വൈറ്റ് കോളര് ലഹരി പാര്ട്ടി; രാസലഹരി കൈമാറിയത് ഗീതു എന്ന യുവതി, കൂടുതല് അറസ്റ്റിലേക്ക് പോലീസ്
കൊച്ചി: കൊച്ചിയില് നടന്ന വൈറ്റ് കോളര് ലഹരി പാര്ട്ടിയില് കൂടുതല് അറസ്റ്റിലേക്ക് നീങ്ങുകയാണ് പോലീസ്. തനിക്ക് ലഹരി വിതരണം ചെയ്തിരുന്നത് തിരുവല്ല സ്വദേശിയായ ഗീതു എന്ന യുവതിയാണെന്ന് കെവിന് ബി. മാത്യു. ബംഗളൂരു-ഡല്ഹി എന്നിവിടങ്ങളിലായിരുന്നു കെവിന്റെ ലഹരി ഇടപാടുകള്.
ബംഗളൂരുവിലുള്ള ഗീതുവും സംഘവുമാണ് തനിക്ക് കെമിക്കല് ഡ്രഗുകള് കൈമാറിയതെന്ന് കെവിന് മൊഴി നല്കി. പ്രതി പിടിയിലാകുന്നതിന് തൊട്ടു മുമ്പ് രണ്ട് ലക്ഷം രൂപയുടെ സാമ്പത്തിക ഇടപാടുകള് ഇരുവരും തമ്മില് നടന്നിട്ടുണ്ട്. ഗീതു ബംഗളൂരുവില് നിന്ന് ലഹരി തൊടുപുഴയില് എത്തിച്ച് നല്കും.
താന് അവിടെയെത്തി ഇത് വാങ്ങും. കൂടുതല് പണമുണ്ടാക്കുന്നതിനാണ് ലഹരി ഇടപാടുകളിലേക്ക് തിരിഞ്ഞതെന്നും കെവിന് മൊഴി നല്കി. കൊച്ചിയിലെ ഡോക്ടര്മാരടക്കം തന്റെ സ്ഥിരം ക്സ്റ്റമേഴ്സ് ആണെന്നും കെവിന് മൊഴി നല്കിയിട്ടുണ്ട്. ബംഗളൂരു ഐഐഎമ്മില് നിന്നും പഠിച്ചിറങ്ങിയ കെവിന് ഒരു ബാങ്കില് ഫിനാന്ഷ്യല് കണ്സല്റ്റന്റ് ആയി ജോലി ചെയ്യുകയായിരുന്നു.
അമ്മയ്ക്കൊപ്പമാണ് കെവിന് താമസിച്ചിരുന്നത്. അമ്മ മരിച്ച ശേഷമാണ് കെവിന് ലഹരിയിലേക്ക് തിരിഞ്ഞതും ഡീലര് ആയി മാറിയതും എന്നാണ് പോലീസ് പറയുന്നത്. കെവിന്റെ സഹായികളായ സിദ്ദിഖ്, ഷമീര് എന്നിവരെ പോലീസ് പിടികൂടിയിരുന്നു.
