പരിയാരം: കണ്ണൂർ ഗവ. മെഡിക്കൽ കോളേജിൽ വിവിധ വകുപ്പുകളിലായി സീനിയർ റസിഡന്റ് തസ്തികയിൽ ഒഴിവുണ്ട്. എമർജൻസി മെഡിസിൻ, പൾമനറി മെഡിസിൻ, റേഡിയോ ഡയഗ്‌നോസിസ്, റേഡിയോതെറാപ്പി, ജനറൽ സർജറി, ബയോകെമിസ്ട്രി, ഫോറൻസിക് മെഡിസിൻ, ഇ.എൻ.ടി, ഒഫ്താൽ മോളജി, ട്രാൻസ്ഫ്യൂഷൻ മെഡിസിൻ, അനസ്തേഷ്യോളജി, സൈക്യാട്രി, ഫിസിക്കൽ മെഡിസിൻ ആന്റ് റീഹാബിലിറ്റേഷൻ, ഫാർമക്കോളജി, ഫിസിയോളജി ഡിപ്പാർട്ട്മെന്റുകളിലാണ് ഒഴിവുള്ളത്.

നവംബർ ആറിന് രാവിലെ 11 മണിക്ക് മെഡിക്കൽ കോളേജ് പ്രിൻസിപ്പാൾ ഓഫീസിൽ നടക്കുന്ന വാക് ഇൻ ഇന്റർവ്യൂ മുഖേനയാണ് നിയമനം. എം.ബി.ബി.എസ് കഴിഞ്ഞ് അതത് വിഭാഗത്തിൽ മെഡിക്കൽ പി.ജി ബിരുദം നേടിയിരിക്കണം. ടി.സി.എം.സി റജിസ്ട്രേഷൻ നിർബന്ധമാണ്. താൽപര്യമുള്ളവർ, യോഗ്യത തെളിയിക്കുന്ന അസ്സൽ സർട്ടിഫിക്കറ്റുകളും ആയതിന്റെ സ്വയം സാക്ഷ്യപ്പെടുത്തിയ പകർപ്പും സഹിതം വാക് ഇൻ ഇന്റർവ്യൂവിന് അരമണിക്കൂർ മുമ്പെങ്കിലും പ്രിൻസിപ്പാൾ ഓഫീസിൽ റിപ്പോർട്ട് ചെയ്യേണ്ടതാണ്. നിയമനം കരാർ അടിസ്ഥാനത്തിൽ താത്ക്കാലികമായിരിക്കും. വിശദാംശങ്ങൾ https://gmckannur.edu.in/ എന്ന സ്ഥാപനത്തിന്റെ വെബ്സൈറ്റിൽ ലഭ്യമാണ്.

കണ്ണൂർ: പെട്രോളിനും വിലക്കിഴിവ് ഓഫർ..! മാഹിയിൽ നിലവിലുള്ള വിലക്കുറവിന് പിന്നാലെ ജിയോ പമ്പിലാണ് പെട്രോൾ ലിറ്ററിന് മൂന്ന് രൂപ കിഴിവ് ലഭിക്കുന്നത്.ദീപാവലി ഓഫർ എന്ന പേരിൽ തിങ്കളാഴ്ച തുടങ്ങിയ ഓഫർ നവംബർ 19 വരെ നീളും. രാവിലെ പത്ത് മുതൽ വൈകിട്ട് അഞ്ച് വരെയാണ് ഹാപ്പി അവേഴ്സ് എന്ന പേരിൽ വിലക്കിഴിവ് അനുവദിക്കുന്നത്.ലിറ്ററിന് 88.87 രൂപയാണ് 3 രൂപ കിഴിവോടെയുള്ള ഇപ്പോഴത്തെ വില. ഓഫർ നിലവിൽ വന്നതിനെ തുടർന്ന് മാഹി മേഖലയിലെ ഏക ജിയോ പമ്പായ കോപ്പാലത്തെ പമ്പിൽ വാഹനങ്ങളുടെ നീണ്ട നിരയാണ്.ഫുൾ ടാങ്ക് പെട്രോളടിക്കുന്ന വലിയ വാഹനങ്ങൾക്ക് വൻതോതിലുള്ള ലാഭമാണ് പുതിയ ഓഫറിലൂടെ ലഭിക്കുക.

