എല്പിജി ക്ഷാമം രൂക്ഷം; ഗ്രാമീണ മേഖലയില് ബുക്കിങ് ഇടവേള 45 ദിവസമാക്കി
ന്യൂഡല്ഹി: പശ്ചിമേഷ്യയിലെ യുദ്ധത്തെ തുടര്ന്ന് ഊര്ജ പ്രതിസന്ധി നേരിടുന്ന സാഹചര്യത്തില് ഗ്രാമീണ മേഖലയിലെ എല്പിജി ബുക്കിങ് ഇടവേള 45 ദിവസമാക്കി ഉയര്ത്തി. നഗരപ്രദേശങ്ങളില് ബുക്കിങ് ഇടവേള 25 ദിവസമായും ഉയര്ത്തി. 17 ദിവസമായിരുന്ന ബുക്കിങ് ഇടവേള നേരത്തെ 21 ദിവസമാക്കി ദീര്ഘിപ്പിച്ചിരുന്നു. ഇതാണ് വീണ്ടും വര്ധിപ്പിച്ചിരിക്കുന്നത്. പെട്രോളിയം മന്ത്രാലയം ജോയിന്റ് സെക്രട്ടറി സുജാത ശര്മ്മയാണ് ഇക്കാര്യം വാര്ത്താസമ്മേളനത്തില് അറിയിച്ചത്. പ്രതിസന്ധി ഒഴിവാക്കാനാണ് നിയന്ത്രണമേര്പ്പെടുത്തിയതെന്ന് കേന്ദ്രം പറയുന്നു.
പശ്ചിമേഷ്യയിലെ യുദ്ധത്തിന്റെ പശ്ചാത്തലത്തില് കപ്പല് സര്വീസുകളുടെ കുറവുമൂലം ഊര്ജവിതരണ ശൃംഖലയിലുണ്ടായ തടസമാണ് പാചകവാതക ക്ഷാമത്തിന് ഇടയാക്കുന്നത്. സിലിണ്ടര് വിതരണം പരിമിതപ്പെടുത്താന് കേന്ദ്ര സര്ക്കാര് ഗ്യാസ് ഏജന്സികള്ക്ക് നിര്ദേശം നല്കിയിരുന്നു. വാണിജ്യ സിലിണ്ടറുകളുടെ വിതരണത്തില് 30 ശതമാനം വരെ കുറവുണ്ടാകുമെന്ന് പെട്രോളിയം മന്ത്രാലയം അറിയിച്ചിരുന്നു.
