മുകൾനിലയിൽ രക്തത്തിൽ കുളിച്ച് ജ്യോതിയും നവീനും; അമ്മയുടെയും മകന്റെയും മരണത്തിൽ വിറങ്ങലിച്ച് നാട്; ദുരൂഹത

ലയൺസ് ക്ലബ് റോഡിലെ നന്ദനത്തിൽ ജ്യോതി (56), മകൻ നവീൻ കൃഷ്ണ (21) എന്നിവരാണ് മരിച്ചത്. ചൊവ്വാഴ്ച രാവിലെയാണ് സംഭവം. ജ്യോതിയുടെ ഭർത്താവ് ജയകൃഷ്ണൻ പുറത്തുപോയ സമയത്താണ് സംഭവം നടന്നതെന്നാണ് വിവരം.

രാവിലെ ഒൻപതുമണിയോടെ വീട്ടിനുള്ളിൽനിന്ന് ജയകൃഷ്ണന്റെ കരച്ചിൽ സമീപവാസികൾ കേൾക്കുകയും അവർ അവിടേക്ക് എത്തുകയുമായിരുന്നു. രക്തത്തിൽ കുളിച്ചുകിടന്ന ജ്യോതിയേയും നവീനിനേയും താഴേക്ക് ഇറക്കി. പിന്നാലെ ആംബുലൻസ് വിളിച്ചു. ആംബുലൻസ് ഡ്രൈവർ എത്തി പൾസ് നോക്കിയപ്പോൾ കിട്ടിയില്ല. തുടർന്ന് പോലീസുകാരെ വിവരം അറിയിക്കുകയായിരുന്നു. സ്ഥലത്തെത്തിയ പോലീസാണ് മൃതദേഹങ്ങൾ തലശ്ശേരി സർക്കാർ ആശുപത്രിയിൽ എത്തിച്ചത്. ശാന്തമായ കുടുംബമായിരുന്നെന്നും എന്തെങ്കിലും പ്രശ്‌നങ്ങളുണ്ടായിരുന്നെന്ന് ആർക്കും അറിയില്ലായിരുന്നെന്നും പ്രദേശവാസികളിലൊരാൾ പ്രതികരിച്ചു.