കോളയാട്: പെരുവ-മൂപ്പൻ കൊളപ്പ റോഡിൽ മഞ്ഞളിക്കാംപാറക്ക് സമീപം ഇന്നോവ കാറിടിച്ച് കണ്ണവം കോളനി സ്വദേശി നരിക്കോടൻ കുമാരൻ (60) മരിച്ചു. ഞായറാഴ്ച വൈകിട്ടാണ് സംഭവം. ഭാര്യ:വിജയി. മക്കൾ: വിജിനി, വിജിത, വിജിമ. മരുമക്കൾ: അജേഷ്, വിനു, രതീഷ്. സംഭവത്തിൽ ഇന്നോവ ഓടിച്ചിരുന്ന പാനൂർ പാറാട് സ്വദേശി റഹീസിനെതിരെ(29) പേരാവൂർ പോലീസ് കേസെടുത്തു. സന്ദർശകർക്ക് വിലക്കുള്ള വനപ്രദേശത്താണ് അപകടം നടന്നത്.

കോളയാട്: വ്യാപാര മേഖല കടുത്ത പ്രതിസന്ധി അഭിമുഖീകരിക്കുമ്പോൾ സ്‌കൂളുകൾ കേന്ദ്രീകരിച്ച് നടത്തുന്ന സ്റ്റേഷനറി കച്ചവടം നിർത്താൻ നടപടി സ്വീകരിക്കണമെന്ന് വ്യാപാരി വ്യവസായി ഏകോപന സമിതി കോളയാട് യൂണിറ്റ് പൊതുയോഗം ആവശ്യപ്പെട്ടു. സംസ്ഥാന ജനറൽ സെക്രട്ടറി ദേവസ്യ മേച്ചേരി ഉദ്ഘാടനം ചെയ്തു. കെ.ജെ. മനോജ് അധ്യക്ഷത വഹിച്ചു.

ജില്ലാ വൈസ് പ്രസിഡന്റ് കെ.കെ. രാമചന്ദ്രൻ, സെക്രട്ടറി എ. സുധാകരൻ, പി. പുരുഷോത്തമൻ, വി. ഹരീന്ദ്രൻ, എൻ. ഷൈജു, റോയ് പൗലോസ് എന്നിവർ സംസാരിച്ചു. ഭാരവാഹികൾ: കെ.ജെ. മനോജ് (പ്രസി.), എൻ. ഷൈജു (ജന.സെക്ര.), മഷൂദ് നെല്ലേരി (ഖജാ.).

കോളയാട്: പഞ്ചായത്ത് പരിധിയിൽ സ്വകാര്യ സ്ഥലത്ത് അപകടാവസ്ഥയിലുള്ള മരങ്ങൾ ഉടമകളുടെ ഉത്തരവാദിത്വത്തിൽ മുറിച്ചു മാറ്റണമെന്ന് പഞ്ചായത്ത് സെക്രട്ടറി അറിയിച്ചു. അല്ലാത്തപക്ഷം ഇത്തരം മരങ്ങൾകൊണ്ടുണ്ടാകുന്ന അപകടങ്ങൾക്ക് സ്ഥലമുടമ ഉത്തരവാദിയായിരിക്കുമെന്നും സെക്രട്ടറി അറിയിച്ചു.