കോളേജ് വിദ്യാർത്ഥിനിയായ കാമുകിയെ കാമുകനും ഭാര്യയും ചേർന്ന് കൊലപ്പെടുത്തി, പ്രതികൾ കണ്ണൂരിൽ പിടിയിൽ
കണ്ണൂർ: പൊള്ളാച്ചിയിലെ കോളേജ് വിദ്യാർത്ഥിനിയെ കൊലപ്പെടുത്തിയ കേസിൽ യുവാവും ഭാര്യയും പിടിയിൽ. കോയമ്പത്തൂർ ഇടയാർപാളയം സ്വദേശിനി സുബ്ബലക്ഷ്മി (20) ആണ് കൊല്ലപ്പെട്ടത്.
കേസിൽ ഇടയാർപാളയം സ്വദേശി സുജയ് (30), മലയാളിയായ ഭാര്യ രേഷ്മ (25) എന്നിവരാണ് പിടിയിലായത്.മേയ് രണ്ടിനാണ് യുവതിയെ ദമ്പതികളുടെ അപ്പാർട്ടുമെന്റിൽ കുത്തേറ്റ് മരിച്ചനിലയിൽ കണ്ടെത്തിയത്.
പൊള്ളാച്ചിയിലെ സ്വകാര്യ കോളേജിൽ ബി കോം വിദ്യാർത്ഥിനിയാണ് സുബ്ബലക്ഷ്മി. യുവതിയുടെ കാമുകനായിരുന്നു സുജയ്. കാമുകനെ കാണാനായി അപ്പാർട്ട്‌മെൻറിലെത്തിയ സുബ്ബലക്ഷ്മിയെ ദമ്പതികൾ കൊലപ്പെടുത്തുകയായിരുന്നു.
അപ്പാർട്ട്‌മെന്റിൽ നിന്ന് ഒച്ചയും ബഹളവും കേട്ട അയൽവാസികളാണ് വിവരം പൊലീസിലറിയിച്ചത്. ഇതിനിടെ ദമ്പതികൾ ബൈക്കിൽ രക്ഷപ്പെട്ടിരുന്നു.
ഇരുവരും കണ്ണൂരിലെത്തിയതായി വിവരം ലഭിച്ചതിനെത്തുടർന്ന് പൊലീസ് പരിശോധന നടത്തുകയായിരുന്നു. ലോഡ്‌ജിൽവച്ചാണ് പ്രതികളെ പിടികൂടിയത്. ഇവരെ തമിഴ്നാട് പൊലീസിന് കൈമാറി.
