പ്രവാസികൾക്ക് കണ്ണൂരിൽ ആഗോള നിക്ഷേപക സംഗമം
കണ്ണൂർ: ജില്ലയിൽ സംരംഭം തുടങ്ങാൻ സന്നദ്ധരായ പ്രവാസികളെ ലക്ഷ്യമിട്ട് കണ്ണൂരിൽ ആഗോള നിക്ഷേപക സംഗമം നടത്തും. ജില്ല പഞ്ചായത്തും ജില്ല വ്യവസായ കേന്ദ്രവും സംയുക്തമായി ഒക്ടോബർ 19, 20 തീയതികളിലാണ് നിക്ഷേപക സംഗമം നടത്തുകയെന്ന് ജില്ല പഞ്ചായത്ത് പ്രസിഡൻറ് പി.പി. ദിവ്യ അറിയിച്ചു.
ലോകത്തിന്റെ വിവിധ ഭാഗങ്ങളിൽ സംരംഭങ്ങൾ നടത്തുന്ന കണ്ണൂരുകാരും അല്ലാത്തവരുമായ പ്രവാസി നിക്ഷേപകർ സംഗമത്തിൽ പങ്കെടുക്കും.
ടൂറിസം, വ്യവസായം, ആരോഗ്യം, ഹോസ്പിറ്റാലിറ്റി, കൃഷി, ടെക്‌നോളജി, വിദ്യാഭ്യാസം, റീട്ടെയിൽ, കയറ്റുമതി, സേവന മേഖലകൾ, മറ്റു വ്യാപാര ശൃംഖലകൾ ഉൾപ്പെടെ കണ്ണൂരിൽ ആരംഭിക്കാവുന്ന ചെറുതും വലുതുമായ സംരംഭങ്ങളെ കുറിച്ചുള്ള ചർച്ചകളാണ് നിക്ഷേപക സംഗമത്തിന്റെ പ്രധാന ആകർഷണം. പുതിയ കൂട്ടായ്മകൾക്കും വ്യക്തികൾക്കും ആരംഭിക്കാവുന്ന വിവിധ പദ്ധതികളെക്കുറിച്ചും സർക്കാർ സഹായങ്ങളെ കുറിച്ചും ഉന്നത ഉദ്യോഗസ്ഥരുടെ പാനൽ ഉൾപ്പെടുന്ന സെഷനുകളും ഉണ്ടാകും.
പ്രവാസി സംരംഭകർക്ക് അവരുടെ സ്വപ്ന പദ്ധതികൾ അവതരിപ്പിക്കാനുള്ള അവസരവും ലഭിക്കും. വിദ്യാസമ്പന്നരായ തലമുറക്ക് നേരിട്ടും അല്ലാതെയും തൊഴിൽ ലഭിക്കുന്ന സാഹചര്യവും സൃഷ്ടിക്കാനാകും. കണ്ണൂരിന്റെ ഉൽപന്നങ്ങൾക്കും ആശയങ്ങൾക്കും ആഗോളതലത്തിൽ സ്വീകാര്യത വർധിപ്പിക്കാനും ഈ സംഗമം വഴി സാധിക്കും. കണ്ണൂരിന്റെ വ്യവസായ സംരംഭകത്വ സാധ്യത പഠനം നടത്തി വിശദമായ റിപ്പോർട്ട് തയാറാക്കി സംഗമത്തിൽ അവതരിപ്പിക്കും.
സെപ്റ്റംബർ 15 വരെ രജിസ്റ്റർ ചെയ്യാം
പദ്ധതികൾ അവതരിപ്പിക്കാൻ ആഗ്രഹിക്കുന്നവർ പദ്ധതിരേഖ സമർപ്പിച്ച് ജില്ല വ്യവസായ കേന്ദ്രത്തിന്റെയും ഇതിനായുള്ള സമിതിയുടെയും അനുവാദം വാങ്ങണം.
നിക്ഷേപം ആവശ്യമുള്ള എൻ.ആർ.ഐ അല്ലാത്തവർക്കും പ്രൊജക്ട് അവതരിപ്പിക്കാം. പരിപാടിക്കായി ജനപ്രതിനിധികളും വ്യവസായ പ്രമുഖരും ഉദ്യോഗസ്ഥരുമടങ്ങുന്ന സ്വാഗതസംഘം രൂപവത്കരിക്കും.
പരിപാടിയിൽ പങ്കെടുക്കുന്ന നിക്ഷേപകർക്കും ബിസിനസുകാർക്കും സെപ്റ്റംബർ 15 വരെ https://forms.gle/8ZBCghqozP4b7VDz9 എന്ന ഗൂഗിൾഫോം വഴി രജിസ്റ്റർ ചെയ്യാം.
രണ്ടു ദിവസത്തെ നിക്ഷേപക സംഗമത്തിൽ മന്ത്രിമാരും പ്രമുഖ ബിസിനസ് നേതാക്കളും വിവിധ വകുപ്പ് മേധാവികളും സംബന്ധിക്കും. വാർത്തസമ്മേളനത്തിൽ വൈസ് പ്രസിഡന്റ് അഡ്വ. ബിനോയ് കുര്യൻ, ജില്ല വ്യവസായ കേന്ദ്രം ജനറൽ മാനേജർ എ.എസ്. ഷിറാസ്, ജില്ല പഞ്ചായത്ത് സെക്രട്ടറി എ.വി. അബ്ദുല്ലത്തീഫ്, ജില്ല വ്യവസായ കേന്ദ്രം മാനേജർ പി.വി. രവീന്ദ്രകുമാർ എന്നിവർ സംബന്ധിച്ചു.
നിക്ഷേപകർക്ക് അനുകൂല നിലപാട് -പി.പി. ദിവ്യ
നിക്ഷേപകർക്ക് അനുകൂലമായ നിലപാടാണ് ജില്ല പഞ്ചായത്ത് കൈക്കൊള്ളുകയെന്നും ഇതിനുള്ള എല്ലാ അപേക്ഷകൾക്കും ഏകജാലക സംവിധാനം ഒരുക്കിയതായും ജില്ല പഞ്ചായത്ത് പ്രസിഡന്റ് പി.പി. ദിവ്യ. ഏതെങ്കിലും ഉദ്യോഗസ്ഥരുടെ ഭാഗത്ത് നിന്ന് നിക്ഷേപകർക്ക് പ്രയാസമുണ്ടാക്കുന്ന സമീപനമുണ്ടായാൽ കർശന നടപടിയെടുക്കും. അത്തരം കാര്യങ്ങൾ നിരീക്ഷിക്കാൻ സംവിധാനമുണ്ടെന്നും അവർ പറഞ്ഞു.
