തലശ്ശേരി റെയില്‍വേ സ്റ്റേഷനില്‍ എസ്കലേറ്റര്‍
തലശ്ശേരി: തലശ്ശേരി റെയില്‍വേ സ്റ്റേഷനില്‍ ടിക്കറ്റ് കൗണ്ടറിന്റെ നീളം കൂട്ടി ഇറങ്ങാനുള്ള എസ്‌കലേറ്ററും സ്ഥാപിച്ചു.ദീർഘകാലമായി ഒന്നാം പ്ളാറ്റ്‌ഫോമില്‍ അടച്ചിട്ടിരുന്ന ടിക്കറ്റ് കൗണ്ടർ നീളം കൂട്ടി വിപുലീകരിച്ച്‌ യാത്രക്കാർക്ക് തുറന്നു കൊടുത്തു. കൗണ്ടറിനെ ആശ്രയിക്കാതെ തന്നെ യാത്രക്കാർക്ക് സ്വയം ടിക്കറ്റ് എടുക്കാൻ ആറ് വെൻഡിംഗ് മെഷീനും സ്ഥാപിച്ചിട്ടുണ്ട്.സ്വയം ടിക്കറ്റ് എടുക്കാൻ അറിയാത്തവർക്ക് എടുത്ത് നല്‍കാനുള്ള സംവിധാനവും ഒരുക്കിയിട്ടുണ്ട്. മുല്ലപ്പള്ളി രാമചന്ദ്രൻ എം.പി യായിരിക്കുമ്ബോള്‍ മുകളിലേക്ക് പോകാനുള്ള എസ്‌ക്കലേറ്റർ സ്ഥാപിച്ചിരുന്നുവെങ്കിലും താഴേക്കുള്ള സംവിധാനമില്ലായിരുന്നു. ഇപ്പോള്‍ താഴെക്ക് വരാനുള്ള എസ്‌ക്കലേറ്ററും റെയില്‍വേ സ്ഥാപിച്ചിരിക്കുകയാണ്.റെയില്‍വേ പാസ്സഞ്ചർ അസോസിയേഷന്റെ ദീർഘകാലത്തെ ആവശ്യമായിരുന്നു ടിക്കറ്റ് കൗണ്ടർ വിപുലീകരണവും, ഇറങ്ങാനുള്ള എസ്‌കലേറ്ററും.
അമൃത് ഭാരത് പദ്ധതിയിലുള്‍പ്പെടുത്തി അവ പൂർത്തീകരിച്ചതിനു ദക്ഷിണ റെയില്‍വേ ഡിവിഷണല്‍ മാനേജരെയും ബന്ധപ്പെട്ട ഉദ്യേഗസ്ഥരെയും അഭിനന്ദനമറിയിച്ച്‌ പാസ്സഞ്ചർ അസോസിയേഷൻ സന്ദേശമയച്ചു.ടിക്കറ്റ് കൗണ്ടർ നീളം കൂട്ടാൻ വേണ്ടി മുകള്‍ നിലയിലേക്ക് കയറാനുള്ള കോവണി പൊളിച്ചു നീക്കിയതിനാല്‍ മുകളിലത്തെ വിശാലമായ ഹാള്‍ ഉപയോഗിക്കാൻ കഴിയാതായിട്ടുണ്ട്. അതിനാല്‍ മുകളിലേക്ക് കയറാൻ ഉചിതമായ സ്ഥലത്ത് കോവണി സ്ഥാപിക്കണമെന്നും, രണ്ടാം നമ്ബർ പ്ലാറ്റ്‌ഫോമിലും എസ്‌കലേറ്റർ സ്ഥാപിക്കണമെന്നും ഡിവിഷണല്‍ റെയില്‍വേ മാനേജരോട് തലശ്ശേരി റെയില്‍വേ പാസ്സഞ്ചേഴ്സ് അസോസിയേഷൻ ഭാരവാഹികള്‍ അഭ്യർത്ഥിച്ചു.