പേരാവൂർ: സി.പി.എം പേരാവൂർ ഏരിയക്ക് കീഴിലെ ലോക്കൽ കമ്മിറ്റികളുടെ സമ്മേളനം പൂർത്തിയായി. ഇതിൽ അഞ്ച് ലോക്കൽ കമ്മിറ്റികളിൽ ഔദ്യോഗിക പാനലിനെതിരെ മത്സരം നടന്നു.ചിലയിടങ്ങളിൽ ഔദ്യോഗിക പാനലിലുള്ളവർ തോറ്റപ്പോൾ ചിലയിടങ്ങളിൽ പാനലിനെതിരെ മത്സരിച്ചവരും തോറ്റു.

പേരാവൂർ ഏരിയാ കമ്മിറ്റിക്ക് കീഴിൽ കൊട്ടിയൂർ, കേളകം, അടക്കാത്തോട്, കണിച്ചാർ, കൊളക്കാട്, മണത്തണ, പേരാവൂർ, കാക്കയങ്ങാട്, മുഴക്കുന്ന്, നിടുംപൊയിൽ, കോളയാട് എന്നിങ്ങനെ11 ലോക്കൽ കമ്മിറ്റികളാണുള്ളത്. ഇതിൽ കൊട്ടിയൂർ, കേളകം, അടക്കാത്തോട്, കാക്കയങ്ങാട് ലോക്കൽ കമ്മിറ്റികളിലാണ് ഔദ്യോഗിക പാനലിനെതിരെ മത്സരമുണ്ടായത്. മുഴക്കുന്ന് ലോക്കലിൽ സെക്രട്ടറി സ്ഥാനത്തേക്കും മത്സരം നടന്നു.

കൊട്ടിയൂരിൽ ഔദ്യോഗിക പാനലിൽ മത്സരിച്ച പി.വി.ഹരിലാൽ തോറ്റപ്പോൾ എതിരെ മത്സരിച്ച എമിൽ മാത്യു വിജയിച്ചു. കേളകത്ത് ഔദ്യോഗിക പാനലിലെ ബീന ഉണ്ണിയാണ് പരാജയമറിഞ്ഞത്. ഇവിടെ ജോർജ് കറുകപ്പള്ളി, രാജേഷ്, സുമേഷ് തത്തുപാറ, എൻ.ബി.ബെസ്റ്റിൻ എന്നിവർ എതിരായി മത്സരിക്കുകയും സുമേഷ് തത്തുപാറ വിജയിക്കുകയും ചെയ്തു.അടക്കാത്തോടിൽ ഔദ്യോഗിക പാനലിനെതിരെ മത്സരിച്ച തമ്പി എന്ന തോമസിന് വിജയിക്കാനായില്ല.

കാക്കയങ്ങാട് ലോക്കലിലാണ് ശക്തമായ മത്സരം നടന്നത്. നിലവിലെ ലോക്കൽ കമ്മിറ്റിയംഗങ്ങളായ ബാബു ജോസഫിനെയും എൻ.ഗംഗാധരനെയും ഔദ്യോഗിക പാനലിൽ നിന്നൊഴിവാക്കിയെങ്കിലും ഇരുവരും മത്സരിക്കുകയും ബാബു ജോസഫ് ഏറ്റവുമധികം വോട്ടുകൾ നേടി വിജയിക്കുകയും ചെയ്തു. എന്നാൽ ഗംഗാധരൻ പരാജയപ്പെട്ടു. കൂടാതെ ഔദ്യോഗിക പാനലിനെതിരെ മത്സരിച്ച കെ.രഞ്ജിത്ത്, കെ.പി.ബീന, എ.രഞ്ജിത്ത് എന്നിവരും വിജയിച്ചു. ഔദ്യോഗിക പാനലിലെ കെ.ഉണ്ണിക്കൃഷ്ണൻ, വി.വി.റാഫി, ജഗതി ബിജു എന്നിവരാണ് പരാജയമറിഞ്ഞത്.

സി.പി.എമ്മിന്റെ ഉറച്ച കോട്ടയായ മുഴക്കുന്ന് ലോക്കലിലെ ഔദ്യോഗിക പാനലിൽ സെക്രട്ടറി സ്ഥാനത്തേക്ക് പരിഗണിച്ച എൻ.സനോജിനെതിരെ മത്സരിച്ച സി.ഗോപാലനാണ് പരാജയപ്പെട്ടത്. മുൻ ലോക്കൽ സെക്രട്ടറി കൂടിയാണ് സി.ഗോപാലൻ. നവംബർ 22 മുതൽ 25 വരെ കോളയാടിലാണ് പേരാവൂർ ഏരിയാ സമ്മേളനം നടക്കുക.