മഹാരാഷ്ട്രയില്‍ എക്സ്പ്രസ് വേയില്‍ ഓടിക്കൊണ്ടിരുന്ന ബസിന് തീപിടിച്ചു; 25 പേര്‍ക്ക് ദാരുണാന്ത്യം
മുംബൈ: മഹാരാഷ്ട്രയിലെ ബുൽധാനയിൽ സമൃദ്ധി മഹാമാർഗ് എക്സ്പ്രസ് വേയിൽ ഓടിക്കൊണ്ടിരുന്ന ബസിന് തീപിടിച്ച് 25 പേർ വെന്തു മരിച്ചു. ശനിയാഴ്ച പുലർച്ചെ രണ്ട് മണിയോടെയായിരുന്നു സംഭവം.
32 യാത്രക്കാരുമായി പോയ ബസിനാണ് തീപിടിച്ചതെന്ന് പോലീസ് പറഞ്ഞു. പരിക്കേറ്റവരെ ആസ്പത്രിയിൽ പ്രവേശിപ്പിച്ചതായി എ.എൻ.ഐ റിപ്പോർട്ട് ചെയ്തു.
നാഗ്പുരിൽ നിന്നും പുണെയിലേക്ക് പോവുകയായിരുന്ന സ്വകാര്യ ബസാണ് അപകടത്തിൽപെട്ടത്. പുലർച്ചെയോടെ ബസ് റോഡരികിലുള്ള തൂണിലിടിച്ച് ഡിവൈഡറിലേക്ക് ഇടിച്ച് കയറി കീഴ്മേൽ മറിയുകയായിരുന്നു.
പിന്നാലെ ബസിന് തീപിടിച്ചുവെന്ന് പോലീസ് വ്യക്തമാക്കി. ബസിലുണ്ടായിരുന്ന യാത്രക്കാരിൽ കൂടുതൽ പേരും നാഗ്പുർ, വർധ, യവത്മൽ എന്നിവിടങ്ങളിൽ നിന്നാണുള്ളവരെന്ന് അധികൃതർ വ്യക്തമാക്കി.
