തലശ്ശേരി: തലശ്ശേരി നഗരസഭ മുൻ ചെയർമാനും തലശ്ശേരി ബാറിലെ സീനിയർ അഭിഭാഷകനുമായിരുന്ന മഞ്ഞോടി വാത്സല്യത്തിൽ കെ. ഗോപാലകൃഷ്ണൻ (85) അന്തരിച്ചു. തലശ്ശേരി സഹകരണ ആസ്പത്രി മുൻ പ്രസിഡന്റായിരുന്നു. ഭാര്യ: വേങ്ങയിൽ വത്സലകുമാരി.

മക്കൾ: വി. രാംമോഹൻ (ഡെപ്യൂട്ടി ജനറൽ മാനേജർ, സൗത്ത് ഇന്ത്യൻ ബാങ്ക്, തൃശ്ശൂർ), വി. രാകേഷ് (ചീഫ് ഓപ്പറേറ്റിങ് ഓഫിസർ, പി.എൻ.ബി പരിബാസ് ലണ്ടൻ). മരുമക്കൾ: കെ.ടി. രൂപ, സോണി.

സഹോദരങ്ങൾ: പരേതരായ കെ. മോഹനൻ നമ്പ്യാർ, മാധവിയമ്മ, അഡ്വ.കെ. ബാലകൃഷ്ണൻ, കെ. ഉണ്ണികൃഷ്ണൻ, കെ. രാമകൃഷ്ണൻ, കെ. ഹരിരാമകൃഷ്ണൻ.

സംസ്കാരം ഞായറാഴ്ച വൈകിട്ട് നാലിന് കണ്ടിക്കൽ നിദ്രാതീരം വാതക ശ്മശാനത്തിൽ.

തലശ്ശേരി : റെയിൽവെ സ്റ്റേഷന് സമീപത്തു നിന്ന് മൊബൈൽ ഫോൺ തട്ടിപ്പറിച്ച സംഭവത്തിൽ മറുനാടൻ തൊഴിലാളിയെ പോലീസ് അറസ്റ്റ് ചെയ്തു. പശ്ചിമ ബംഗാൾ ബനിയാ ബുക്കൽ പാർക്കിലെ മുഹമ്മദ് സമീറിനെയാണ് (23) തലശ്ശേരി പോലീസ് അറസ്റ്റ് ചെയ്തത്.നഗരത്തിലെ കച്ചവടക്കാരനായ അബ്ദുൾ റഹിം നടന്നുപോകുമ്പോൾ പിന്നിൽനിന്ന് തള്ളിയിട്ട് മൊബൈൽ ഫോണും പേഴ്സും തട്ടിപ്പറിച്ചെന്നാണ് പരാതി. റെയിൽവേ സ്റ്റേഷൻ പരിസരത്തുനിന്നാണ് പ്രതിയെ അറസ്റ്റ് ചെയ്തത്.

തലശ്ശേരി : തലശ്ശേരി ടൗണിലേക്ക് യാത്ര ചെയ്യുകയായിരുന്ന യുവതിയെ ഓട്ടോയിൽവെച്ച് മാനഭംഗപ്പെടുത്താൻ ശ്രമം. മാനഭംഗ ശ്രമം എതിർത്ത യുവതിയെ ഓട്ടോറിക്ഷയിൽ നിന്ന് തള്ളിയിട്ട് പരിക്കേൽപ്പിക്കുകയും ചെയ്തു. പ്രതികളായ ഓട്ടോ ഡ്രൈവർ വയലളം നങ്ങാറത്ത് പീടികയിലെ പ്രദീപൻ (60), യാത്രക്കാരനായിരുന്ന ചെമ്പിലോട് സ്വദേശി വിനോദൻ (56) എന്നിവരെ ന്യൂമാഹി എസ്.ഐ അനീഷ് അറസ്റ്റ് ചെയ്തു.

കഴിഞ്ഞ ദിവസം രാത്രി എട്ട് മണിയോടെയായിരുന്നു സംഭവം. കോടിയേരി പാറാൽ സ്വദേശിനിയായ 47 കാരിയാണ് മാനഭംഗത്തിനിരയായത്. ഓട്ടോക്ക് കൈകാണിച്ച് കയറിയ യുവതിയോട് ഓട്ടോയിൽ ഡ്രൈവർക്കൊപ്പമുണ്ടായിരുന്നയാൾ അപമര്യാദയായി പെരുമാറുകയായിരുന്നു. യുവതി എതിർത്തോടെ വഴിയിൽ തള്ളിയിട്ട ശേഷം ഓട്ടോറിക്ഷയുമായി പ്രതികൾ കടന്നുകളഞ്ഞു.

മുഖത്തും ചെവിക്കും മുറിവേറ്റ യുവതി നേരിട്ട് ന്യൂ മാഹി പോലീസ് സ്റ്റേഷനിലെത്തി പരാതി നൽകുകയായിരുന്നു. ന്യൂ മാഹി പോലീസ് രാത്രി തന്നെ അന്വേഷണം ആരംഭിക്കുകയും പ്രതികളെ അറസ്റ്റ് ചെയ്യുകയും ചെയ്തു.