വടകര പള്ളിയില് ഇരുവിഭാഗങ്ങള് തമ്മില് ചേരിതിരിഞ്ഞ് സംഘര്ഷം; പൊലീസ് ലാത്തി വീശി
കോഴിക്കോട്: വടകര പള്ളിയില് ഇരുവിഭാഗങ്ങള് തമ്മില് ചേരിതിരിഞ്ഞ് സംഘര്ഷം. വടകര കണ്ണൂക്കര മാടാക്കരയിലാണ് സംഭവം. പൊലീസ് ലാത്തി വീശി. ഇന്നലെ രാത്രിയോടെയാണ് സംഭവം നടന്നത്. മഹല്ല് കമ്മിറ്റിയെ അനുകൂലിക്കുന്നവരും എതിര്ക്കുന്നവരും തമ്മിലാണ് സംഘര്ഷമുണ്ടായത്. വര്ഷങ്ങളായി പള്ളിയുമായി ബന്ധപെട്ട് പ്രശ്നങ്ങള് നിലനില്ക്കുന്നുണ്ടായിരുന്നു.
അടുത്തിടെ പാണക്കാട് വെച്ച് നടത്തിയ ചര്ച്ചയില് നിലവിലെ ഖത്തീബ് വെള്ളിയാഴ്ച്ച ജുമ നമസ്കാരത്തിന് നേതൃത്വം നല്കാന് തീരുമാനിച്ചിരുന്നു. ഇതിനിടെ ഇന്നലെ നബിദിനവുമായി ബന്ധപെട്ട് നിലവിലെ ഖത്തീബിന്റെ നേതൃത്വത്തില് മൗലീദ് പാരായണം നടത്തിയെന്നാരോപിച്ച് ഔദ്യോഗിക മഹല്ല് കമ്മിറ്റിക്കെതിരെ എതിര് വിഭാഗം സംഘടിക്കുകയും വാക്കേറ്റ മുണ്ടാവുകയും സംഘര്ഷത്തില് കലാശിക്കുകയുമായിരുന്നു.
ഇന്നലെ ഉച്ച മുതല് സംഘര്ഷ സാധ്യത ഉള്ളതിനാല് ചോമ്പാല പൊലീസ് സ്റ്റേഷനില് ഭാരവാഹികള് ഉള്പ്പെടെയുള്ളവരെ വിളിച്ച് വരുത്തി ചര്ച്ച നടത്തിയിരുന്നു. രാത്രിയോടെ പ്രശ്നം വഷളായതിനെ തുടര്ന്ന് മഹല്ല് കമ്മിറ്റി ചോമ്പാല പൊലീസില് വിവരം അറിയ്ക്കുകയും പള്ളിക്കുള്ളില് കയറി ലാത്തി വീശുകയുമായിരുന്നു. പള്ളിക്കകത്ത് പൊലീസിനെ കയറ്റിയതിനെതിരെ വിമത പക്ഷം രംഗത്തെത്തിയിട്ടുണ്ട്.
