പയ്യന്നൂർ:കത്തിനായി കാത്തിരുന്ന കാലം ഓർമയായെങ്കിലും തപാൽ ഓഫീസുകൾ ഇന്നും ജനത്തിന്‌ ഉപകാരമാണ്‌. കത്തുകളുടെ കൈമാറ്റത്തിനപ്പുറം പാർസലും ഇ –- സേവനങ്ങളും കുറഞ്ഞ ചെലവിൽ നടക്കുന്ന സേവന കേന്ദ്രം. എന്നാൽ ആശയവിനിമയ കേന്ദ്രമായി പ്രവർത്തിക്കുന്ന ജില്ലയിലെ പ്രധാന തപാൽ കേന്ദ്രമായ പയ്യന്നൂർ ഓഫീസ് അസൗകര്യങ്ങളിൽ വീർപ്പുമുട്ടുകയാണ്. നഗരത്തിലെ പ്രധാന റോഡരികിൽ സ്വന്തമായി 20 സെന്റ് സ്ഥലമുള്ള തപാൽ ഓഫീസ് വാടകക്കെട്ടിടങ്ങളിൽ മാറിമാറി പ്രവർത്തിച്ചുവരികയാണ്. 1991ൽ പൊന്നും വില കൊടുത്ത്‌ റെയിൽവെ സ്‌റ്റേഷൻ റോഡരികിൽ സ്വന്തമായി കെട്ടിടം നിർമിക്കാൻ ഭൂമി വാങ്ങിയിരുന്നു. കെട്ടിടം നിർമിക്കുന്നതിനുള്ള പദ്ധതികളും തുടങ്ങി. മൊബൈൽ ഫോണുകളുടെയും മറ്റും വരവോടെ ജനങ്ങൾ തപാൽ വകുപ്പിന്റെ സേവനം പതിയെ ഉപേക്ഷിക്കാൻ തുടങ്ങിയതോടെ കെട്ടിടം നിർമിക്കാനുള്ള ശ്രമവും നിർത്തി.
ഇപ്പോൾ സെന്റ് മേരീസ് സ്‌കൂളിന് സമീപമാണ് ഓഫീസ്‌ പ്രവർത്തിക്കുന്നത്.

ഈ കെട്ടിടത്തിനുള്ള കരാർ ഈ മാസം അവസാനിക്കും. അസൗകര്യങ്ങളാൽ വീർപ്പുമുട്ടുന്ന ഇവിടുത്തെ ഓഫീസ് മാറ്റണമെന്നാണ്‌ ഉപഭോക്താക്കളുടെ വർഷങ്ങളായുള്ള ആവശ്യം. ഇത് ഇവിടെത്തന്നെ നിലനിർത്താനും ശ്രമം നടക്കുന്നുണ്ട്. ഇവിടെ വാഹനം പാർക്കു ചെയ്യാൻ സൗകര്യമില്ല. പണിപ്പെട്ടാണ് ജീവനക്കാർ ഒന്നാംനിലയിലേക്ക് തപാൽ ഉരുപ്പടി എത്തിക്കുന്നത്. പ്രായമായവർക്കും അംഗപരിമിതർക്കും ഇവിടെയെത്താനും ബുദ്ധിമുട്ടുന്നു.
പയ്യന്നൂർ പോസ്‌റ്റ് ഓഫീസിനു കീഴിൽ 12 ബ്രാഞ്ചാണുള്ളത്. പയ്യന്നൂർ റെയിൽവേ സ്‌റ്റേഷനിലെ ഉരുപ്പടികളുംഎത്തിക്കുന്നത് ഇവിടെയാണ്. ഒരു പോസ്‌റ്റ് മാസ്‌റ്ററും എട്ട് പോസ്‌റ്റൽ അസിസ്‌റ്റന്റുമാരും എട്ട് പോസ്‌റ്റ്മാന്മാരും മൂന്ന് മൾട്ടി ടാസ്‌ക് അംഗങ്ങളുമടക്കം 20 ജീവനക്കാർ ശ്വസംമുട്ടിയാണ് ഇവിടെ സേവനം നടത്തുന്നത്.

