ഇരിട്ടി: 4 പതിറ്റാണ്ട് അയ്യൻകുന്ന് പഞ്ചായത്തിന്റെ വിവിധ പ്രദേശങ്ങളെ കോർത്തിണക്കിയ ആനപ്പന്തിപ്പാലം ചരിത്രമാകുന്നു. റോഡിന്റെ വീതിയിൽ പുതിയ പാലം പണിയുന്നതിനായി നിലവിലെ പാലം പൊളിച്ചു തുടങ്ങി. കുടിയേറ്റം കഴിഞ്ഞു നാട് വികസനത്തിലേക്കു നീങ്ങുമ്പോൾ കൊണ്ടൂർ പുഴയിൽ പാലം ഇല്ലായിരുന്നു. ആനപ്പന്തിക്ക് അപ്പുറവും ഇപ്പുറവും താമസിക്കുന്നവർക്കു തൊട്ടടുത്ത പ്രദേശങ്ങളിലേക്കും പഞ്ചായത്തുകളിലേക്കും ഗതാഗതവും പ്രതിസന്ധിയിൽ ആയിരുന്നു.കെ.പി.നൂറുദ്ദീൻ എംഎൽഎ ആയിരുന്നപ്പോൾ 1982ൽ മരാമത്ത് പദ്ധതി പ്രകാരം നിർമിച്ച ബോക്സ് പാലം ആണു മലയോര ഹൈവേ വികസനത്തിന്റെ ഭാഗമായി പൊളിച്ചു പുതിയ പാലം പണിയുന്നത്. തറപ്പേൽ കടവിൽ വെമ്പുഴയിലും മുടയരിഞ്ഞി കോറയിൽ ചരൾ പുഴയിലുമായി3 പാലങ്ങളാണ് അന്നു നിർമിച്ചത്. നിലവിലുള്ള ആനപ്പന്തി കോൺക്രീറ്റ് പാലത്തിനു ബലക്ഷയം ഉണ്ടായിരുന്നില്ല. കാലപ്പഴക്കം കണക്കിലെടുത്താണു പാലം പുനർനിർമിക്കുന്നത്. പാലം പണി നടക്കുമ്പോൾ ഗതാഗതം പ്രതിസന്ധിയിലാകാതിരിക്കാൻ സർവീസ് റോഡ് നിർമിച്ചിട്ടുണ്ട്. 3 മാസത്തിനകം പാലം പണി പൂർത്തിയാക്കുകയാണ് ലക്ഷ്യം.

പണിയുന്നത് 3 പാലങ്ങൾ; ലക്ഷ്യം സംസ്ഥാനപാതാ നിലവാരം

മലയോര ഹൈവേയുടെ വള്ളിത്തോട് – മണത്തണ റീച്ചിലെ 25.3 കിലോമീറ്റർ റോഡ് 83.17 കോടി രൂപ ചെലവിൽ വീതികൂട്ടി നിലവാരം മെച്ചപ്പെടുത്തൽ പ്രവൃത്തി നടത്തുന്നതിന്റെ ഭാഗമായി വെമ്പുഴ, ആനപ്പന്തി, ചേംതോട് പാലങ്ങളാണു കെആർഎഫ്ബി പുനർനിർമിക്കുന്നത്. പാലങ്ങളുടെ വീതി 12.5 മീറ്ററാണ്. 9 മീറ്റർ ടാറിങ് വീതിയും ഇരുവശത്തും കൈവരിയോടു കൂടി 1.75 മീറ്റർ വീതം നടപ്പാതകളും. വെമ്പുഴ പാലത്തിന് 16 മീറ്ററും ആനപ്പന്തി പാലത്തിന് 20 മീറ്ററും ചേംതോട് പാലത്തിന് 13.5 മീറ്ററുമാണ് വീതി.

കഴിഞ്ഞ ജൂണിൽ 3 പാലങ്ങളും പൂർത്തിയാക്കാൻ ലക്ഷ്യമിട്ടു ജനുവരിയിൽ എടൂർ വെമ്പുഴ പാലവും പിന്നീട് ചേംതോട് പാലവും പൊളിച്ച് പണി തുടങ്ങിയെങ്കിലും പ്രവൃത്തി നീണ്ടു. വെമ്പുഴ പാലം ഈ മാസം അവസാനത്തോടെയും ചേംതോട് പാലം ജനുവരി അവസാനത്തോടെയും ഗതാഗതത്തിനു തുറന്നു കൊടുക്കാനാകുമെന്ന് കെആർഎഫ്ബി അസിസ്റ്റന്റ് എക്സിക്യൂട്ടീവ് എൻജിനീയർ പി.സജിത്ത് അറിയിച്ചു. മലയോര ഹൈവേയുടെ നിലവാരം സംസ്ഥാന പാതയ്ക്കു തുല്യമാണെങ്കിലും ആദ്യ ഘട്ടത്തിൽ പണി നടന്ന ഈ 25.3 കിലോമീറ്റർ ദൂരത്ത് 5.5 മീറ്റർ വീതിയിലും 6 മീറ്റർ വീതിയിലും ടാറിങ്ങാണു നിലവിൽ ഉള്ളത്.

