കണ്ണൂര് ഗവ. മെഡിക്കല് കോളജില് ആശ്വാസ് വാടക വീട് ഉദ്ഘാടനം ചെയ്തു
പരിയാരം: കണ്ണൂര് ഗവ. മെഡിക്കല് കോളേജില് രോഗികള്ക്കും കൂട്ടിരിപ്പുകാര്ക്കുമായി നിര്മിച്ച ആശ്വാസ് വാടക വീട് മന്ത്രി കെ. രാജന് ഓണ്ലൈനായി ഉദ്ഘാടനം ചെയ്തു. മന്ത്രി വീണാ ജോര്ജ് മുഖ്യാതിഥിയായിരുന്നു. എം. വിജിന് എംഎല്എ അധ്യക്ഷത വഹിച്ചു.
മെഡിക്കല് കോളജുകളില് ചികിത്സ തേടുന്ന രോഗികള്ക്കും അവരുടെ കൂട്ടിരിപ്പുകാര്ക്കും മിതമായ വാടക നിരക്കില് താമസ സൗകര്യം ലഭ്യമാക്കുന്നതിനാണ് പദ്ധതി ആരംഭിച്ചത്. 106 പേര്ക്ക് താമസ സൗകര്യം ലഭ്യമാക്കുന്നതിനായി മൂന്ന് നിലകളിലായുള്ള കെട്ടിടമാണ് നിർമിച്ചത്. ഗ്രൗണ്ട് ഫ്ലോറില് പത്ത് ബാത്ത് അറ്റാച്ച്ഡ് മുറികളും രണ്ട് ലെവലിലായി എട്ട് കിടക്കകളുള്ള ഒരു ഡോർ മിറ്ററിയും ഉള്പ്പെടുത്തിയിട്ടുണ്ട്.
ഒന്നാം നിലയില് 12 ബാത്ത് അറ്റാച്ച്ഡ് മുറികളും രണ്ടു നിലകളിലായി 64 കിടക്കകളുളള ഒരു ഡോര്മിറ്ററിയും രണ്ടാം നിലയില് 12 ബാത്ത് അറ്റാച്ച്ഡ് മുറികളുമാണുളളത്. സംസ്ഥാന സര്ക്കാര് ആറ് കോടി രൂപയാണ് ഇതിനായി അനുവദിച്ചത്. കണ്ണൂര് മെഡിക്കല് കോളേജ് കാന്പസിൽ മെഡിക്കല് കോളജിന്റെ ഉടമസ്ഥതയിലുളളതുമായ 50 സെന്റ് സ്ഥലത്താണ് പദ്ധതി നടപ്പാക്കിയത്.
കടന്നപ്പള്ളി പാണപ്പുഴ പഞ്ചായത്ത് പ്രസിഡന്റ് ടി.വി ചന്ദ്രന്, വൈസ് പ്രസിഡന്റ് വി.എ കോമളവല്ലി, ജില്ലാ പഞ്ചായത്ത് സ്റ്റാൻഡിംഗ് കമ്മിറ്റിയംഗം പി രവീന്ദ്രന്, കേരള സംസ്ഥാന ഭവന നിര്മാണ ബോര്ഡ് ചെയര്മാന് ടി.വി ബാലന്, മെഡിക്കല് കോളജ് പ്രിന്സിപ്പല് ഡോ. സൈറു ഫിലിപ്പ്, വൈസ് പ്രിൻസിപ്പൽ ഡോ. ഷീബാ ദാമോദര്, സൂപ്രണ്ട് ഡോ. കെ. സുദീപ്, ഉദ്യോഗസ്ഥർ, രാഷ്ട്രീപാർട്ടി പ്രതിനിധികൾ എന്നിവർ പങ്കെടുത്തു.
