50 രൂപയിലും 1980-ൽ 1,330 രൂപയിലുമെത്തി.
2000-01 സാമ്പത്തിക വർഷത്തിൽ ശരാശരി 4,473.60 രൂപയായിരുന്ന സ്വർണം 2010-11-ൽ 19,227.08 രൂപയിലേക്കും 2020-21-ൽ 48,723.22 രൂപയിലേക്കും കുതിച്ചു. 2024-25-ൽ ശരാശരി 75,841.87 രൂപയിലെത്തിയ ശേഷമാണ് 2026-ൽ ഒന്നര ലക്ഷം രൂപയെന്ന ചരിത്രനേട്ടം കൈവരിച്ചത്.
1970-71 കാലഘട്ടത്തിൽ ഒരു കിലോഗ്രാം വെള്ളിക്ക് ശരാശരി 536.08 രൂപയായിരുന്നു വിലയെങ്കിൽ, 2026 ഓഗസ്റ്റിൽ ഇത് 1,98,461 രൂപയിലെത്തി. അതായത് ഏകദേശം 370 മടങ്ങിന്റെ വർധന. 1984-85 മുതലുള്ള കാലയളവ് പരിശോധിച്ചാൽ വെള്ളിയെക്കാൾ മികച്ച നേട്ടം നൽകിയത് സ്വർണമാണ്. ഇക്കാലയളവിൽ സ്വർണം 76 മടങ്ങ് വർധിച്ചപ്പോൾ വെള്ളിക്ക് 55 മടങ്ങിന്റെ വളർച്ചയാണ് ഉണ്ടായത്. ദീർഘകാലാടിസ്ഥാനത്തിൽ സ്വർണവും വെള്ളിയും മികച്ച നേട്ടം നൽകിയിട്ടുണ്ടെങ്കിലും, പല വർഷങ്ങളിലും വിലയിടിവും ചാഞ്ചാട്ടങ്ങളും ഉണ്ടായിരുന്നുവെന്നും ഈ ചരിത്രവില സൂചികകൾ ഓർമ്മിപ്പിക്കുന്നു.