ഇരിട്ടി : പൊലീസിന്റെ പതിവു നടപടിക്രമം അനുസരിച്ചാണെങ്കിൽ ഇരിട്ടിയിൽ നിന്നു ചെന്നൈയിലെത്തി മൃതദേഹം ഇൻക്വസ്റ്റ് നടത്താൻ രണ്ടു ദിവസമെടുക്കും. എന്നാൽ, അപകടത്തിൽ മരിച്ച തമിഴ്നാട് സ്വദേശി എസ്.ഗൗതമിന്റെ ഇൻക്വസ്റ്റ് പൂർത്തിയാക്കാനെടുത്തത് 8 മണിക്കൂർ!എല്ലാറ്റിനും നേതൃത്വം നൽകിയത് എസ്എച്ച്ഒ എ.കുട്ടിക്കൃഷ്ണനും എസ്ഐ റെജി സ്കറിയയും. ചെന്നൈയിൽ ഐടി ജീവനക്കാരനായ റെഡ്ഹിൽസിലെ എസ്.ഗൗതം (28) സുഹൃത്തുക്കൾക്കൊപ്പം ബെംഗളൂരു വഴി കോഴിക്കോട്ടേക്കു തിരിച്ചത് നവംബർ ഒന്നിനാണ്. രണ്ടാം തീയതി ഇരിട്ടി കിളിയന്തറയിൽ ഇവർ സഞ്ചരിച്ച കാർ ലോറിയുമായി കൂട്ടിയിടിച്ചു. ഗുരുതരമായി പരുക്കേറ്റ ഗൗതം കണ്ണൂരിലെ ആശുപത്രിയിൽ 28 ദിവസം അബോധാവസ്ഥയിൽ കഴിഞ്ഞു. 29നു ചെന്നൈയിലെ ആശുപത്രിയിലേക്കു കൊണ്ടുപോയി.

ഇന്നലെ രാവിലെ 8.30ന് ഗൗതം മരിച്ചെന്ന വിവരം എസ്എച്ച്ഒ കുട്ടിക്കൃഷ്ണനു ലഭിച്ചു. അപകടം ഇവിടെയായതിനാൽ ഇരിട്ടി പൊലീസ് എത്തി വേണം ഇൻക്വസ്റ്റ് നടത്താൻ. ഇതിനു ശേഷമേ പോസ്റ്റ്മോർട്ടം ചെയ്യൂ. പതിവു ചട്ടപ്രകാരമാണെങ്കിൽ ബന്ധുക്കൾ 2 ദിവസം കാത്തിരിക്കണം. ഒരുമാസം ജീവിതത്തിനും മരണത്തിനുമിടയിലെ നൂൽപാലത്തിലൂടെ സഞ്ചരിച്ച മകന്റെ അവസ്ഥ കണ്ട ഷൺമുഖത്തിനും കലാവതിക്കും മൃതദേഹവും വച്ച് കാത്തിരിക്കാനാവുമായിരുന്നില്ല. അതോടെ, പതിവുരീതികൾ മാറ്റിവയ്ക്കാൻ കുട്ടിക്കൃഷ്ണൻ തീരുമാനിച്ചു.നൈറ്റ് ഡ്യൂട്ടി കഴിഞ്ഞ് മടങ്ങാൻ തുടങ്ങിയ റൈറ്റർ മജീദും നവാസും നടപടി ക്രമങ്ങൾ വേഗം തീർത്തു. തലേന്ന് ഡ്യൂട്ടി കഴിഞ്ഞു വീട്ടിലേക്കുപോയ എസ്ഐ റെജി സ്കറിയയെ വിളിച്ചുവരുത്തി.

കണ്ണൂരിൽനിന്നു ചെന്നൈയിലേക്ക് 11.10നു വിമാനമുണ്ടെന്നും ഒരു സീറ്റ് ഒഴിവുണ്ടെന്നും അറിഞ്ഞു. ടിക്കറ്റ് ചാർജ് 3500 രൂപ. ടിക്കറ്റിനുള്ള പണം കുട്ടിക്കൃഷ്ണൻ നൽകി. പകരം വസ്ത്രം പോലും എടുക്കാതെ റെജി സ്കറിയ ചെന്നൈയിലേക്കു തിരിച്ചു. 12.20ന് അവിടെയെത്തി. ഇൻക്വസ്റ്റ് പൂർത്തിയാക്കി പോസ്റ്റ്മോർട്ടത്തിനു ശേഷം മൃതദേഹം ബന്ധുക്കൾ ഏറ്റുവാങ്ങുമ്പോൾ ‌സമയം വൈകിട്ട് 4.30. പൊലീസിന്റെ നല്ല മനസ്സിനു നന്ദി പറയാനുള്ള മാനസികാവസ്ഥയിലായിരുന്നില്ല ഗൗതമിന്റെ ബന്ധുക്കൾ. എന്നാൽ, ഗൗതമിന്റെ അച്ഛൻ ഷൺമുഖം വിങ്ങിപ്പൊട്ടി റെജി സ്കറിയയെ ചേർത്തുപിടിച്ചു. അതിൽ എല്ലാമുണ്ടായിരുന്നു.

കിഫ്ബി പദ്ധതിയിൽ ഉൾപ്പെടുത്തി നവീകരിക്കുന്ന മലയോര ഹൈവേ വള്ളിത്തോട് അമ്പായത്തോട് റോഡിൽ ആനപ്പന്തിപാലം മുഴുവനായും പൊളിച്ചു മാറ്റി പുനർ നിർമ്മിക്കുന്നതിനാൽ ഡിസംബർ രണ്ട് മുതൽ ആ ഭാഗത്തു കൂടിയുള്ള വാഹന ഗതാഗതം പൂർണമായി നിരോധിക്കുന്നതായി കെ.ആർ.എഫ്ബി അസി. എഞ്ചിനീയർ അറിയിച്ചു.
ഇതിനോട് ചേർന്ന് നിർമ്മിച്ച അനുബന്ധ റോഡ് വഴി വാഹനങ്ങൾ കടന്നുപോകണം.