പഠിച്ചുകൊണ്ടിരിക്കെ മൂർഖൻ പാമ്പിന്റെ കടിയേറ്റ് വിദ്യാർഥി മരിച്ചു
വെള്ളറട: വീട്ടിലിരുന്ന് പഠിക്കുകയായിരുന്ന 10-ാം ക്ലാസ് വിദ്യാർഥി മൂർഖൻ പാമ്പിന്റെ കടിയേറ്റ് മരിച്ചു. പൂഴനാട് എസ്.എസ്.മന്ദിരത്തിൽ ഓട്ടോറിക്ഷ ഡ്രൈവർ സുനിൽകുമാറിന്റെയും മഞ്ജുഷയുടെയും മകൻ അഭിനവ് സുനിൽ (15) ആണ് മരിച്ചത്.
പൂഴനാട് ലൊയോള സ്‌കൂളിലെ വിദ്യാർഥിയാണ്. വ്യാഴാഴ്ച വൈകീട്ടാണ് സംഭവം നടന്നത്. വീട്ടിൽ ഇരുന്ന് പഠിക്കുന്നതിനിടെയാണ് പാമ്പിന്റെ കടിയേറ്റത്.
തുടർന്ന് സമീപത്തെ ആസ്പത്രിയിലും തിരുവനന്തപുരം മെഡിക്കൽ കോളേജാസ്പത്രിയിലും എത്തിച്ചെങ്കിലും ജീവൻ രക്ഷിക്കാനായില്ല.
രാത്രിയോടെ വനംവകുപ്പ് അധികൃതരെത്തി വീട്ടിലെ മുറിയിലെ മൂലയിൽ പതുങ്ങിയിരുന്ന പാമ്പിനെ പിടികൂടി. സഹോദരി: അലോമന സുനിൽ.
