എൽ.പി.എസ്.ടി സമരപ്പന്തല്‍ പൊളിച്ചുമാറ്റി; വളര്‍മതിയെ ആശുപത്രിയിലേക്ക് മാറ്റി
സെക്രട്ടറിയേറ്റിന് മുന്നിൽ എൽ.പി.എസ്.ടി റാങ്ക് ഹോൾഡേഴ്സ് നടത്തിവന്ന സമരപ്പന്തൽ പൊലീസ് ബലം പ്രയോഗിച്ച് പൊളിച്ചുനീക്കി. സമരപ്പന്തലിൽ നിരാഹാര സമരം അനുഷ്ഠിച്ചിരുന്ന വളർമതിയെ കസ്റ്റഡിയിലെടുത്ത് ആശുപത്രിയിലേക്ക് മാറ്റി. സമരപ്പന്തൽ ഒഴിയണമെന്ന് ആവശ്യപ്പെട്ട് സമയപരിധി അവസാനിച്ചതിനെ തുടർന്നാണ് രാത്രി വൈകി അടിയന്തര നടപടിയുണ്ടായത്. പൊലീസ് നീക്കത്തിനെതിരെ റാങ്ക് ഹോൾഡർമാരും പിന്തുണയുമായെത്തിയ രാഷ്ട്രീയ നേതാക്കളും സ്ഥലത്ത് കടുത്ത പ്രതിഷേധത്തിലാണ്.
സമരപ്പന്തൽ പൊളിച്ചുമാറ്റി ഒഴിയണമെന്ന് ആവശ്യപ്പെട്ട് കഴിഞ്ഞ ദിവസങ്ങളിലായി സമരാനുകൂലികൾക്ക് നോട്ടീസ് നൽകിയിരുന്നു. സമരം അവസാനിപ്പിക്കാൻ 24 മണിക്കൂർ സമയം അനുവദിച്ചിരുന്നെങ്കിലും നോട്ടീസ് അവഗണിച്ച് റാങ്ക് ഹോൾഡർമാർ സമരം തുടരുകയായിരുന്നു. ഇതേത്തുടർന്നാണ് പൊലീസെത്തി ഫ്ലെക്സുകളും ബാനറുകളും വലിച്ചുകീറി പന്തൽ പൂർണ്ണമായും പൊളിച്ചുനീക്കിയത്. പൊലീസ് നടപടി തടയാൻ ശ്രമിച്ച റാങ്ക് ഹോൾഡർമാരെയും പ്രവർത്തകരെയും പൊലീസ് ബലം പ്രയോഗിച്ച് സംഭവസ്ഥലത്തുനിന്ന് മാറ്റി.
നിരാഹാര കിടപ്പിലായിരുന്ന വളർമതിയെ ആരോഗ്യനില കണക്കിലെടുത്ത് ബലപ്രയോഗത്തിലൂടെയാണ് ആംബുലൻസിലേക്ക് മാറ്റി ആശുപത്രിയിലാക്കിയത്. മുൻകൂട്ടി കൃത്യമായ മുന്നറിയിപ്പില്ലാതെ രാത്രിയുടെ മറവിൽ നടത്തിയ പൊലീസ് അതിക്രമം ജനാധിപത്യവിരുദ്ധമാണെന്ന് റാങ്ക് ഹോൾഡേഴ്സ് ആരോപിച്ചു.
പന്തല്‍ പുനഃസ്ഥാപിച്ച് ഡിവൈഎഫ്ഐ പ്രവര്‍ത്തകര്‍. സമരത്തിന് പിന്തുണയെന്ന് ഡി.വൈ.എഫ്.ഐ. സെക്രട്ടേറിയറ്റിലേക്ക് DYFI മാര്‍ച്ച് സംഘടിപ്പിച്ചു.
