തലശ്ശേരി കോടതിയിലേത് സിക വൈറസ് ബാധ; വൈറോളജി ലാബ് പരിശോധനയില്‍ സ്ഥിരീകരണം
തലശ്ശേരി : തലശ്ശേരി കോടതിയിലെ ജഡ്ജിമാർക്കും ജീവനക്കാർക്കും അഭിഭാഷകർക്കും ഉണ്ടായ ശാരീരിക അസ്വസ്ഥതകൾ സിക വൈറസ് ബാധമൂലമെന്ന് സ്ഥിരീകരണം. ആലപ്പുഴ വൈറോളജി ലാബിലെ പരിശോധനയിലാണ് സിക വൈറസ് ബാധ സ്ഥിരീകരിച്ചത്.
ജില്ലാ കോടതി സമുച്ചയത്തിലെ മൂന്ന് കോടതികളിലെ ജീവനക്കാർക്കും കോടതിയിൽ ഹാജരായ അഭിഭാഷകർക്കും രണ്ട് ജഡ്ജിമാർക്കുമാണ് ശാരീരികപ്രശ്നങ്ങളുണ്ടായത്. നൂറോളം പേർ അസുഖബാധിതമായ സാഹചര്യത്തിൽ മൂന്ന് കോടതികൾ അടച്ചിട്ടിരുന്നു.
ഈഡിസ് വിഭാഗത്തിലുള്ള കൊതുകകളാണ് സിക വൈറസ് പരത്തുന്നത്. വൈറസ് ബാധ സ്ഥിരീകരിച്ച പശ്ചാത്തലത്തിൽ കൊതുകുനശീകരണം അടക്കമുള്ള നടപടികൾ ഊർജിതമാക്കാൻ തീരുമാനിച്ചിട്ടുണ്ട്.
ഒരാഴ്ച മുൻപാണ് തലശ്ശേരി കോടതി ജീവനക്കാർക്കിടയിൽ ലക്ഷണങ്ങൾ കണ്ടുതുടങ്ങിയത്. ശരീരത്തിൽ തടിപ്പ്, കക്ഷീണം, പനി തുടങ്ങിയവയായിരുന്നു അനുഭവപ്പെട്ടിരുന്നത്. കോടതിയുടെ പ്രവർത്തനത്തെ ആകെ ബാധിക്കുന്ന വിധത്തിലായിരുന്നു വൈറസ് ബാധ.
