പേരാവൂർ: അശാസ്ത്രീയമായ റോഡ് നവീകരണത്തിന്റെ ഭാഗമായി താഴെ തൊണ്ടിയിൽ കഴിഞ്ഞ ദിവസങ്ങളിലുണ്ടായ വെള്ളക്കെട്ടിന് പരിഹാരമായി. പേരാവൂർ പഞ്ചായത്ത് പത്താം വാർഡംഗം നൂറുദ്ദീൻ മുള്ളേരിക്കലിന്റെ നേതൃത്വത്തിൽ സമീപവാസികളായ കെ.എം. സ്റ്റാനി, അജിത്ത്കുമാർ, സ്റ്റീഫൻ മേസ്ത്രി, പൗലോസ് വടക്കും ചേരി, സുമേഷ് തുടങ്ങിയവർ ചേർന്ന് താത്കാലിക ഓവുചാൽ നിർമിച്ച് മഴവെള്ളം പുഴയിലേക്കൊഴുകാൻ വഴിയൊരുക്കി.

മണ്ണ് മാന്തി യന്ത്രം കൊണ്ട് ഓവുചാലുണ്ടാക്കി അതിൽ പൈപ്പ് സ്ഥാപിച്ചാണ് റോഡിലെ വെള്ളക്കെട്ട് ഒഴിവാക്കിയത്. പൊതുമരാമത്ത് വകുപ്പധികൃതരുടെ അനാസ്ഥ കാരണമാണ് ഈ ഭാഗത്ത് ഓവുചാലുകൾ നിർമിക്കാതിരിക്കാൻ കാരണമെന്ന് വ്യാപാരികളും സമീപവാസികളും ആരോപിക്കുന്നു.

പേരാവൂർ: നവീകരണം നടക്കുന്ന പാലയാട്ടുകരി-വായന്നൂർ-പള്ളിപ്പാലം റോഡിനും സമീപത്തെ ചില വീട്ടുപറമ്പുകൾക്കും കഴിഞ്ഞ ദിവസം പെയ്ത മഴയിൽ നാശം. കുത്തിയൊലിച്ചുവരുന്ന മഴ വെള്ളം ഒലിച്ചു പോകാനാവശ്യമായ ഓവുചാലുകൾ വേണ്ടിടത്ത് നിർമിക്കാത്തതാണ് റോഡിൽ പാകിയ ചെറിയ കരിങ്കല്ലുകൾ ഒഴുകി പോകാനിടയാക്കിയത്. ഇതു കൂടാതെ പാലയാട്ടുകരി-പേരാവൂർ റോഡ് ജങ്ങ്ഷന് സമീപത്തെ വീട്ടുപറമ്പുകളിലേക്കും റോഡിൽ നിന്ന് മഴവെള്ളം കുത്തിയൊലിച്ച് നാശമുണ്ടായി.

പ്രദേശവാസികളുടെ പരാതിയെത്തുടർന്ന് റോഡരികിൽ താത്കാലിക ഓവുചാലുണ്ടാക്കിയെങ്കിലും കഴിഞ്ഞ ദിവസം രാത്രി പെയ്ത മഴയിലും വെള്ളം കുത്തിയൊലിച്ച് വീട്ടുമുറ്റത്ത് വീണ്ടും നാശമുണ്ടായി. അധികൃതരോട് പരാതിപ്പെട്ടെങ്കിലും ശാശ്വത പരിഹാരത്തിന് തയ്യാറാവുന്നില്ലെന്ന് പ്രദേശവാസികൾ പറഞ്ഞു. പേരാവൂർ റോഡ് ജങ്ങ്ഷനിലെ കലുങ്കിലേക്ക് വെള്ളം ഒഴുകാൻ റോഡിന്റെ ഒരു വശം കുറച്ചു ദൂരത്തിൽ മാത്രമാണ് ഓവുചാൽ നിർമിച്ചിട്ടുള്ളത്. അശാസ്ത്രീയമായ രീതിയിലണ് ഈ ഭാഗത്ത് ഓവുചാലുള്ളത്. സംഭവത്തിൽ അധികൃതർ അടിയന്തര നടപടി സ്വീകരിക്കണമെന്നാണ് പ്രദേശവാസികളുടെ ആവശ്യം.

പേരാവൂർ: കൊതുകുജന്യ രോഗങ്ങൾ വ്യാപിക്കുന്ന സാഹചര്യത്തിലും കുടിവെള്ള വിതരണത്തിൽ നിസംഗത തുടർന്ന് പേരാവൂരിലെ ആരോഗ്യവകുപ്പും ജലവിതരണ വകുപ്പും. ടൗണിൽ കേരള വാട്ടർ അതോറിറ്റി വിതരണം ചെയ്യുന്ന കുടിവെള്ളത്തിലാണ് ഞായറാഴ്ച രാവിലെ കൊതുക്-കൂത്താടികൾ കാണപ്പെട്ടത്.

ടൗണിലെ മിൽക്ക് ബൂത്തിൽ രാവിലെ പൈപ്പ് തുറന്നപ്പോഴാണ് വെള്ളം സംഭരിക്കുന്ന പ്ലാസ്റ്റിക്ക് ടാബിൽ ജീവനുള്ള കൂത്താടികളെ കണ്ടത്. സംശയം തോന്നിയ സ്ഥാപനയുടമ വെള്ളം മുഴുവൻ ഒഴുക്കി കളഞ്ഞ ശേഷം വീണ്ടും ടാപ്പ് തുറന്നപ്പോഴും കൂത്താടികൾ പ്ലാസ്റ്റിക്ക് ടാബിലേക്ക് വീഴുകയായിരുന്നു. ഇതേത്തുടർന്ന് വെള്ളം ശേഖരിക്കുന്നത് നിർത്തിവെച്ചു. ജലസംഭരണിയിൽ കൊതുകുകൾ പെറ്റുപെരുകുന്നതാണ് വിതരണം ചെയ്യുന്ന വെള്ളത്തിൽ കൂത്താടികൾ കാണപ്പെടാൻ കാരണം. ഇത് പേരാവൂരിലെ ആരോഗ്യ വകുപ്പിന്റെ അനാസ്ഥയാണെന്നാണ് ആക്ഷേപം.

ജലസംഭരണി ശുചിയായി സൂക്ഷിക്കാത്തതാണ് കൊതുകുകൾ പെറ്റുപെരുകാൻ കാരണമാവുന്നത്. പേരാവൂർ ചെവിടിക്കുന്നിലാണ് വാട്ടർ അതോറിറ്റിയുടെ ജലസംഭരണിയുള്ളത്. ഇതിലേക്ക് വെള്ളം ശേഖരിക്കുന്നത് കാഞ്ഞിരപ്പുഴയിൽ നിന്നുമാണ്. കുടിവെള്ള വിതരണം ചെയ്യുന്ന സ്ഥലം യഥാസമയം ആരോഗ്യവകുപ്പധികൃതർ സന്ദർശിക്കാറില്ലെന്നും പരാതിയുണ്ട്.