കണ്ണൂർ:ജില്ലയിൽ ഈ അധ്യയന വർഷം പ്ലസ് വൺ 35,700 സീറ്റുകൾ. ഇതിൽ സർക്കാർ സ്‌കൂളുകളിൽ 19,860 സീറ്റുകളും എയ്ഡഡ് സ്കൂളുകളിൽ 13,390 സീറ്റുകളും അൺ-എയ്ഡഡ് സ്കൂളുകളിൽ 2450 സീറ്റുകളുമാണ് ഉള്ളത്.

2022-23 അധ്യയന വർഷം താത്കാലികമായി അനുവദിച്ച സീറ്റുകൾ ഇത്തവണയും ഉണ്ട്. സർക്കാർ സ്കൂളുകളിൽ 975-ഉം എയ്ഡഡിൽ 240-ഉം ആണ് അധികം അനുവദിച്ചിരുന്നത്.

2023-24 അധ്യയന വർഷത്തിൽ ജില്ലയിൽ എസ്.എസ്.എൽ.സി പരീക്ഷ എഴുതിവരിൽ 36,024 പേരാണ് ഉപരി പഠനത്തിന് യോഗ്യത നേടിയത്. കണ്ണൂർ ഉൾപ്പെടെ ഏഴ് ജില്ലകളിലെ സർക്കാർ സ്കൂളുകളിൽ 30 ശതമാനം മാർജിനൽ വർധനവും (50+15) ആവശ്യമെങ്കിൽ എയ്ഡഡ് സ്കൂളുകൾക്ക് 10 ശതമാനം മാർജിനൽ സീറ്റ് വർധനവും (50+5) അനുവദിച്ചിട്ടുണ്ട്.

ആശങ്ക വേണ്ടെന്നും ജില്ലയിൽ എല്ലാ വിദ്യാർഥികൾക്കും പ്ലസ് വൺ പ്രവേശനം ഉറപ്പാക്കുമെന്നും അധികൃതർ അറിയിച്ചു. ഇപ്പോൾ പകുതി പോലും കുട്ടികൾ ഏകജാലകത്തിൽ രജിസ്റ്റർ ചെയ്തിട്ടില്ലെന്നും 25-ന് ശേഷം സീറ്റുകൾ കുറവെങ്കിൽ ഡയറക്ടറേറ്റിൽ നിന്ന് അധികം സീറ്റുകൾ അനുവദിക്കുമെന്നും അധികൃതർ അറിയിച്ചിട്ടുണ്ട്.

കഴിഞ്ഞ അധ്യയന വർഷത്തിൽ 34,000-ത്തിൽ അധികം പ്ലസ് വൺ സീറ്റുകൾ ജില്ലക്ക് ഉണ്ടായിരുന്നു. ഇത്തവണ പ്ലസ് വൺ ട്രയൽ അലോട്ട്മെന്റ് 29-നും ആദ്യ അലോട്ട്മെന്റ് ജൂൺ അഞ്ചിനും രണ്ടാം അലോട്ട്മെന്റ് 12-നും മൂന്നാം അലോട്ട്മെന്റ് 19-നും പ്രസിദ്ധീകരിക്കും. ജൂൺ 24-നാണ് പ്ലസ് വൺ ക്ലാസുകൾ ആരംഭിക്കുന്നത്.

കണ്ണൂർ : ഡി.എൽ.എഡ് (അറബിക്, ഉറുദു, ഹിന്ദി, സംസ്കൃതം) പരീക്ഷ മാറ്റി എന്ന തരത്തിലുള്ള പ്രചാരണം തെറ്റാണെന്ന് പരീക്ഷാ ഭവൻ സെക്രട്ടറി അറിയിച്ചു. പരീക്ഷ മുൻ നിശ്ചയിച്ചത് പ്രകാരം മെയ് 20 മുതൽ 29 വരെ നടക്കും.

കണ്ണൂർ : കേരള മഹിളാ സമഖ്യ സൊസൈറ്റിയും കേരള സംസ്ഥാന സാംസ്കാരിക വകുപ്പ് വജ്രജൂബിലി ഫെലോഷിപ്പ് പദ്ധതിയും നടത്തുന്ന ഇരിട്ടി, പേരാവൂർ ബ്ലോക്കിലെ ഗോത്ര വർഗ കുട്ടികൾക്കായുള്ള അവധിക്കാല കലാസാംസ്കാരിക പഠന പരിപാടി “വെയിൽപൂക്കൾ” സമാപിച്ചു. കേളകം വളയംചാൽ സെറ്റിൽമെന്റിൽ നടന്ന ചടങ്ങ് കേളകം പഞ്ചായത്ത്‌ ക്ഷേമകാര്യ സ്റ്റാന്റിങ് കമ്മിറ്റി ചെയർപേഴ്സൺ പ്രീത ഗംഗാധരൻ ഉദ്ഘാടനം ചെയ്തു.  മഹിളാ സമഖ്യ ജില്ലാ പ്രോഗ്രാം കോർഡിനേറ്റർ എൻ.പി. അസീറ അധ്യക്ഷത വഹിച്ചു. കേളകം പോലീസ് എസ്.ഐ എം. രമേശൻ മുഖ്യാതിഥിയായി. വജ്രജൂബിലി ഫെല്ലോഷിപ്പ് നാടൻപാട്ട് കലാകാരി കെ. ലയന വജ്രജൂബിലി ഫെല്ലോഷിപ്പ് പദ്ധതി വിശദീകരിച്ചു.

മഹിളാ സമഖ്യ ജില്ലാ റിസോഴ്സ് പേഴ്സൺ എം. ആതിര, പ്രവർത്തകരായ അനിത കുമാരി, സുമ, സുഷമ, ശ്രീവിദ്യ, ദിവ്യ എന്നിവർ സംസാരിച്ചു. തുടർന്ന് ലയനയുടെ നേതൃത്വത്തിൽ നാടൻപ്പാട്ട് ശിൽപ്പശാല അരങ്ങേറി. കുട്ടികളിൽ ഉറങ്ങി കിടക്കുന്ന കലാവാസനകളെ പരിപോഷിപ്പിക്കുന്നതിന്റെ ഭാഗമായി ചിത്രരചന, നാടകം, നാടൻപ്പാട്ട് സെഷനുകളിലൂടെ രണ്ടാഴ്ചക്കാലം നീണ്ടു നിന്ന പരിപാടിയാണ് “വെയിൽപ്പൂക്കൾ”.