തനിച്ചിരിക്കുമ്പോൾ സ്വയം സംസാരിക്കുന്ന ശീലമുണ്ടോ? എങ്കിലിതാ സന്തോഷവാർത്ത; നിങ്ങൾക്ക് ഈ കഴിവുകളുണ്ട്!
തനിച്ചിരിക്കുമ്പോൾ സ്വയം സംസാരിക്കുന്ന ആളുകളെ കാണുമ്പോൾ പലർക്കും അത്ഭുതമോ ആശങ്കയോ തോന്നാറുണ്ട്. ഇതൊരു മാനസിക പ്രശ്നമാണോ, ശ്രദ്ധക്കുറവാണോ, അതോ ഏകാന്തതയുടെ ലക്ഷണമാണോ എന്നൊക്കെ ചിന്തിക്കുന്നവരുണ്ട്. എന്നാൽ, മനഃശാസ്ത്ര പഠനങ്ങൾ പറയുന്നത് സ്വയം സംസാരിക്കുന്നത് തികച്ചും സ്വാഭാവികമാണെന്നും അത് മാനസികാരോഗ്യത്തിന് ഏറെ ഗുണം ചെയ്യുമെന്നുമാണ്. ചിന്തകളെയും വികാരങ്ങളെയും നിയന്ത്രിക്കാൻ സഹായിക്കുന്ന മികച്ചൊരു ‘കോഗ്നിറ്റീവ് ടൂൾ’ ആയാണ് മനഃശാസ്ത്രജ്ഞർ ഇതിനെ വിലയിരുത്തുന്നത്.
1. ചിന്തകളെ ചിട്ടപ്പെടുത്താനുള്ള ഉപാധി
മനഃശാസ്ത്രത്തിൽ ഇതിനെ ‘സെൽഫ്-ടോക്ക്’ എന്നാണ് വിളിക്കുന്നത്. ആശയവിനിമയത്തിലെ ഒരു പോരായ്മയല്ല ഇത്, മറിച്ച് ഇതൊരുതരം ‘വാക്കുകളിലൂടെയുള്ള ചിന്ത’ (Verbal thinking) ആണ്. കുട്ടികൾ പുതിയ കാര്യങ്ങൾ പഠിക്കുമ്പോൾ സ്വയം സംസാരിക്കുന്നത് സാധാരണമാണ്, പലരിലും ഈ ശീലം മുതിർന്നാലും തുടരും. “വാക്കുകൾ നമ്മുടെ മനസ്സിലെ ആശയങ്ങളെ ഉത്തേജിപ്പിക്കാനും സ്ഥിരപ്പെടുത്താനും സഹായിക്കുന്നു” എന്നാണ് പ്രമുഖ മനഃശാസ്ത്രജ്ഞനായ ഡോ. ഗാരി ലുപ്യാൻ വ്യക്തമാക്കുന്നത്. മനസ്സിലുള്ള കാര്യങ്ങൾ ഉറക്കെ പറയുന്നത് വ്യക്തമായ തീരുമാനങ്ങൾ എടുക്കാനും ലക്ഷ്യങ്ങളിൽ കൂടുതൽ ശ്രദ്ധ കേന്ദ്രീകരിക്കാനും സഹായിക്കും.
2. ഏകാഗ്രതയും പ്രവർത്തനക്ഷമതയും വർധിപ്പിക്കുന്നു
‘ജേണൽ ഓഫ് എക്സ്പിരിമെന്റൽ സൈക്കോളജിയിൽ’ പ്രസിദ്ധീകരിച്ച പഠനമനുസരിച്ച്, ഒരു വസ്തു തിരയുമ്പോൾ അതിന്റെ പേര് ഉറക്കെ പറഞ്ഞു കൊണ്ടിരിക്കുന്നത് അത് വേഗത്തിൽ കണ്ടെത്താൻ സഹായിക്കുമെന്ന് തെളിയിക്കപ്പെട്ടിട്ടുണ്ട്. ചെയ്യുന്ന കാര്യങ്ങൾ സ്വയം പറയുമ്പോൾ തലച്ചോറിൽ ആ ജോലിയെക്കുറിച്ച് വ്യക്തമായ രൂപം ഉണ്ടാവുകയും ശ്രദ്ധ തിരിഞ്ഞുപോകാതിരിക്കുകയും ചെയ്യും. പ്രശ്നപരിഹാരം, പഠനം തുടങ്ങിയ സന്ദർഭങ്ങളിൽ ഇത് ഏറെ ഗുണകരമാണ്.
