പശുവളർത്തി ജീവിതവഴി വെട്ടിയ സുനിതയ്ക്ക് അംഗീകാരം

അഞ്ചുസെന്റ് മാത്രമുള്ള പുരയിടത്തിൽ ഒരു പശുവുമായി ക്ഷീരകൃഷി തുടങ്ങിയ സുനിത ഇപ്പോൾ 10 പശുക്കളുടെ ഉടമയാണ്. വീടിന് സമീപത്തെ ബന്ധുക്കളുടെ പുരയിടവും കൂടി പ്രയോജനപ്പെടുത്തിയാണ് പശുക്കളെ വളർത്തുന്നത്. ദിവസവും 50 മുതൽ 60 ലിറ്റർ പാൽവരെ സെയ്ന്റ്‌ ജൂഡ് നഗർ ക്ഷീരോത്പാദക സഹകരണസംഘത്തിൽ അളക്കുന്നുണ്ട്. നിർമാണത്തൊഴിലാളിയായ ഭർത്താവ് സി.എസ്.സുരേഷും സഹായത്തിനുണ്ട്. പുലർച്ചെ നാലുമണിക്ക് കറവ പൂർത്തിയാക്കി തൊഴുത്ത് വൃത്തിയാക്കുന്നത് ഉൾപ്പെടെയുള്ളവ ഇരുവരും ചേർന്ന് കൂട്ടായി ചെയ്യും. ഉച്ചയ്ക്ക്ശേഷം സുരേഷ് തൊഴിൽസ്ഥലത്ത് നിന്നെത്തിയശേഷം പാട്ടത്തിനെടുത്ത സ്ഥലത്തുനിന്ന് തീറ്റപ്പുൽ ശേഖരിച്ചാണ് പശുക്കളെ വളർത്തുന്നതെന്ന് സുനിത പറഞ്ഞു. നഴ്‌സിങ് വിദ്യാർഥിനിയായ തൃഷയാണ് മകൾ.