ആര്‍ട്ടിഫിഷ്യന്‍ ഇന്റലിജന്‍സ് (നിര്‍മിതബുദ്ധി) ക്യാമറകളുടെ ട്രയല്‍റണ്‍ തുടങ്ങിയപ്പോഴേ നിരത്തുകളില്‍ നിയമലംഘനങ്ങള്‍ കുറഞ്ഞതായി മോട്ടോര്‍വാഹനവകുപ്പ്. പട്രോളിങ്ങിനിറങ്ങുന്ന മോട്ടോര്‍വാഹനവകുപ്പ് സ്‌പെഷ്യല്‍ സ്‌ക്വാഡുകള്‍ക്ക് കേസില്ലാത്ത അവസ്ഥയാണിപ്പോള്‍.

നാടിന്റ നാനാഭാഗത്തും വെച്ചിരിക്കുന്ന ക്യാമറകളെ പേടിച്ച് നിയമങ്ങള്‍ പൂര്‍ണമായും പാലിച്ചാണ് ബഹുഭൂരിപക്ഷം പേരും റോഡുകളിലേക്ക് വാഹനങ്ങളില്‍ ഇറങ്ങുന്നതെന്നാണ് ഉദ്യോഗസ്ഥര്‍ പറയുന്നത്.

അതിനാല്‍ എം.വി.ഡി. സ്‌ക്വാഡുകള്‍ എടുക്കുന്ന കേസുകളുടെ എണ്ണത്തില്‍ ഗണ്യമായ കുറവുണ്ടായിട്ടുണ്ട്. ക്യാമറകളുടെ പ്രവര്‍ത്തനത്തെക്കുറിച്ചും പിഴകളെക്കുറിച്ചും വലിയ പ്രചാരണമാണു നടന്നത്. ഇതുസംബന്ധിച്ച് വാഹന ഉടമകള്‍ക്ക് കൃത്യമായ ബോധ്യമുണ്ട്.

കൂടാതെ, വലിയ പിഴയാണ് നിയമലംഘനങ്ങള്‍ക്കു ചുമത്തുന്നത്. പിഴയില്‍നിന്ന് ഒരുതരത്തിലും രക്ഷപ്പെടാന്‍ സാധിക്കുകയില്ല. അതിനാല്‍ എല്ലാവരും പിഴപ്പേടിയില്‍ റോഡുനിയമങ്ങള്‍ കൃത്യമായി പാലിക്കുന്നുണ്ടെന്ന് ഉദ്യോഗസ്ഥര്‍ പറയുന്നു.

എം.വി.ഡി. സ്‌ക്വാഡിലെ ഉദ്യോഗസ്ഥര്‍ക്ക് ഒരുദിവസം നിശ്ചിത കേസുകള്‍ എടുക്കുന്നതിന് ടാര്‍ജറ്റ് നിശ്ചയിച്ചിട്ടുണ്ട്. എന്നാല്‍, അതു തികയ്ക്കാന്‍സാധിക്കാത്ത അവസ്ഥയാണിപ്പോള്‍. പ്രധാനറോഡുകളില്‍ നിയമലംഘനം കണ്ടെത്താന്‍ പരിശോധനയില്‍ സാധിക്കുന്നില്ല.

പ്രധാന റോഡുകളിലാണ് പ്രധാനമായും എ.ഐ. ക്യാമറകള്‍ വെച്ചിരിക്കുന്നത്. അതിനാല്‍ ഇനി ഇടറോഡുകളിലേക്കിറങ്ങി പരിശോധന കര്‍ശനമാക്കാന്‍ തീരുമാനിച്ചിരിക്കുയാണ് ഉദ്യോഗസ്ഥര്‍.

ട്രയല്‍റണ്‍ ആരംഭിച്ചു, ആദ്യഘട്ടത്തില്‍ ചെറിയ സാങ്കേതികപ്രശ്‌നങ്ങള്‍

എ.ഐ. ക്യാമറകളുടെ ട്രയല്‍റണ്‍ ആരംഭിച്ചു. ഒരുമാസത്തോളം ട്രയല്‍റണ്‍ ഉണ്ടാകുമെന്നാണറിയുന്നത്. വിവിധസ്ഥലങ്ങളില്‍ സ്ഥാപിച്ചിരിക്കുന്ന ക്യാമറകളില്‍നിന്നുള്ള ദൃശ്യങ്ങള്‍ എം.വി.ഡി.യുടെ കണ്‍ട്രോള്‍റൂമില്‍ ലഭിച്ചുതുടങ്ങി.

എന്നാല്‍, ആദ്യഘട്ടത്തില്‍ ചില സാങ്കേതികപ്രശ്‌നങ്ങള്‍ കാണിക്കുന്നുണ്ട്. ചില നിയമലംഘനങ്ങള്‍ ക്യാമറാ പരിധിയില്‍ വരുന്നില്ല. ഇതു സാങ്കേതികമായ പ്രശ്‌നമാണ്. ഇതുകൂടി പരിഹരിച്ച് പൂര്‍ണസജജമായതിനുശേഷം മാത്രമായിരിക്കും പിഴയീടാക്കുന്ന ഘട്ടത്തിലേക്കു കടക്കുന്നത്.

കെല്‍ട്രോണാണു ക്യാമറകള്‍ സ്ഥാപിച്ചതും സാങ്കേതികകാര്യങ്ങള്‍ നോക്കുന്നതും. ഇ-ചെല്ലാന്‍ മുഖേനേ നിയമലംഘകര്‍ക്കു നോട്ടീസ് നല്‍കല്‍ ഒരുമാസത്തോളം വൈകുമെന്നാണ് അറിയുന്നത്. നിലവില്‍ പ്രധാനമായും ഉള്‍റോഡുകളിലാണു ക്യാമറ സ്ഥാപിച്ചിരിക്കുന്നത്.

വികസനം നടക്കുന്നതിനാല്‍ ദേശീയപാതയില്‍ വെച്ചിട്ടില്ല. പണി പൂര്‍ത്തിയായാല്‍ അവിടെയും വരും. കൂടാതെ, ക്യാമറകള്‍ ഇടക്കിടെ മാറ്റിവെക്കുന്നതും ആലോചനയിലാണ്.

നിയമലംഘനങ്ങളുടെ ദൃശ്യങ്ങള്‍ അപ്പപ്പോള്‍ പകര്‍ത്തി എം.വി.ഡി.യുടെ കണ്‍ട്രോള്‍ റൂമിലേക്കു പകരും. നിയമംലംഘിച്ച വാഹനത്തിന്റെ ചിത്രവും പിഴയും ഉള്‍പ്പെടുന്ന നോട്ടീസ് ഉടമകള്‍ക്കു കിട്ടും.

പിഴ ഓണ്‍ലൈനിലായി അടയ്ക്കണം. അക്ഷയകേന്ദ്രങ്ങള്‍ വഴിയും അടയ്ക്കാം. 30 ദിവസത്തിനകം അടച്ചില്ലെങ്കില്‍ കേസ് കോടതിയിലെത്തും.