കേളകം: യുറോപ്പിലെ മാൾട്ടയിലേക്ക് വിസ വാഗ്ദാനം നൽകി 2, 20,000 രൂപ തട്ടിയെടുത്തുവെന്ന പരാതിയിൽ നാലുപേർക്കെതിരെ വഞ്ചനാകുറ്റത്തിന് പോലീസ് കേസെടുത്തു. കണിച്ചാർ കൊളക്കാട് സ്വദേശി മുണ്ടക്കൽ ഹൗസിൽ വിനിൽ എം.ജോസിൻ്റെ പരാതിയിലാണ് ഏറണാകുളം ചക്കരപ്പറമ്പിലെ ഡ്രീം പാഷനേറ്റ് സ്ഥാപനത്തിലെ ഓഫീസ് സ്റ്റാഫ് കാർത്തിക, മാനേജിംഗ് പാർട്ണർമാരായ റിജുൻ, ദിവിഷാദ്, ഓഫീസ് സ്റ്റാഫ് ദേന എന്നിവർക്കെതിരെ വഞ്ചനാകുറ്റത്തിന് കേസെടുത്തത്.2022 ആഗസ്ത് മുതൽ ഇക്കഴിഞ്ഞ ഒക്ടോബർ മാസം 30നുമിടയിൽ മാൾട്ടയിലേക്ക് വിസ വാഗ്ദാനം നൽകി പരാതിക്കാരനിൽ നിന്നും 2,20,000 കൈപറ്റിയ പ്രതികൾ പിന്നീട് വിസയോ കൊടുത്ത പണമോതിരിച്ചുനൽകാതെ വഞ്ചിച്ചുവെന്ന പരാതിയിലാണ് പോലീസ് കേസെടുത്തത്.

കേളകം: ഇരട്ടത്തോടിൽ പൂട്ടിയിട്ട വീടിന്റെ വാതിൽ തകർത്ത് പണവും വിലയേറിയ വാച്ചും മോഷ്ടിച്ചു.വീട്ടുകാർ വിനോദയാത്രക്ക് പോയപ്പോഴാണ് സംഭവം.ഇരട്ടത്തോടിലെ വരപ്പോത്തുക്കുഴിയിൽ ജോയിയുടെ വീട്ടിലാണ് മോഷണം നടന്നത്.

തിങ്കളാഴ്ചയാണ് വീട്ടുകാർ വിനോദയാത്രക്ക് പോയത്.യാത്ര കഴിഞ്ഞ് വ്യാഴാഴ്ച രാവിലെ എട്ട് മണിയോടെ തിരിച്ചെത്തിയപ്പോഴാണ് മോഷണം നടന്നത് അറിയുന്നത്.

പതിനായിരത്തോളം രൂപയും വിലയേറിയ വാച്ചുമാണ് മോഷ്ടിക്കപ്പെട്ടത്. വീട്ടുടമയുടെ പരാതിയിൽ കേളകം പോലീസ് സ്ഥലത്തെത്തി അന്വേഷണം നടത്തി.വീട്ടുമുറ്റത്തെ സ്‌കൂട്ടറും മോഷ്ടാവ് കേടുവരുത്തിയ നിലയിലാണ്.

പേരാവൂർ : തൊണ്ടിയിൽ സെയ്ൻ്റ് ജോൺസ് യു.പി. സ്കൂളിൽ ത്രിദിന അവധിക്കാല പ്രത്യേക പരിശീലന പരിപാടി ‘ഭാവോത്സവം’ തുടങ്ങി. സാഹിത്യകാരൻ ബാബുരാജ് മലപ്പട്ടം ഉദ്ഘാടനം ചെയ്തു. സ്കൂൾ പ്രഥമാധ്യാപകൻ സോജൻ വർഗീസ് അധ്യക്ഷത വഹിച്ചു. വിനോദ് നടുവത്താനിയിൽ, ഗ്ലോറി റോബിൻ, നീനു ജോസഫ്, ബീന ജോസഫ്, പ്രസാദ് തോമസ് എന്നിവർ സംസാരിച്ചു.

നാടൻ പാട്ട് , കഥ-കവിത രചന, അഭിനയം, നാടൻ കളികൾ, കരകൗശല വസ്തു നിർമാണം, ചിത്രരചന, വാനനിരീക്ഷണം എന്നിവയുടെ പരിശീലനക്കളരിയാണ് ഭാവോത്സവം. കുട്ടികളുടെ വിവിധ കലാപരിപാടികൾ ഉൾപ്പെടുത്തിയിട്ടുള്ള ക്യാമ്പ് ഫയറും ഭാവോത്സവത്തിൻ്റെ ഭാഗമായി നടക്കും. ഷിബു മുത്താട്ട്, ബാബുരാജ് മലപ്പട്ടം, കെ.എം. അമർനാഥ്, ജിജി.പി.നമ്പ്യാർ, വിനോദ്, ജിജോ ജോസഫ്, അനൂപ് സ്കറിയ എന്നിവർ നേതൃത്വം നൽകും.