വ്യാജ ബയോ ക്യാരിബാഗുകൾ പിടിച്ചു; 10,000 രൂപ പിഴ
മലിനീകരണ നിയന്ത്രണ ബോർഡിന്റെ നിർദേശപ്രകാരമുള്ള ഡൈ ക്ലോറോ മീഥൈൻ ടെസ്റ്റ് തത്സമയം നടത്തി ഉറപ്പുവരുത്തിയാണ് സ്ക്വാഡ് വ്യാജ ഉത്പന്നം തിരിച്ചറിഞ്ഞത്. ഡൈക്ലോറോമീഥൈൻ ലായനിയിൽ ബയോ ക്യാരിബാഗുകൾ പൂർണമായി ലയിക്കുമെങ്കിലും പ്ലാസ്റ്റിക് ലയിക്കില്ല.വടകരയിലെ സ്റ്റാർ നൈലോൺസ് എന്ന സ്ഥാപനത്തിന്റെ ഉടമസ്ഥതയിലുള്ള വാഹനത്തിൽ നിന്നാണ് നിരോധിത വസ്തുക്കൾ പിടിച്ചെടുത്തത്. മുമ്പും ഇതേ ഏജൻസിയുടെ വാഹനങ്ങൾ നിരോധിത പ്ലാസ്റ്റിക് ഉത്പന്നങ്ങളുമായി ജില്ലാ എൻഫോഴ്സ്മെന്റ് സ്ക്വാഡ് പിടിച്ചിട്ടുണ്ട്. മട്ടന്നൂർ, ഇരിട്ടി മേഖലയിൽ വ്യാപാരികൾക്ക് വിതരണംചെയ്യാനാണ് ബാഗുകൾ എത്തിച്ചത്.
മട്ടന്നൂർ നഗരസഭ ആരോഗ്യ വിഭാഗം 10,000 രൂപ പിഴ ഈടാക്കി.പിടിച്ചെടുത്ത ബാഗുകൾ ശാസ്ത്രീയമായി സംസ്കരിക്കുന്നതിന് മട്ടന്നൂർ നഗരസഭ എം.സി.എഫിലേക്ക് മാറ്റി. ജില്ലാ എൻഫോഴ്സ്മെന്റ് സ്ക്വാഡ് അംഗങ്ങളായ കെ.ആർ. അജയകുമാർ, പി.എസ്. പ്രവീൺ, നഗരസഭാ സീനിയർ പബ്ലിക് ഹെൽത്ത് ഇൻസ്പെക്ടർ യു.കെ. സനൽകുമാർ, ഹെൽത്ത് ഇൻസ്പെക്ടർ കെ.എം. പ്രസാദ്, എന്നിവർ പരിശോധനയിൽ പങ്കെടുത്തു.
