നടൻ അജിത്കുമാറിന്റെ അമ്മ മോഹിനി മണി അന്തരിച്ചു, ആദരാഞ്ജലികളർപ്പിച്ച് സിനിമാലോകം
തമിഴ് സൂപ്പർതാരം അജിത്കുമാറിന്റെ അമ്മ മോഹിനി മണി (85) അന്തരിച്ചു. ശനിയാഴ്ച രാവിലെ ചെന്നൈയിൽ വെച്ചായിരുന്നു അന്ത്യം. വാർദ്ധക്യസഹജമായ അസുഖങ്ങളെത്തുടർന്ന് അവർ കുറച്ചുനാളായി ചികിത്സയിലായിരുന്നുവെന്നാണ് റിപ്പോർട്ടുകൾ സൂചിപ്പിക്കുന്നത്. തമിഴ് സിനിമാ ലോകവും ആരാധകരും അതീവ ദുഃഖത്തോടെയാണ് ഈ വാർത്തയെ സ്വീകരിച്ചത്. തമിഴിലെ വിവിധ മാധ്യമങ്ങൾ ഈ വാർത്ത സ്ഥിരീകരിച്ചിട്ടുണ്ട്.
കൃത്യം മൂന്ന് വർഷം മുമ്പ് ഇതേ പ്രായത്തിൽ (85 വയസ്സ്)ത്തന്നെയാണ് അജിത്കുമാറിന്റെ അച്ഛൻ പി. സുബ്രഹ്മണ്യവും അന്തരിച്ചത്. 2023 മാർച്ച് 24-നായിരുന്നു അജിത്തിന്റെ പിതാവ് അന്തരിച്ചത്. മോഹിനി മണിയുടെ വേർപാടിൽ പ്രമുഖ രാഷ്ട്രീയ നേതാക്കളും സിനിമാ താരങ്ങളും അനുശോചനം രേഖപ്പെടുത്തി. നടൻ കമൽഹാസൻ, ഡി.എം.കെ അധ്യക്ഷനും തമിഴ്നാട് മുൻ മുഖ്യമന്ത്രിയുമായ എം.കെ. സ്റ്റാലിൻ, ബി.ജെ.പി നേതാവ് കെ. അണ്ണാമലൈ തുടങ്ങിയവർ അജിത് കുമാറിനെയും കുടുംബത്തെയും ആശ്വസിപ്പിച്ചു.
അജിത്തിന്റെ ജീവിതത്തിലെ വലിയൊരു താങ്ങായിരുന്നു അദ്ദേഹത്തിന്റെ അമ്മ. സിനിമയിലെ വലിയ ഉയരങ്ങൾ അജിത് കീഴടക്കുന്നത് കണ്ട് സന്തോഷിച്ച വ്യക്തിയായിരുന്നു അവരെന്ന് എം.കെ. സ്റ്റാലിൻ തന്റെ അനുശോചന സന്ദേശത്തിൽ അനുസ്മരിച്ചു.
നിലവിൽ ദുബായിൽ കാർ റേസിംഗുമായി ബന്ധപ്പെട്ട തിരക്കുകളിലായിരുന്ന അജിത് കുമാർ അമ്മയുടെ അവസാന ചടങ്ങുകളിൽ പങ്കെടുക്കുന്നതിനായി ഉടൻ തന്നെ ചെന്നൈയിലേക്ക് തിരിക്കുമെന്നാണ് റിപ്പോർട്ടുകൾ.
ചെന്നൈ പാലവാക്കത്തുള്ള താരത്തിന്റെ വസതിയിലാണ് സംസ്കാര ചടങ്ങുകൾ നടക്കുകയെന്നും വിവരങ്ങളുണ്ട്. സിനിമാ തിരക്കുകൾക്ക് ഇടയിലും കുടുംബത്തിന് വലിയ പ്രാധാന്യം നൽകുന്ന താരം തന്റെ റേസിംഗ് ടീമായ ‘അജിത് കുമാർ റേസിംഗിന്റെ’ ഭാഗമായി വിവിധ രാജ്യങ്ങളിൽ മത്സരിച്ചു വരികയായിരുന്നു.
