ലൈഫ് ഭവന പദ്ധതി തുടരും; പിന്നാക്ക വിഭാഗങ്ങൾക്ക് സമാന്തര ഭവന പദ്ധതിയുമായി സർക്കാർ: മുഖ്യമന്ത്രി വി.ഡി. സതീശൻ
തിരുവനന്തപുരം: മുൻ എൽഡിഎഫ് സർക്കാർ ആവിഷ്കരിച്ച ലൈഫ് ഭവന പദ്ധതി തുടർന്നു കൊണ്ടുപോകുമെന്നും, അതിനൊപ്പം പട്ടികജാതി-പട്ടികവർഗ വിഭാഗങ്ങൾക്കായി സമാന്തരമായി പുതിയ ഭവന പദ്ധതി നടപ്പിലാക്കുമെന്നും മുഖ്യമന്ത്രി വി.ഡി. സതീശൻ പ്രഖ്യാപിച്ചു. സംസ്ഥാന പി.എസ്.സി നിയമനങ്ങൾ പൂർണമായി പരിശോധിക്കുമെന്നും അതിൽ എസ്.സി-എസ്.ടി വിഭാഗങ്ങൾക്ക് അർഹമായ പ്രാതിനിധ്യം ഉറപ്പാക്കിയിട്ടില്ലെങ്കിൽ ആവശ്യമായ മാറ്റങ്ങൾ വരുത്തുമെന്നും അദ്ദേഹം വ്യക്തമാക്കി.
ദളിത് ക്രൈസ്തവ വിഭാഗങ്ങളുടെ പ്രശ്നങ്ങൾക്ക് പരിഹാരം കാണുമെന്നും കല്ലുമാല ബഹിഷ്കരണ സമരം പോലുള്ള കേരളീയ നവോത്ഥാന പോരാട്ടങ്ങളുടെ തുടർച്ചയായി നവോത്ഥാന മൂല്യങ്ങൾ ഉയർത്തിപ്പിടിക്കാൻ സർക്കാർ പ്രതിജ്ഞാബദ്ധമാണെന്നും മുഖ്യമന്ത്രി പറഞ്ഞു. മുൻ മുഖ്യമന്ത്രി ഉമ്മൻ ചാണ്ടി സി.എസ്.ഡി.എസിന് അനുവദിച്ച കോളേജ് യാഥാർത്ഥ്യമാക്കുമെന്നും ഇത് അദ്ദേഹത്തോടുള്ള ആദരവാണെന്നും അദ്ദേഹം കൂട്ടിച്ചേർത്തു. സംസ്ഥാന ബജറ്റിലെ തുകക്കുറവ് എസ്.സി-എസ്.ടി ഫണ്ടുകളെ ബാധിക്കില്ലെന്ന് ഉറപ്പുവരുത്തിയിട്ടുണ്ടെന്നും അദ്ദേഹം വ്യക്തമാക്കി.
