സോഷ്യൽമീഡിയ പേടിയിൽ കേന്ദ്രം; അഞ്ച് മാസത്തിനിടെ വിലക്കിയത് 1.95 ലക്ഷത്തോളം പോസ്റ്റുകൾ
ഡൽഹി: സമൂഹമാധ്യമങ്ങൾക്ക് കേന്ദ്രത്തിന്റെ കടുത്ത നിയന്ത്രണം. കഴിഞ്ഞ അഞ്ചു മാസത്തിനിടെ വിലക്കിയത് 1.95 ലക്ഷത്തോളം പോസ്റ്റുകൾ . ഇൻസ്റ്റഗ്രാം പോസ്റ്റുകൾ നീക്കം ചെയ്യാനാണ് കൂടുതൽ നിര്ദേശം.
മാർച്ച് മുതൽ ജൂലൈ വരെയുള്ള 5 മാസത്തിനിടെ ശരാശരി 68 സെക്കൻഡിൽ ഒന്ന് എന്ന തോതിൽ 1.95 ലക്ഷത്തോളം കണ്ടന്റ് ബ്ലോക്കിങ് ഉത്തരവുകളാണ് സോഷ്യൽ മീഡിയ പ്ലാറ്റ്ഫോമുകൾക്ക് ലഭിച്ചത്. ഈ അഞ്ച് മാസ കാലയളവിൽ ഇൻസ്റ്റഗ്രാം, ഫേസ്ബുക്ക്, യൂട്യൂബ് എന്നിവയിലെ ഓൺലൈൻ ഉള്ളടക്കങ്ങൾ നിയന്ത്രിക്കുന്നതിനായി സർക്കാർ ഏജൻസികൾ വൻ വര്ധനവാണ് ഉണ്ടായിരിക്കുന്നതെന്ന് ‘ദി ഇന്ത്യൻ എക്സ്പ്രസ്’ പുറത്തുവിട്ട വിവരങ്ങൾ വ്യക്തമാക്കുന്നു. നീറ്റ് പരീക്ഷ ചോദ്യ പേപ്പര് ചോര്ച്ചയുമായി ബന്ധപ്പെട്ട് ജന്തര് മന്തറിൽ വിദ്യാര്ഥികൾ നടത്തിയ പ്രതിഷേധവും ഇതിൽ ഉൾപ്പെടുന്നു. ജൂൺ ആദ്യം ആരംഭിച്ച ഈ പ്രതിഷേധം, അന്നത്തെ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജി വെച്ചതിനെ തുടർന്ന് ജൂലൈ 25-നാണ് അവസാനിപ്പിച്ചത്.
2024 ഒക്ടോബർ മുതൽ 2025 ഒക്ടോബർ വരെയുള്ള ഒരു വർഷത്തിനിടെ ‘സഹയോഗ്’ പോർട്ടൽ വഴി 19 ഓൺലൈൻ പ്ലാറ്റ്ഫോമുകളിലേക്ക് ആകെ 2,312 ബ്ലോക്കിങ് ഓർഡറുകൾ മാത്രമാണ് അയച്ചിരുന്നത്. അതായത് അന്ന് പ്രതിദിനം ശരാശരി ആറ് ഉത്തരവുകൾ മാത്രം. എന്നാൽ കഴിഞ്ഞ അഞ്ച് മാസത്തെ കണക്കെടുക്കുമ്പോൾ ശരാശരി ഓരോ 68 സെക്കൻഡിലും ഓരോ ബ്ലോക്കിങ് ഓര്ഡര് വീതം അയക്കുന്നു. മാസാടിസ്ഥാനത്തിലുള്ള കണക്കുകൾ ലഭ്യമല്ലെങ്കിലും, പ്രത്യേകിച്ച് ഇൻസ്റ്റാഗ്രാമിൽ പ്രതിഷേധങ്ങൾ കൂടുതൽ ശക്തമായ സമയത്താണ് ബ്ലോക്കിങ് ഓർഡറുകളിൽ വലിയൊരു പങ്കും പുറപ്പെടുവിച്ചതെന്ന് മുതിർന്ന സർക്കാർ ഉദ്യോഗസ്ഥൻ വ്യക്തമാക്കി.
പ്രതീക്ഷിച്ചതുപോലെ തന്നെ, പരിശോധിച്ച മൂന്ന് പ്ലാറ്റ്ഫോമുകളിൽ ഏറ്റവും കൂടുതൽ സർക്കാർ നിർദേശങ്ങൾ ലഭിച്ചത് ഇൻസ്റ്റഗ്രാമിനാണ്. അഞ്ച് മാസത്തിനിടെ ലഭിച്ച ആകെ ഉത്തരവുകളിൽ പകുതിയിലധികവും — അതായത് ഏകദേശം 1 ലക്ഷത്തോളം ബ്ലോക്കിങ് ഓർഡറുകൾ — ഇൻസ്റ്റാഗ്രാമിന് മാത്രമായാണ് നൽകിയത്. ലോകമെമ്പാടും ഉപയോക്താക്കളുടെ വളർച്ചയിൽ മാന്ദ്യം അനുഭവപ്പെട്ട ഫേസ്ബുക്കിന് ഏകദേശം 80,000 ബ്ലോക്കിങ് ഓർഡറുകൾ ലഭിച്ചു. 15,000 ഓർഡറുകളാണ് യൂട്യൂബിന് ലഭിച്ചത്.
മൂന്ന് കമ്പനികൾക്കായി നൽകിയ ആകെ ഉത്തരവുകളിൽ പത്തിൽ ഒമ്പതും മെറ്റയുടെ ഉടമസ്ഥതയിലുള്ള ഫേസ്ബുക്ക്, ഇൻസ്റ്റാഗ്രാം എന്നീ പ്ലാറ്റ്ഫോമുകൾക്കാണ് ലഭിച്ചത്. ഇതിൽ ഓരോ ഉത്തരവ് വഴിയും നൂറുകണക്കിന് വ്യക്തിഗത പോസ്റ്റുകളോ അക്കൗണ്ടുകളോ നീക്കം ചെയ്യാൻ സാധിക്കും. ആഭ്യന്തര മന്ത്രാലയം വികസിപ്പിച്ച ‘സഹയോഗ്’ പോർട്ടൽ വഴി വിവിധ കേന്ദ്ര-സംസ്ഥാന ഏജൻസികളാണ് ഇത്തരം മിക്ക നോട്ടീസുകളും അയച്ചിട്ടുള്ളത്.
ആഭ്യന്തര മന്ത്രാലയത്തിന്റെ 2024-25 വാർഷിക റിപ്പോർട്ട് അനുസരിച്ച്, 2025 മാർച്ച് വരെ ആകെ ഒരു വർഷത്തിനിടെ വിവരസാങ്കേതിക (IT) നിയമത്തിലെ സെക്ഷൻ 79(3)(b) പ്രകാരം (സഹയോഗ് പോർട്ടൽ ഉൾപ്പെടെ വഴി) 1.11 ലക്ഷത്തിലധികം സംശയാസ്പദമായ ഓൺലൈൻ ഉള്ളടക്കങ്ങളാണ് തടഞ്ഞത്.