എസ്ബി, ആർഡി, എം.ഐ.എസ്, സീനിയർ സിറ്റിസൺ തുടങ്ങി അമ്പതിനായിരത്തിലധികം അക്കൗണ്ടുകളും ഇവിടെ കൈകാര്യം ചെയ്യുന്നു.തപാൽ വകുപ്പ് അതിന്റെ പഴയ പ്രതാപത്തിലേക്ക് തിരിച്ചുവരികയാണ്. ഈ ഘട്ടത്തിൽ പയ്യന്നൂരിലെ മുഖ്യ തപാൽ ഓഫീസിനായി സ്വന്തം ഭൂമിയിൽ ആധുനിക സൗകര്യങ്ങളോടെ കെട്ടിടം നിർമിക്കണമെന്നും അതുവരെ കേന്ദ്ര പൊതുമേഖലാ സ്ഥാപനങ്ങൾക്ക് കീഴിലുള്ള കെട്ടിടങ്ങളിലേക്ക് പോസ്‌റ്റ് ഓഫീസിന്റെ പ്രവർത്തനം മാറ്റണമെന്നുമാണ്‌ നാട്ടുകാരുടെ ആവശ്യം.

കണ്ണൂർ: കൃഷ്ണമേനോൻ മെമ്മോറിയൽ ഗവ. വനിത കോളേജിൽ ഫിസിക്‌സ് വിഷയത്തിൽ ഗസ്റ്റ് അധ്യാപകരെ നിയമിക്കുന്നു. കോളേജ് വിദ്യാഭ്യാസ ഡെപ്യൂട്ടി ഡയറക്ടറുടെ കോഴിക്കോട് ഓഫീസിൽ പേര് രജിസ്റ്റർ ചെയ്ത ഉദ്യോഗാർഥികൾ അസ്സൽ സർട്ടിഫിക്കറ്റുകൾ സഹിതം ഒക്ടോബർ 16ന് രാവിലെ 10.30ന് പ്രിൻസിപ്പൽ മുമ്പാകെ കൂടിക്കാഴ്ചക്ക് ഹാജരാകണം.ഫോൺ: 04972746175.

കണ്ണൂർ : കേരള തൊഴിലാളി ക്ഷേമനിധി ബോർഡിലെ വരിക്കാരായ തൊഴിലാളികളുടെ മക്കൾക്ക് വിദ്യാഭ്യാസ ആനുകൂല്യത്തിന് ഓൺലൈനായി അപേക്ഷ ക്ഷണിച്ചു.2024-25 അധ്യയന വർഷത്തിൽ എട്ട്, ഒമ്പത്, പത്ത്, പ്ലസ് വൺ ക്ലാസുകൾ മുതൽ ബിരുദ ബിരുദാനന്തര കോഴ്സുകൾ, പ്രൊഫഷണൽ കോഴ്സുകൾ, ഡിപ്ലോമ കോഴ്സുകൾ, കോച്ചിങ്ങ് ഉൾപ്പെടെ പഠിക്കുന്നവർക്ക് അപേക്ഷിക്കാം.മുൻ അധ്യയന വർഷങ്ങളിൽ ആനുകൂല്യം ലഭിച്ചവർ ആനുകൂല്യം പുതുക്കുന്നതിന് അപേക്ഷ ഓൺലൈനായി സമർപ്പിക്കണം. അപേക്ഷകൻ ജോലി ചെയ്യുന്ന സ്ഥാപന ഉടമയുടെ സാക്ഷ്യപത്രം എന്നിവയുടെ മാതൃക വെബ് സൈറ്റിൽ നിന്നും ഡൗൺ ലോഡ് ചെയ്ത് സാക്ഷ്യപ്പെടുത്തിയ ശേഷം അപേക്ഷ സമർപ്പിക്കണം. www.labourwelfarefund.in വെബ്‌സൈറ്റ് മുഖേന നവംബർ 25നകം അപേക്ഷ സമർപ്പിക്കണം.