നവരാത്രി; കുതിച്ചുയർന്ന് വാഹന വിൽപ്പന, ഒരു മിനിട്ടിൽ 80 വാഹനങ്ങൾ
ഒമ്പത് ദിവസത്തെ നവരാത്രി കാലയളവിൽ കുതിച്ചുയർന്ന് ഇന്ത്യയിലെ വാഹന വിൽപ്പന. ആകെ 10.32 ലക്ഷം യൂണിറ്റുകളുടെ വിൽപ്പനയാണ് രേഖപ്പെടുത്തിയത്. ഒരു മിനിറ്റിൽ ഏകദേശം 80 വാഹനങ്ങൾക്കോ അല്ലെങ്കിൽ പ്രതിദിനം 1.15 ലക്ഷത്തോളം വാഹനങ്ങൾക്കോ തുല്യമായ വിൽപ്പനയാണ് വിപണിയിൽ ദൃശ്യമായത്.
ഫെഡറേഷൻ ഓഫ് ഓട്ടോമൊബൈൽ ഡീലേഴ്‌സ് അസോസിയേഷൻ (FADA) പുറത്തുവിട്ട കണക്കുകൾ പ്രകാരം കഴിഞ്ഞ വർഷത്തെ അപേക്ഷിച്ച് ഈ കാലയളവിൽ വാഹന വിൽപ്പന 1.95 ശതമാനമാണ് വർധിച്ചത്. ജി.എസ്.ടി 2.0-നെത്തുടർന്ന് ദൃശ്യമായ വിലക്കുറവ് പ്രയോജനപ്പെടുത്താൻ ജനങ്ങൾ ഷോറൂമുകളിലേക്ക് ഇരച്ചെത്തിയ 2025-ലെ നവരാത്രി കാലയളവിൽ 10.12 ലക്ഷം യൂണിറ്റുകളാണ് വിറ്റഴിക്കപ്പെട്ടത്. ഇതാണ് 10.32 ലക്ഷം യൂണിറ്റുകളായി വർധിച്ചത്.
പാസഞ്ചർ വാഹനങ്ങളുടെ വിൽപ്പനയിൽ ഇടിവുണ്ടായെങ്കിലും മൊത്തത്തിൽ വളർച്ച രേഖപ്പെടുത്താനായി. കാറുകളുടെയും SUVകളുടെയും വിഭാഗത്തിലുണ്ടായ കുറവ് മറ്റ് വിഭാഗങ്ങൾ മറികടന്നു. ഇരുചക്ര വാഹനങ്ങളുടെ വിൽപ്പന മുൻവർഷത്തെ അപേക്ഷിച്ച് 5.78 ശതമാനം വർധിച്ച് 7.60 ലക്ഷം യൂണിറ്റിലെത്തി. ഈ കാലയളവിലെ മൊത്തം വാഹന വിൽപ്പനയുടെ ഏകദേശം മുക്കാൽ ഭാഗവും ഇരുചക്ര വാഹനങ്ങളായിരുന്നു.
വാണിജ്യ വാഹനങ്ങളുടെ വിൽപ്പന 14.21 ശതമാനം വർധിച്ച് 34,120 യൂണിറ്റായപ്പോൾ, ട്രാക്ടറുകളുടെ വിൽപ്പന 8.87 ശതമാനം വർധിച്ച് 20,912 യൂണിറ്റായി. നിർമ്മാണ ഉപകരണങ്ങളുടെ വിൽപ്പന 10.86 ശതമാനം ഉയർന്ന് 2,185 യൂണിറ്റിലെത്തി. എന്നാൽ, മൂന്ന് ചക്ര വാഹനങ്ങളുടെ വിൽപ്പന 1.65 ശതമാനം കുറഞ്ഞ് 43,057 യൂണിറ്റായി.
