പാടിയോട്ടുചാൽ:ഹാൻഡ്‌ബോളിലെ വയക്കര പെരുമ വേറെ ലെവലാണ്‌. ദേശീയതലത്തിൽ വയക്കരയുടെ പേര്‌ നാലുപതിറ്റാണ്ടായി ഉയർത്തിനിർത്താൻ ഒട്ടേറെ കായികപ്രതിഭകളുടെ കഠിനാധ്വാനമുണ്ട്‌. 1985ൽ പി ദാമോദരനെന്ന കായികാധ്യാപകന്റെ വരവോടെയാണ് വയക്കര ഗവ. ഹയർസെക്കൻഡറി സ്‌കൂൾ കൈപ്പന്തുകളിയുടെ ലോകം കീഴടക്കാൻ തുടങ്ങിയത്. സംസ്ഥാന ജൂനിയർ ഹാൻഡ്ബോൾ ചാമ്പ്യൻഷിപ്പിൽ സ്ഥിരം ചാമ്പ്യന്മാരും ഇവർതന്നെ. സൈനിക ടീമുകളായ ബാംഗ്ലൂർ എം.ഇ.ജി, ഊട്ടി എം.ആർ.സി, ഗോവ സിഗ്നൽസ്, ബാംഗ്ലൂർ എ.ഒ.സി, നാഗ്പുർ ഗാർഡ്‌സ്, വിശാഖപട്ടണം സി.ഐ.എസ്എഫ്, ഇന്ത്യൻ നേവി, ഇന്ത്യൻ റെയിൽവേ എന്നിവിടങ്ങളിൽ വയക്കരയുടെ കുട്ടികൾ ഇടംനേടി. സർക്കാർ സർവീസിൽ കയറിയവരും അനേകം. 2006-–- 07 ൽ മാത്രം ദേശീയ മത്സരങ്ങൾക്കായി കേരളത്തിനുവേണ്ടി ഇറങ്ങിയ വയക്കരക്കാർ 111 പേരാണ്. ജൂനിയർ നാഷണൽ മീറ്റിൽ പങ്കെടുക്കുന്ന സംസ്ഥാന ടീമിൽ വർഷങ്ങളായി പകുതിയിലധികം പേരും ഇവിടുത്തെ കുട്ടികൾ.കോമൺവെൽത്ത് ഗെയിംസ്, ഏഷ്യൻ ജൂനിയർ ചാമ്പ്യൻഷിപ്പ്, സാഫ് ഗെയിംസ്, ഏഷ്യൻ ഗെയിംസ് എന്നിവയിൽ വയക്കരയുടെ കൈയൊപ്പുണ്ട്‌. ലോക സർവകലാശാലാ ചാമ്പ്യൻഷിപ്പിൽ ഇന്ത്യൻ ടീമിന്റെ വൈസ് ക്യാപ്റ്റൻ ഉൾപ്പെടെയുള്ളവർ വയക്കരയുടെ താരങ്ങൾ. ജൂനിയർ ഗേൾസ് ചാമ്പ്യൻഷിപ്പിൽ 1995 മുതൽ തുടർച്ചയായി 11 തവണ ഒന്നാംസ്ഥാനം. 1989 മുതൽ സബ് ജൂനിയർ ഗേൾസ് ചാമ്പ്യൻഷിപ്പിൽ തുടർച്ചയായി ഒന്നാംസ്ഥാനം. സ്കൂളിൽ എം.എൽ.എ ഫണ്ടിൽനിന്നും ഒന്നരക്കോടി രൂപ മുടക്കി ഇൻഡോർ സ്റ്റേഡിയവും നിർമിച്ചു. സംസ്ഥാനബജറ്റിൽ മൂന്നുകോടിയും അനുവദിച്ചു. പെൺകുട്ടികൾക്ക് ഹോസ്റ്റലുണ്ട്. മുമ്പുണ്ടായിരുന്ന ഡേബോർഡിങ്‌ കേന്ദ്രം പുനസ്ഥാപിച്ചു കിട്ടണമെന്നാണ് ഇവരുടെ ആവശ്യം.
റിട്ട. കായികാധ്യാപകൻ പി ദാമോദരൻ, കോച്ച് കെ ധനേഷ്, സ്കൂൾ കായികാധ്യാപകൻ ഇ.വി പ്രമോദ്കുമാർ, മുൻ ഹാൻഡ്ബോൾ താരവും റിട്ട. ആർമി ഉദ്യോഗസ്ഥനുമായ ടി രാമകൃഷ്ണൻ എന്നിവരാണ് പരിശീലകർ.

