നെടുമ്പാശ്ശേരി അപകടമരണം; പ്രതികളെ പോലീസ് കസ്റ്റഡിയിൽ വിട്ടു, ജയിൽവാസം പഠനത്തെ ബാധിക്കുമെന്ന് പ്രതികൾ

നെടുമ്പാശ്ശേരി: നെടുമ്പാശ്ശേരി എയർപോർട്ട് റോഡിൽ കാറിടിച്ച് മൂന്നുപേർ കൊല്ലപ്പെട്ട കേസിലെ പ്രതികളെ അങ്കമാലി കോടതി പോലീസ് കസ്റ്റഡിയിൽ വിട്ടു. കേസ് അന്വേഷിക്കുന്ന പ്രത്യേകസംഘത്തിന്റെ അപേക്ഷ പരിഗണിച്ചാണ് കോടതി ശനിയാഴ്ച വൈകീട്ട് അഞ്ചുവരെ കസ്റ്റഡിൽ വിട്ട് ഉത്തരവായത്. വെള്ളിയാഴ്ച ഉച്ചയോടെയാണ് അങ്കമാലി കോടതി കസ്റ്റഡി അപേക്ഷ പരിഗണിച്ചത്. കാക്കനാട് ബോസ്റ്റൽ സ്‌കൂളിൽ പാർപ്പിച്ചിരിക്കുന്ന നാല് പ്രതികളെയും കോടതിയിൽ ഹാജരാക്കിയിരുന്നു.

ജാമ്യഹർജി ഹൈക്കോടതി ആറിന് പരിഗണിക്കും

കൊച്ചി: നെടുമ്പാശ്ശേരിയിൽ ആഡംബര കാറിടിച്ച് മൂന്നുപേർ മരിച്ച സംഭവത്തിൽ പ്രതികളുടെ ജാമ്യഹർജി ഹൈക്കോടതി നവംബർ ആറിന് പരിണിക്കും. കേസിലെ ഒന്നാംപ്രതി സുഹൈൽ സജീവും (19) മൂന്നാം പ്രതി ജോയൽ എസ്. ആന്റോ (19) യുമാണ് ജാമ്യത്തിനായി കോടതിയെ സമീപിച്ചത്. ഹർജി പരിഗണിച്ച ജസ്റ്റിസ് കൗസർ എടപ്പഗത്ത് സർക്കാരിന്റെ വിശദീകരണം തേടി.

അപകടം നടന്ന ഒക്ടോബർ 11 മുതൽ ജുഡീഷ്യൽ കസ്റ്റഡിയിലാണെന്നും തുടർച്ചയായ ജയിൽവാസം തന്റെ പഠനത്തെ ബാധിക്കുമെന്നും ഉപാധികളോടെ ജാമ്യം അനുവദിക്കണമെന്നുമാവശ്യപ്പെട്ടാണ് കോളജ് വിദ്യാർഥിയായ സുഹൈലിന്റെ ഹർജി. അന്വേഷണവുമായി പൂർണമായി സഹകരിക്കും. സാക്ഷികളെ സ്വാധീനിക്കാനോ തെളിവുകൾ നശിപ്പിക്കാനോ ശ്രമിക്കില്ലെന്നും വ്യക്തമാക്കിയിട്ടുണ്ട്.

വാഹനത്തിന്റെ പിൻസീറ്റിലിരുന്ന താൻ ഡ്രൈവർക്ക് നിർദേശങ്ങൾ നൽകുകയോ അമിതവേഗത്തിൽ പോകാൻ പ്രേരിപ്പിക്കുകയോ ചെയ്തിട്ടില്ലെന്നാണ് ജോയലിന്റെ വാദം. അനാവശ്യമായാണ് തന്നെ പ്രതിചേർത്തത്. മദ്യപിച്ചുവെന്ന ആരോപണം തെളിയിക്കാൻ തന്റെ രക്തപരിശോധന നടത്തിയിട്ടില്ല. പഠനം തടസ്സപ്പെടുന്ന കാര്യം ജോയലിന്റെ ഹർജിയിലും ചൂണ്ടിക്കാട്ടിയിട്ടുണ്ട്.