3. മാനസിക സമ്മർദം കുറയ്ക്കുന്നു
കടുത്ത മാനസിക സമ്മർദം നേരിടുന്ന ഘട്ടങ്ങളിൽ വികാരങ്ങളെ നിയന്ത്രിക്കാൻ സെൽഫ്-ടോക്ക് വലിയ പങ്കുവഹിക്കുന്നു. മിഷിഗൺ സർവകലാശാലയിലെ ഡോ. ഏഥൻ ക്രോസിന്റെ പഠനമനുസരിച്ച്, സ്വന്തം പേരെടുത്ത് വിളിച്ചോ അല്ലെങ്കിൽ ‘നിനക്കിത് സാധിക്കും’ എന്ന രീതിയിലോ സ്വയം സംസാരിക്കുന്നത് പ്രശ്നങ്ങളെ മാനസികമായി കുറച്ചുകൂടി നിഷ്പക്ഷമായി കാണാൻ നമ്മെ സഹായിക്കും. വെല്ലുവിളികൾ നിറഞ്ഞ സാഹചര്യങ്ങളെ ശാന്തമായി നേരിടാൻ പലരും അറിയാതെ തന്നെ സ്വയം സംസാരിക്കുന്നത് ഇതുകൊണ്ടാണ്. വികാരങ്ങൾ വാക്കുകളിലൂടെ പുറത്തുവരുമ്പോൾ അവയുടെ തീവ്രത കുറയുന്നു.
4. സ്വയം വിലയിരുത്താനുള്ള കഴിവ്
സ്വയം സംസാരിക്കുന്നവരിൽ ‘മെറ്റാകോഗ്നിഷൻ’ (Metacognition) അഥവാ സ്വന്തം ചിന്തകളെയും പ്രവൃത്തികളെയും കുറിച്ച് സ്വയം വിലയിരുത്താനുള്ള കഴിവ് കൂടുതലായിരിക്കും. തെറ്റുകൾ മനസ്സിലാക്കാനും ഭാവി പരിപാടികൾ ആസൂത്രണം ചെയ്യാനും തന്ത്രങ്ങൾ മാറ്റിപ്പണിയാനും ഈ കഴിവ് സഹായിക്കും. കാര്യങ്ങൾ ഉറക്കെ പറയുമ്പോൾ ഉള്ളിലെ ചിന്തകളെ കൂടുതൽ വ്യക്തമായി നിരീക്ഷിക്കാൻ സാധിക്കും.
5. സർഗാത്മകത വർധിപ്പിക്കുന്നു
എഴുത്തുകാർ, ഡിസൈനർമാർ തുടങ്ങിയ സർഗാത്മക മേഖലകളിൽ പ്രവർത്തിക്കുന്നവരിൽ സ്വയം സംസാരിക്കുന്ന ശീലം കൂടുതലായി കാണപ്പെടാറുണ്ട്. മനസ്സിലെ അവ്യക്തമായ ചിന്തകളെ കൃത്യമായ രൂപത്തിലേക്ക് കൊണ്ടുവരാൻ ഇത് സഹായിക്കും. വ്യത്യസ്തമായ കോണുകളിലൂടെ ചിന്തിക്കാനും പുതിയ ആശയങ്ങൾ കണ്ടെത്താനും ഈ ശീലം പ്രേരണ നൽകും.
എപ്പോഴാണ് ഇതൊരു പ്രശ്നമാകുന്നത്?
സ്വയം സംസാരിക്കുന്നത് പൊതുവെ ആരോഗ്യകരമാണെങ്കിലും, നാം നമ്മോട് തന്നെ സംസാരിക്കുന്ന രീതിയും പറയുന്ന കാര്യങ്ങളും പ്രധാനമാണ്. സ്വയം പ്രചോദനം നൽകുന്ന വാക്കുകൾ ഗുണം ചെയ്യുമെങ്കിലും, നിരന്തരം സ്വയം കുറ്റപ്പെടുത്തുന്ന രീതിയിലുള്ള സംസാരം ഉത്കണ്ഠയ്ക്കും ആത്മവിശ്വാസക്കുറവിനും കാരണമാകും. കൂടാതെ, മറ്റാരുടെയും സാന്നിധ്യമില്ലാതെ അനാവശ്യ ശബ്ദങ്ങൾ കേൾക്കുകയോ (Auditory Hallucinations) അതിനോട് പ്രതികരിച്ചു സംസാരിക്കുകയോ ചെയ്യുന്ന അവസ്ഥയാണെങ്കിൽ വിദഗ്ധസഹായം തേടേണ്ടതാണ്.
