കോളയാട് : കൂത്തുപറമ്പിൽ നിന്ന് കണ്ണവം- കോളയാട്- ആലച്ചേരി -അറയങ്ങാട് വഴി തൃക്കടാരിപ്പൊയിൽ ബസ് സ്റ്റാൻഡ് വരെ ബസ് സർവീസ് വേണമെന്ന് നാട്ടുകാർ ആവശ്യപ്പെട്ടു. അറയങ്ങാട് സ്നേഹഭവൻ വരെ രണ്ട് ബസുകൾ വന്ന് പോകുന്നതൊഴിച്ചാൽ നിലവിൽ ആലച്ചേരി വരെയാണ് ബസ് സർവീസുള്ളത്.കോളയാട്- ആലച്ചേരി -അറയങ്ങാട് തൃക്കടാരിപ്പൊയിൽ മാലൂർ വഴി മട്ടന്നൂര് വരെ അഞ്ചരമീറ്റർ വീതിയിൽ മെക്കാഡം ടാറിങ് ഉണ്ടെങ്കിലും ബസ് സർവീസില്ല. ഇതുവഴി ബസ്സ് സർവീസ് ഉണ്ടായാൽ നൂറ് കണക്കിന് യാത്രക്കാർക്ക് ഉപകാരപ്രദമാകും. ഇക്കാര്യമാവശ്യപ്പെട്ട് എം.എൽ. എയുടെ മണ്ഡലം അദാലത്തിൽ ഇടുമ്പ സ്വദേശി വാഴയിൽ ഭാസ്ക്കരൻ ആർ.ടിഒക്ക് നിവേദനം നൽകി.

കോളയാട് : ആലച്ചേരി സ്വദേശി കരുണാകരൻ (86) കണ്ണൂർ സെൻട്രൽ ജയിലിൽ സഹതടവുകാരൻ്റെ അടിയേറ്റ് മരിച്ചു. വടി കൊണ്ടുള്ള അടിയേറ്റതാണ് മരണകാരണമെന്ന് പോസ്റ്റ്മോർട്ടം റിപ്പോർട്ട്. കണ്ണൂർ ടൗൺ ഇൻസ്പെക്ടർ ശ്രീജിത്ത് കൊടേരിയുടെ നേതൃത്വത്തിൽ ജയിലിൽ അന്വേഷണം തുടങ്ങി.

കോളയാട്: പെരുവ ഉരുപൊട്ടലിനെ തുടർന്ന് പാലത്തുവയൽ ഗവ.യു.പി സ്‌കൂളിൽ ഏർപ്പെടുത്തിയ ദുരിതാശ്വാസ ക്യാമ്പ് നിർത്തി. കഴിഞ്ഞ ഒരാഴ്ചയായി പ്രവർത്തിച്ച ക്യാമ്പാണ് മഴ മാറിയതോടെ അവസാനിപ്പിച്ചത്. കോളയാട് പഞ്ചായത്ത് പ്രസിഡന്റ് എം. റിജി , പഞ്ചായത്തംഗങ്ങളായ ശ്രീജ പ്രദീപ്, റോയ് പൗലോസ്, വില്ലേജ് അസിസ്റ്റന്റ് റോഷൻ തുടങ്ങിയവർ ക്യാമ്പ് അംഗങ്ങൾക്ക് യാത്രയയപ്പ് നൽകി

ജൂലൈ 30ന് പുലർച്ചെയാണ് കണ്ണവം വനത്തിലെ കൊളപ്പ, തെറ്റുമ്മൽ, ചെമ്പുക്കാവ് തുടങ്ങിയ പ്രദേശങ്ങളിൽ നിരവധി സ്ഥലത്ത് ഉരുൾ പൊട്ടിയത്. 100 -ൽ പരം വീടുകളിൽ വെള്ളം കയറുകയും നിരവധി കുടുംബങ്ങൾ ഒറ്റപ്പെടുകയുമുണ്ടായി. 25 കുടുംബങ്ങളിൽ നിന്നായി 54 പേർ ഒരാഴ്ച ദുരിതാശ്വാസ ക്യാമ്പിലാണ് കഴിഞ്ഞത്.