കണ്ണൂർ: ജില്ലയിൽ അഞ്ച്‌ ആയുഷ് സ്ഥാപനങ്ങൾക്ക് കൂടി ഗുണനിലവാര മാനദണ്ഡമായ നാഷണൽ അക്രഡിറ്റേഷൻ ബോർഡ്‌ ഓഫ്‌ ഹോസ്‌പിറ്റൽസ്‌ (എൻ എ ബി എച്ച്‌) അംഗീകാരം.പട്ടുവം, കതിരൂർ, കാങ്കോൽ ആയുർവേദ ഡിസ്പൻസറികൾ കല്യാശേരി, മട്ടന്നൂർ ഹോമിയോ ഡിസ്പൻസറികൾ എന്നിവക്കാണ് ദേശീയ സർട്ടിഫിക്കേഷൻ.ജില്ലയിൽ ആയുഷ് ഹെൽത്ത് ആൻഡ്‌ വെൽനസ്‌ സെന്ററായി ഉയർത്തിയ 57 സ്ഥാപനങ്ങളിൽ 13 എണ്ണത്തിനാണ് ആദ്യ ഘട്ടത്തിൽ അംഗീകാരം ലഭിച്ചത്.പ്രാഥമിക ആരോഗ്യ സേവനം പരമാവധി നൽകുക, ആരോഗ്യ പദ്ധതികൾ നടപ്പാക്കുക, രോഗ പ്രതിരോധ പ്രവർത്തനം നടത്തുക എന്നിവയാണ്‌ ആയുഷ് സെന്ററുകളുടെ ഉത്തരവാദിത്വം.

മാഹി: മാഹി സെന്റ്റ് തെരേസാ ബസിലിക്കയിൽ വിശുദ്ധ അമ്മത്രേസ്യയുടെ തിരുനാൾ ജാഗരത്തിൽ പങ്കെടുക്കാൻ ആയിരങ്ങളെത്തി. ദേവാലയത്തിന് മുന്നിലെ ദേശീയപാതയിൽ നടന്ന ശയന പ്രദക്ഷിണത്തിൽ നൂറുകണക്കിന് തീർഥാടകർ പങ്കെടുത്തു. ചൊവ്വാഴ്ച‌ പുലർച്ചെ രണ്ടിന് ആരംഭിച്ച ചടങ്ങുകൾ രാവിലെ ഏഴോടെ സമാപിച്ചു. കേരളത്തിനകത്തും പുറത്തുനിന്നുമായി തീർഥാടകർ എത്തിയതോടെ മാഹിനഗരം ജനത്തിരക്കിലമർന്നു. പൂർണദണ്ഡ വിമോചന ദിനമായ ചൊവ്വാഴ്ച രാവിലെ കോഴിക്കോട് രൂപതാ മെത്രാൻ ഡോ. വർഗീസ് ചക്കാലക്കലിനെയും
കണ്ണൂർ രൂപത നിയുക്ത സഹായ മെത്രാൻ ഡെന്നീസ് കുറുപ്പശേരി യെയും കോഴിക്കോട് രൂപത വി കാരി ജനറൽ ഡോ. ജെൻസെൻ പുത്തൻവീട്ടിൽ സ്വീകരിച്ചു. തുടർന്ന് ആഘോഷ ദിവ്യബലിയും പ്രദക്ഷിണവുമുണ്ടായി.
വൈകിട്ട് സ്നേഹസംഗമം രമേശ് പറമ്പത്ത് എംഎൽഎ ഉദ്ഘാടനം ചെയ്തു. ഫാ. വർഗീസ് ചക്കാലക്കൽ അധ്യക്ഷനാ യി. ഇ വത്സരാജ്, എം മുകുന്ദൻ, ജി ശരവണൻ, എം കെ സെയ്നു, തോട്ടത്തിൽ ശശിധരൻ, സിസ്റ്റർ. വിജയ, സിസ്റ്റർ. മേരി മഗ്ഡെ ലെൻ, പ്രൊഫ. ഡോ. ആന്റണി ഫെർണാണ്ടസ് എന്നിവർ സംസാരിച്ചു. ഡോ. ജെൻസെൻ
പുത്തൻവീട്ടിൽ സ്വാഗതവും ഷിബു കല്ലാമല നന്ദിയുംപറഞ്ഞു.തിരുന്നാൾ 22ന് സമാപിക്കും.