ഭക്ഷണത്തിനൊപ്പം ചായ കുടിക്കാറുണ്ടോ? കാത്തിരിക്കുന്നത് ഈ രോഗം; വരുത്തിവെക്കരുത് ഈ വലിയ അബദ്ധം

ചായ കുടിക്കാതെ ദിവസം തുടങ്ങാൻ കഴിയാത്തവരും ഭക്ഷണത്തിന് പിന്നാലെ ഒരു ചായ നിർബന്ധമായവരും നമുക്കിടയിലുണ്ട്. എന്നാൽ ചായ കുടിക്കുന്ന സമയവും ശരീരത്തിലെ ഇരുമ്പിന്റെ ആഗിരണത്തെ സ്വാധീനിക്കുമെന്ന് അറിയാമോ? ഭക്ഷണത്തോടൊപ്പമോ ഭക്ഷണം കഴിച്ച ഉടനെയോ ചായ കുടിക്കുന്നത് ഭക്ഷണത്തിൽനിന്നുള്ള ഇരുമ്പിന്റെ ആഗിരണം കുറയ്ക്കാം. ദീർഘകാലം ഇരുമ്പിന്റെ കുറവുള്ള ഭക്ഷണരീതിയോടൊപ്പം ഈ ശീലവും തുടരുമ്പോൾ ഇരുമ്പിന്റെ കുറവ് മൂലമുള്ള വിളർച്ചയ്ക്കുള്ള സാധ്യത വർധിക്കാം.

ചായയിലെ ടാനിൻ വില്ലനാകുന്നത് എങ്ങനെ?

ചായയിൽ പോളിഫിനോളുകളും ടാനിനുകളും അടങ്ങിയിട്ടുണ്ട്. ഇവ ഭക്ഷണത്തിലെ സസ്യജന്യ ഇരുമ്പിന്റെ (Non-haem iron) ആഗിരണത്തെ തടസ്സപ്പെടുത്താം. അതായത് ഭക്ഷണത്തിലൂടെ ശരീരത്തിലെത്തുന്ന ഇരുമ്പിന്റെ മുഴുവൻ അളവും ശരീരത്തിന് ഉപയോഗപ്പെടുത്താൻ കഴിഞ്ഞെന്നുവരില്ല.

2017-ൽ അമേരിക്കൻ ജേണൽ ഓഫ് ക്ലിനിക്കൽ ന്യൂട്രീഷനിൽ പ്രസിദ്ധീകരിച്ച പഠനത്തിൽ, ഇരുമ്പ് അടങ്ങിയ ഭക്ഷണത്തോടൊപ്പം ചായ കുടിച്ചപ്പോൾ ഇരുമ്പിന്റെ ആഗിരണം കുറഞ്ഞതായി കണ്ടെത്തി. എന്നാൽ ഭക്ഷണം കഴിച്ച് ഒരു മണിക്കൂറിന് ശേഷം ചായ കുടിച്ചപ്പോൾ ഈ തടസ്സം ഒരു പരിധിവരെ കുറഞ്ഞു. ഭക്ഷണത്തിനും ചായയ്ക്കും ഇടയിൽ സമയം നൽകുന്നത് ഇരുമ്പിന്റെ ആഗിരണത്തിന് സഹായകമാകാമെന്നാണ് പഠനം സൂചിപ്പിക്കുന്നത്.

ചായ കുടിക്കുന്ന എല്ലാവർക്കും വിളർച്ച വരുമോ?

അല്ല. ചായ കുടിക്കുന്നതുകൊണ്ട് മാത്രം ഒരാൾക്ക് വിളർച്ചയുണ്ടാകുമെന്ന് പറയാനാവില്ല. ഭക്ഷണത്തിലെ ഇരുമ്പിന്റെ അളവ്, ശരീരത്തിന്റെ ഇരുമ്പിന്റെ ആവശ്യകത, ആഗിരണം, രക്തനഷ്ടം തുടങ്ങിയ നിരവധി ഘടകങ്ങളാണ് ഇരുമ്പിന്റെ അളവിനെ സ്വാധീനിക്കുന്നത്.

പ്രത്യേകിച്ച് ആർത്തവസമയത്ത് അമിതമായി രക്തം നഷ്ടപ്പെടുന്നവർ, ഗർഭിണികൾ, ഇരുമ്പ് കുറഞ്ഞ ഭക്ഷണം കഴിക്കുന്നവർ, നേരത്തേ ഇരുമ്പിന്റെ കുറവുള്ളവർ എന്നിവർ ഭക്ഷണത്തോടൊപ്പമുള്ള ചായയുടെ ഉപയോഗത്തിൽ കൂടുതൽ ശ്രദ്ധിക്കണം. ലോകാരോഗ്യ സംഘടനയും ഇരുമ്പ് അടങ്ങിയ ഭക്ഷണം കഴിക്കുമ്പോൾ ചായ, കാപ്പി തുടങ്ങിയവ ഒഴിവാക്കുന്നത് ഇരുമ്പിന്റെ ആഗിരണത്തിന് സഹായിക്കുമെന്ന് വ്യക്തമാക്കുന്നു.

ചായ കുടിക്കുമ്പോൾ ശ്രദ്ധിക്കേണ്ട കാര്യങ്ങൾ

• ഭക്ഷണം കഴിക്കുന്നതിനൊപ്പമോ ഉടനെയോ ചായ കുടിക്കുന്നത് ഒഴിവാക്കുക.
• ഭക്ഷണം കഴിഞ്ഞ് കുറഞ്ഞത് ഒരു മണിക്കൂർ കഴിഞ്ഞ് ചായ കുടിക്കുന്നതാണ് നല്ലത്. ഇരുമ്പിന്റെ കുറവുള്ളവർക്ക് ഡോക്ടറുടെയോ ഡയറ്റീഷ്യന്റെയോ നിർദേശം അനുസരിച്ച് കൂടുതൽ ഇടവേള നൽകാം.
• ഇരുമ്പ് അടങ്ങിയ ഭക്ഷണങ്ങൾക്കൊപ്പം വിറ്റാമിൻ സി ലഭിക്കുന്ന നാരങ്ങ, നെല്ലിക്ക, പേരയ്ക്ക തുടങ്ങിയവ ഉൾപ്പെടുത്താം. ഇവ ഇരുമ്പിന്റെ ആഗിരണം മെച്ചപ്പെടുത്താൻ സഹായിക്കും.
• ഇലക്കറികൾ, പയർവർഗങ്ങൾ, ധാന്യങ്ങൾ, മാംസം തുടങ്ങിയ ഇരുമ്പിന്റെ നല്ല ഉറവിടങ്ങൾ ഭക്ഷണത്തിൽ ഉൾപ്പെടുത്തുക.
• ഇരുമ്പ് ഗുളികകൾ കഴിക്കുന്നവർ ചായയോ കാപ്പിയോ എപ്പോൾ കുടിക്കണമെന്ന കാര്യത്തിൽ ഡോക്ടറുടെ നിർദേശം പാലിക്കുക.