കണ്ണൂരിൽ ബസ് മിനി ലോറിയുമായി കൂട്ടിയിടിച്ച് ഒരാൾ മരിച്ചു; നിരവധി പേർക്ക് പരിക്ക്
പുലർച്ചെ 12.45 ഓടെ മംഗലാപുരത്ത് നിന്നും പത്തനംതിട്ടയിലേക്ക് പോയ കല്ലട ട്രാവൽസിന്റെ ബസ് തലശ്ശേരിയിൽ നിന്നും മീൻ കയറ്റി വന്ന ഗുഡ്സ് ലോറിയുമായി
കൂട്ടിയിടിക്കുകയായിരുന്നു. കൂട്ടിയിടിച്ചതിന് പിന്നാലെ ബസ് തലകീഴായി മറിഞ്ഞുവെന്നും നാട്ടുകാർ പറയുന്നു.
മരിച്ചയാളുടെ മൃതദേഹം കണ്ണൂർ ജില്ലാ ആശുപത്രിയിൽ സൂക്ഷിച്ചിരിക്കുകയാണ്. കണ്ണൂർ-തോട്ടട റൂട്ടിൽ പുലർച്ചെ 2.30 ഓടെ ഗതാഗതം പുനഃസ്ഥാപിച്ചു. ബസിന്റെ എമർജൻസി ഡോർ ലോക്ക് ആയിരുന്നെന്ന് രക്ഷാപ്രവർത്തനത്തിൽ പങ്കെടുത്തയാൾ പറഞ്ഞു. വലിയ ശബ്ദം കേട്ടാണ് ഓടിയെത്തിയതെന്നും ഒരാൾ കുടുങ്ങിക്കിടന്നതിനാൽ രക്ഷിക്കാനായില്ലെന്നും ദൃക്സാക്ഷി വ്യക്തമാക്കി.
27 പേരെ പരിക്കുകളോടെ വിവിധ സ്വകാര്യ ആശുപത്രികളില്‍ പ്രവേശിപ്പിച്ചു. ലോറിയുടെ ക്യാബിനില്‍ കുടുങ്ങിയ ഡ്രൈവറെ അഗ്നിരക്ഷാസേന ക്യാബിൻ മുറിച്ചാണ് പുറത്തെടുത്തത്.
