അഖിലേന്ത്യാ വോളിബാൾ ടൂർണമെന്റിന് നാളെ നാടുകാണിയിൽ തുടക്കം
തളിപ്പറമ്പ: ഇന്ത്യൻ വോളിയിലെ താര രാജാക്കന്മാരെ അണിനിരത്തി മൈഗ്രൂപ്പ് വാട്സ്ആപ്പ് കൂട്ടായ്മയും വ്യാപാരി വ്യവസായി ഏകോപനസമിതിയും മൊബൈൽ സിറ്റിയും സ്‌പോർട്സ് കൗൺസിലും സംയുക്തമായി സംഘടിപ്പിക്കുന്ന അഖിലേന്ത്യാ വോളിബാൾ ടൂർണമെന്റ് നാടുകാണിയിൽ നാളെ രാത്രി 7ന് ഉദ്ഘാടനം ചെയ്യുമെന്ന് സംഘാടകർ വാർത്താസമ്മേളനത്തിൽ അറിയിച്ചു.
നാടുകാണി അൽമഖറിന് സമീപം പ്ലാന്റേഷൻ കോർപ്പറേഷന്റെ വിശാലമായ സ്ഥലത്ത് 5000 പേർക്ക് ഇരിക്കാവുന്ന താൽക്കാലിക ഫ്ളഡ്‌ലിറ്റ് സ്റ്റേഡിയത്തിലാണ് ടൂർണമെന്റ് നടക്കുക. 12 മുതൽ 19 വരെയുള്ള ദിവസങ്ങളിലാണ് മത്സരം.
ദിവസേന രണ്ട് മത്സരമുണ്ടാകും. എല്ലാ മത്സരവും രാത്രി 7.30ന് ആരംഭിക്കും.ഇന്ന് ഇന്ത്യൻ ടീമിനും ഇന്ത്യയിലെ എല്ലാ പ്രൊഫഷണൽ ക്ലബുകൾക്കും കളിക്കുന്ന ഒട്ടുമിക്ക താരങ്ങളും നാടുകാണിയിൽ കളിക്കാൻ എത്തിച്ചേരുന്നുണ്ട്.
300 ലധികം കാറുകൾക്കും നൂറുകണക്കിന് ഇരുചക്രവാഹനങ്ങൾക്കും പാർക്ക് ചെയ്യാനുള്ള സൗകര്യവും ഒരുക്കിയിട്ടുണ്ടെന്ന് സംഘാടകസമിതി ജനറൽ കൺവീനർ എം.കെ. മനോഹൻ, വൈസ് ചെയർമാൻ ഡോ. രഞ്ജീവ്, ട്രഷറർ ജബ്ബാർ മൊബൈൽ സിറ്റി, ഷാജു എന്നിവർ വാർത്താസമ്മേളനത്തിൽ പറഞ്ഞു.
