പേരാവൂർ: 70 വയസ് തികഞ്ഞവർക്ക് കേന്ദ്രം പ്രഖ്യാപിച്ച ആയുഷ്മാൻ ഭാരത് ആരോഗ്യ ഇൻഷുറൻസിന്റെ വിശദവിവരങ്ങൾ കേന്ദ്ര സർക്കാർ ഉടൻ പ്രഖ്യാപിക്കണമെന്ന് സീനിയർ സിറ്റിസൺസ് ഫോറം ജില്ലാ കമ്മിറ്റിയും ജില്ലാ സമ്മേളന സംഘാടക സമിതിയുംആവശ്യപ്പെട്ടു. പദ്ധതിയെക്കുറിച്ച് ഗുണഭോക്താക്കൾക്കുള്ള സംശയങ്ങൾ ദുരീകരിക്കാനാവശ്യമായ നടപടികൾ ബന്ധപ്പെട്ടവർ സ്വീകരിക്കണമെന്നും സംയുക്ത യോഗം ആവശ്യപ്പെട്ടു.

ജില്ലാ പ്രസിഡന്റ് അബ്രഹാം തോണക്കര അധ്യക്ഷത വഹിച്ചു. മാലൂർ.പി.കുഞ്ഞികൃഷ്ണൻ, കെ.സി. വേണുഗോപാലൻ, ഗംഗാധരൻ കോലഞ്ചിറ, കെ.പദ്മനാഭൻ, കെ.കെ.മുകുന്ദൻ, കെ.രവീന്ദ്രൻ, സി.നാരായണൻ, എം.പി.ഭട്ടതിരിപ്പാട്, ബാവ നാരായണൻ എന്നിവർ സംസാരിച്ചു. ജില്ലാ സമ്മേളനത്തിന്റെ ഭാഗമായി ജനുവരി രണ്ടിന് പേരാവൂരിൽ വിളംബര ജാഥ നടത്തുമെന്ന് സംഘാടക സമിതി അറിയിച്ചു.

പേരാവൂർ: സ്റ്റേജ് വർക്കേഴ്‌സ് യൂണിയൻ (സി.ഐ.ടി.യു) പേരാവൂർ ഏരിയ സമ്മേളനം സംസ്ഥാന വർക്കിംഗ് പ്രസിഡന്റ് അഴീക്കോടൻ ചന്ദ്രൻ ഉദ്ഘാടനം ചെയ്തു.യൂണിയൻ അംഗം പാറുക്കുട്ടി പതാകയുയർത്തി. ഏരിയാ പ്രസിഡന്റ് ജിജീഷ് വായന്നൂർ അധ്യക്ഷനായി.സ്റ്റേജ് വർക്കേഴ്‌സ് യൂണിയൻ നിർമിക്കുന്നമുദ്രണം സിനിമയുടെ സ്വിച്ച് ഓൺ ജില്ലാ സെക്രട്ടറി ഗോപകുമാർ നിർവഹിച്ചു. ഫ്രാൻസിസ്, രാജീവ് നടുവനാട് , ടി.കെ.ബാഹുലേയൻ, ജിനീഷ് മംഗലത്ത് എന്നിവർ സംസാരിച്ചു. മുതിർന്ന കലാകാരന്മാരെയും വിവിധ മേഖലകളിൽ മികവ് തെളിയിച്ചവരെയും അനുമോദിച്ചു.

പേരാവൂർ : എറണാകുളത്ത് നടന്ന ഒന്നാമത് സ്കൂൾ ഒളിമ്പിക്സ് സംസ്ഥാന ഹാൻഡ്‌ബോൾ ചാമ്പ്യൻഷിപ്പിൽ പേരാവൂർ സെയ്ന്റ് ജോസഫ് എച്ച്. എസ്. എസ് വിദ്യാർത്ഥിനി റന ഫാത്തിമ വെള്ളി മെഡൽ നേടി. റന ഉൾപ്പെടുന്ന കണ്ണൂർ ജില്ല ടീമാണ് വെള്ളി മെഡൽ നേടിയത്. കഴിഞ്ഞ വർഷവും സംസ്ഥാന സ്കൂൾ ഗെയിംസിൽ റന വെള്ളി മെഡൽ നേടിയിരുന്നു.പേരാവൂർ കഞ്ഞിരപ്പുഴ മുണ്ടായിൽ അയൂബിന്റെയും കെ.സുഫീറയുടെയും മകളാണ്. തങ്കച്ചൻ കോക്കാട്ടാണ് പരിശീലകൻ.